KAINGKUALAN 26 - Tanou Moonsoi Timugon

Kim ru Tuhan

¹ “Baalo' noyo ra tampilon ralalom ru Kim ru Tuhan am mopor ngaputul konoon linon molomos ondo' binaal intor ra banang bulu makabatik motomou, matanggilung am malia'. Baali' konoon no ra gambar kirub.

² Musiti' moonong putul ru konoon pantukuon, gawar no 12 ngamito am pila' no 2 ngamito.

³ Musiti' limo ngaputul konoon pikiton masauk ra tabir maawar, am limo ngaputul ra bokon no pana musiti' pikiton koson raginio.

⁴ Pambaal noyo ra sangutan intor ra konoon motomou am patakino' sangutan raginilo ra kiing tampilon ra liwar ru karuruo tabir maawar no.

⁵ Takini' noyo putul ondo' kasaa' ra tabir kasaa' no ra limo ngoopor sangutan, am ondo' maaya' raginio takini' putul ra konoon pupus ra tabir ondo' karuo ra limo ngoopor sangutan.

⁶ Pambaal noyo ra limo ngoopor kaitan mas koson mapatunggul ra karuruo tabir maawar no.

⁷ “Pambaal noyo ra mopor am rondo' ngaputul konoon intor ra bulu ru kambing koson saukon ra taap ru Kim ru Tuhan.

⁸ Musiti' moonong putul ru konoon pantukuon, gawar no 13 ngamito am pila' no 2 ngamito.

⁹ Musiti' limo ngaputul pikiton pantakinon masauk rondo' layar, am musiti' onom ngaputul ra bokon no pikiton koson raginio niayuk. Musiti' putul ra koonom purunon ruo koson manili ra tampilon ru saang ru Kim ru Tuhan.

¹⁰ Takinin ra limo ngoopor sangutan ra kiing ru pompor ra layar kasaa', am limo ngoopor sangutan ra kiing ru layar ra karuo.

¹¹ Pambaal noyo ra limo ngoopor kaitan gangsa', am pakaito' kaitan raginilo koson mapatunggul ra ruo layar no, saboi makapatunggul masauk ra taap ru Kim.

¹² Patairo' sampiruo ra putul ru konoon ra suwo no tampilon ra tinaulian ru Kim.

¹³ Suwo ru konoon ra pila' no 50 ngasintimito, musiti' polosoon gawar ru layar no manaub ra sapapa' ru Kim.

¹⁴ “Baalo' ruo panaub ra bokon ra taap ru Kim; rondo' intor ra kungkung ru domba gawayan ondo' kaliaan, am rondo' poyo intor ra kungkung molomos koson ra panaub tampilon ra liwar.

¹⁵ “Baalo' noyo ra rangka ru Kim ondo' tumolorog toojo intor ra tataun akasia.

¹⁶ Moonong tataun ru rangka no makagawar 4 ngamito am makapila' 66 ngasintimito.

¹⁷ Moonong tataun ru rangka makaruo pambaitan ra matimpok, maa' raginio rangka raginilo makapatunggul. Musiti' ngaangai' rangka makapambaitan koson raginio.

¹⁸ Tampilon ra rabugus ru Kim, pambaal noyo ra ruo ngoopor ngantaun rangka,

¹⁹ am apat ngoopor antulan intor ra pirok, ruo antulan tampilon ra ragana' ru moonong tataun rangka koson manungka' ra karuruo pambaitan no.

²⁰ Tampilon ra ralayo ru Kim, pambaal noyo ra ruo ngoopor ngantaun rangka

²¹ am apat ngoopor antulan intor ra pirok, ruo antulan tampilon ra ragana' ru moonong tataun rangka.

²² Tampilon ra tinaulian ru Kim tampilon ra kalasaan, pambaal onom ngantaun rangka

²³ am ruo tataun rangka ra pisuk-pisuk no.

²⁴ Musiti' rangka ru pisuk raginio patunggulon ra tampilon ragana' saboi ra tampilon rasawat ra golong ondo' kasaa'. Musiti' karuruo ngantaun rangka ondo' makapisuk no baalon koson raginio.

²⁵ Ginio ra ngaangai' makabalu' ngantaun rangka am mopor am onom antulan intor ra pirok, ruo antulan tampilon ra ragana' ru moonong tataun rangka.

²⁶ “Baalo' noyo ra mopor am limo ngantaun baak intor ra tataun akasia, limo tataun ra rangka-rangka no ra rondo' ru sapapa' ru Kim,

²⁷ limo tataun ra sapapa' ra bokon, am limo tataun poyo ra sapapa' ru Kim tampilon tinaulian tampilon ra kalasaan.

²⁸ Musiti' baak ra tanga' patakinon ra sawat no malintanga' rangka, intor ra rondo' pompor mongoi ra pompor ra bokon ru Kim no.

²⁹ Musiti' rangka ru Kim am baak no angkupin ra mas. Golong-golong ondo' patakinon ra rangka koson mamiot ra baak no musiti' baalon intor ra mas.

³⁰ Baalo' noyo ra Kim no maya' ra inatang ondo' nanuluan Kuno rirun rasawat ru gunung ti.

³¹ “Baalo' ra tabir maawar intor ra konoon linon molomos ondo' binaal ra konoon bulu makabatik motomou, matanggilung am malia'. Sulamo' tabir no ra gambar ru kirub.

³² Patairo' tabir no ra apat lugu' tataun akasia ondo' inangkupan ra mas, ondo' takinin ra sangutan mas am potolorogon ra rasawat ru apat antulan pirok.

³³ Patakinon tabir no ragana' ru pinatinting ra sangutan ra taap ru Kim. Pabantaa' Kaban Nabantuan ondo' makasuang ra ruo batu pamatikan no ra bakulung ru tabir no. Tabir no mapasuai ra Lamin Pansunuran am Lamin Matulai Kaga'.

³⁴ Taubi' ra panaub ralimbou ru Kaban Nabantuan no.

³⁵ Liwar ru Lamin Pansunuran, pabantaa' mija' ru taak ra tampilon ralayo ru Kim, am pabantaa' tampakan ra lampung ra tampilon rabugus ru Kim.

³⁶ “Kulobon umpasan ra ralalom, pambaal ra tabir intor ra konoon linon molomos ondo' binaal intor ra konoon bulu makabatik motomou, matanggilung am malia' ondo' binungaan ra sulaman.

³⁷ Koson ra tabir ti, pambaal limo ngantaun lugu' intor ra tataun akasia ondo' inangkupan ra mas, am takinin ra sangutan mas. Pambaal limo antulan intor ra gangsa' ra lugu'-lugu' no.”