KAINGKUALAN 20 - Tanou Moonsoi Timugon

Mopor Ukum ri Aki Kapuuno'

¹ Indagu boo i Aki Kapuuno' am gitio noyo ragu Nano,

² “Aku noyo Tuhan i Aki Kapuuno' min ondo' nagibit ramuyun miningkual intor ra Misir, intok min sinauk ra ulipon.

³ “Pai' samba ra tuhan-tuhan ra bokon; samba ayuk Raki'.