KAINGKUALAN 25 - Tanou Moonsoi Timugon

Taak tayar ru Kim ru Tuhan

¹ Indagu Tuhan ri Musa,

² “Susubo' ulun ru Israil magibit Raki' ra taak. Apuo' noyo atan ayuk taak intor ra moonong ulun ondo' moogot mangani'.

³ Taak no koson ra: Mas, pirok am gangsa';

⁴ konoon linon molomos, konoon bulu makabatik motomou, matanggilung am malia'; konoon intor ra bulu ru kambing;

⁵ kungkung ru domba gawayan ondo' kinalia'; kungkung malumis; tataun akasia;

⁶ umau ru lampung; apa' pampagamis ra akanon koson ra umau ru upacara am koson kaminyan ondo' maamis owou;

⁷ batu sardis am nansalinut parmata ra bokon posokoton ra bayang ru imam am utau ru Tingganai Maayo Imam.

⁸ Susubo' ulun raginilo mambaal Raki' ra rondo' kim matulai maa' raginio makaayan Aku risilo.

⁹ Kim no am ngaangai' kuliamos no musiti' baalon maya' ra inatang ondo' tuluin Takamin.”

Kaban Nabantuan

¹⁰ “Pambaal noyo ra rondo' kaban intor ra tataun akasia, makagawar 110 ngasintimito, pila' no 66 ngasintimito am sawat no 66 ngasintimito.

¹¹ Musiti' angkupin ra mas kopoyo tayar ru ralalom am liwar ru Kaban no am baluntur no baalon intor ra mas.

¹² Pambaal ra apat golong mas am pasulungo' ginio ra kaapat-apat pisuk ru Kaban; ruo golong ra sapapa' am ruo golong ra sapapa' no.

¹³ Pambaal niayuk ra tataun pamandas intor ra tataun akasia am angkupin tataun pamandas no ra mas,

¹⁴ am pasulungo' tataun pamandas no ra golong ra mansapapa' ru Kaban no.

¹⁵ Musiti' tataun pamandas no posoroyon ra golong raginilo, am kalo paingkualon.

¹⁶ Musiti' min pabantaan boo karuo-ruo batu pamatikan ondo' pataakon Kuno ramuyun ralalom ru Kaban; batu raginilo makatinulisan ra susuban no.

¹⁷ Pambaal ra panaub ru Kaban intor ra mas kopoyo; musiti' panaub no makagawar 110 ngasintimito, am pila' no 66 ngasintimito.

¹⁸ Pambaal niayuk ra ruo kirub intor ra mas ra tinuyu',

¹⁹ rondo' ra moonong pompor ru panaub ra Kaban no. Karuruo kirub no musiti' saukon rondo' tayar ra panaub,

²⁰ am baalon pantalumaan ra rasawat ru panaub, am bulos magilong ra ragana', am kawo ondo' nabingkal koson manaub ra panaub no.

²¹ Pabantaa' karuruo batu pamatikan no ra ralalom Kaban, am taubin Kaban no ra panaub no.

²² Tumuum Aku rirun ra giu' no. Intor ra rasawat ru panaub no, lolot ru ruo kirub no, mangani' Aku rirun ra ngaangai' ukum Kuno tayar ru ulun ru Israil.”

Mija' intok ru ruti' pataakon ri Aki Kapuuno'

²³ Pambaal rondo' mija' intor ra tataun akasia; musiti' mija' no makagawar 88 ngasintimito, pila' no 44 ngasintimito am sawat no 66 ngasintimito.

²⁴ Angkupin mija' no ra mas kopoyo am takinin ra baluntur mas ra liput no.

²⁵ Pambaal ra kiing no ra pila' no 7.5 ngasintimito am pambaal niayuk ra baluntur mas ra liput ru kiing no.

²⁶ Pambaal noyo ra apat golong intor ra mas am patakino' golong raginilo ra kaapat-apat pisuk, intok ru lugu' ru mija'.

²⁷ Musiti' golong raginilo koson mamiot ra tataun pamandas patakinon mamaar ra kiing ru mija'.

²⁸ Musiti' tataun pamandas no baalon intor ra tataun akasia am angkupin ra mas.

²⁹ Pambaal noyo ra pinggan, sangkir, jag am mangkuk pakayon tayar taak wain. Musiti' ngaangai' kuliamos no baalon intor ra mas kopoyo.

³⁰ Musiti' mija' no pabantaan ra saang ru Kaban Nabantuan, am musiti' rasawat ru mija' no magail pabantaan ruti' ondo' pataakon Raki'.”

Tampakan ra lampung

³¹ Pambaal rondo' tampakan ra lampung intor ra mas kopoyo. Pambaal ra tampakan am tanggayan no intor ra mas ra tinuyu'; pabungaan, makaaya' pumput am tapi' no am moonsoi mogondo' ra tampakan am tanggayan no.

³² Musiti' onom ngampango baalon ra tanggayan ru tampakan ra lampung no; talu ngampango ra pansapapaan.

³³ Musiti' moonong pango no bungain koson ra talu busak ru busak badam ra pumput am tapi' no.

³⁴ Musiti' tanggayan ru tampakan ra lampung no bungain koson ra busak ru badam ra pumput am tapi' no.

³⁵ Musiti' rondo' pumput baalon ra ragana' ru moonong takin ra pango no.

³⁶ Pumput, pango am tampakan ra lampung no moonsoi baalon intor ra sampila' mas kopoyo ra tinuyu'.

³⁷ Pambaal ra tulu' lampung ra tampakan ru lampung no am patakinon lampung raginilo ra matanda' maa' raginio sinda no suminda tampilon ra saang.

³⁸ Pambaal ra sumpit pangintawang ra sumbu' ru lampung, am niayuk talam no intor ra mas kopoyo.

³⁹ Pangalap no 35 ngakilogram mas kopoyo pambaal ra tampakan ra lampung no am ngaangai' kuliamos no.

⁴⁰ Ilalain mambaal ra ngaangai' no sumugut ra inatang ondo' nanuluan Ku rirun giti ra rasawat ru gunung ti.”