KAINGKUALAN 21 - Tanou Moonsoi Timugon

Baal ru pamakuan ra ulipon

¹ Indagu boo Tuhan ri Musa, “Pataako' aturan ragitio ra ulun ru Israil:

² Amon mambali kau ra ulipon bansa' ru Ibrani, musiti' io mangandoi rirun buoi onom ngambilor. Paat ra bilor katulu' musiti' io palabuson ra kalo bayarin kau ra atan pana.

³ Amon ru lakat poyo kalo nanangandu' io paat ra io nasauk ra ulipon min, andu' nano kalo makaaya' riso paat ra io palabuson. Kaa' amon ru makaandu' io noyo paat ra io nasauk ra ulipon min, makapabaya' io ra andu' nano mugar.

⁴ Amon ru inuatan io ru tuan nano ra sangulun ruandu', am naganak andu' nano kukula' ngaulun anak ungkuyon am ruandu', tuan nano tatangan ra andu' am anak nano, am kalo makaaya' paat ra ulipon no palabuson.

⁵ Amon ru mangiou ulipon no ra motogom io ra tuan nano, andu' am anak nano, am marara' palabuson,

⁶ musiti' tuan nano magibit riso ra intok sambayangan. Giu' no susubon ulipon no migor am sumandig ra kulobon kapoam lugu' ru kulobon, musiti' tibakin ru tuan nano talingo ru ulipon no. Koon raginio boo masauk ulipon no ra ulipon ru tuan nano saboi matoi.

⁷ “Amon ru sangulun ama' mantalan ra anak ruandu' nano koson ra ulipon, kalo palabuson ulipon ruandu' no koson ra ulipon ungkuyon.

⁸ Amon ru talanon ruandu' no ra sangulun ungkuyon ra kaatangan saukon io ra andu' ru ungkuyon no, amon ru marara' ungkuyon no ra ruandu' no, musiti' talanon saguli' ruandu' no ra ama' nano. Kalo matalan ru tuan nano ruandu' no ra ulun bansa' ru bokon sabap ra kalo tinanda' ru tuan nano pamakuan nano riso.

⁹ Amon ru mambali sangulun ama' ra sangulun ulipon ruandu' koson paganduon ra anak ungkuyon nano, musiti' ama' no tandaan no pamakuan ra ulipon no koson ra anak ruandu' nano galama'.

¹⁰ Amon ru manangandu' poyo anak ungkuyon no, rayuson no mampakan am mangani' ra konoon am niayuk kaapuan nano ra andu' kasaa' nano.

¹¹ Amon ru kalo suguton no ginio ra andu' nano, musiti' io mampalabus ra andu' nano ra kalo mangapu ra bayaran atan pana.”

Aturan intor ra pamakuan ra malaat kaga'

¹² “Osoi mapalamba' am mamatoi ra ulun bokon musiti' ukumin ra matoi.

¹³ Kaa' amon ru kalo siningon am kalo makaguang io mamatoi, pagiruon ulun no ra rondo' intok ondo' patuluon Kuno ramuyun. Giu' no maampinan ulun no.

¹⁴ Kaa' amon ru sumangit sasangulun am sumingon mamatoi ra ulun bokon, musiti' io ukumin ra matoi kabalu' pana magiru' io ra altar Kuno makiampin.

¹⁵ “Osoi mapalamba' ra ama' nano kapoam ina' nano musiti' ukumin ra matoi.

¹⁶ “Osoi mantakou ra ulun, ra tinalan noyo kapoam lakat poyo soroi ra baloi nano, musiti' ulun nantakou no ukumin ra matoi.

¹⁷ “Osoi magulas ra ama' nano kapoam ina' nano musiti' ukumin ra matoi.

¹⁸ “Amon ru ralalom rondo' pansangaran, napalamba' sasangulun ra ulun bokon ra batu kapoam linuntug no, kaa' kalo pinatoi no, kalo ukumin ulun no. Amon ru ulun linamba' no makalangan kinibit ru lamba' no,

¹⁹ kaa' makatirong am makaugar ra manjujuga', musiti' ulun napalamba' no mambayar ra palit ru kalubatan buoi ru ulun no marualan, am mantalimo riso saboi mapali'.

²⁰ “Amon ru mapalamba' sasangulun ra ulipon nano ra tataun, ulipon ra ungkuyon kapoam ruandu', am marayus matoi ulipon no, musiti' ulun ra napalamba' ra ulipon no ukumin.

²¹ Kaa' amon ru ulipon no kalo matoi malupus songorou kapoam ruo ngoorou, kalo ukumin tuan nano. Namusaan ra ulipon noyo ukuman riso.

²² “Amon ru mokoondo' kukula' ngaulun ungkuyon mansangor am namilat ra sangulun ruandu' maapang saboi io mairuan, kaa' ruandu' no galama' kalo napilatan tayar ra bokon, ulun ondo' namilat ra ruandu' no musiti' tagion sumugut ra kitaak ru ralaki ru ruandu' no, am pangiawan ru akim.

²³ Kaa' amon ru ruandu' no galama' mapilatan, ukuman no painawo aligin ra painawo,

²⁴ mato aligin ra mato, ripon aligin ra ripon, kalindu' aligin ra kalindu', kalayam aligin ra kalayam,

²⁵ malinsu aligin ra malinsu, mapilat aligin ra mapilat am mangulitomo' aligin ra mangulitomo'.

²⁶ “Amon ru mapalamba' sasangulun ra mato ru ulipon nano, ungkuyon kapoam ruandu', am mangkinibit ra moolou mato no, musiti' no palabuson ulipon nano koson pambayar ra kalubatan ra mato no.

²⁷ Amon ru mapalamba' sasangulun ra ulipon nano saboi mapandak ripon ru ulipon nano, musiti' no palabuson ulipon no koson ra pambayar ra kalubatan ra ripon no.”

Pinalansanan ra tatangan

²⁸ “Amon ru manangau sanginan sapi' gawayan ra sasangulun saboi io matoi, musiti' sapi' gawayan no potoyon bambangon ra batu am kual no kalo maakan, kaa' kalo ukumin tatangan no.

²⁹ Kaa' amon ru masalok sapi' gawayan no jumunjung ra ulun, am pinakara' noyo tatangan no kaa' kalo aputon no sapi' gawayan no, am amon ru manangau sapi' gawayan no ra sasangulun saboi matoi ulun no, musiti' sapi' no potoyon bambangon ra batu am tatangan no pana musiti' ukumin ra matoi.

³⁰ Amon ru tatangan no pambayaron ra tagi', musiti' io mambayar ra kula' suang kitaakon koson mamuli' ra painawo nano.

³¹ Amon ru mamatoi sapi' gawayan no ra sangulun anak ungkuyon kapoam sangulun anak ruandu', musiti' bayaan aturan ra nogondo'.

³² Amon ru mamatoi sapi' gawayan no ra sangulun ulipon ungkuyon kapoam sangulun ulipon ruandu', musiti' tatangan ra sapi' gawayan no mambayar ra tatangan ra ulipon no suang talu ngoopor ngampila' ruit pirok, am musiti' sapi' gawayan no potoyon bambangon ra batu.

³³ Amon ru mangukab sasangulun ra taub ru tulubong kapoam mangkali ra tulubong ra kalo taubin no, am maratu' sanginan sapi' gawayan kapoam kaladai ra ralalom ru tulubong no,

³⁴ musiti' tatangan ra tulubong no mambayar ra kalubatan ra tatangan ra bibiag tinambiag no, kaa' io mangalap ra bibiag tinambiag ondo' minatoi no.

³⁵ Amon ru mamatoi sapi' gawayan ru sasangulun ra sapi' gawayan ru ulun bokon, musiti' karuruo ngaulun no mantalan ra sapi' ondo' naayag no am piruon nilo ruit no. Musiti' ilo mantayar niayuk ra kual ru sapi' gawayan ondo' minatoi no.

³⁶ Kaa' amon ru napandayan noyo ra magail manangau sapi' gawayan no, am kabalu' pana raginio marara' tatangan no mangaput ra sapi' no, musiti' io mambayar ra kalubatan ra sapi' gawayan ondo' maayag no, am io mangalap ra sapi' gawayan ondo' minatoi no.”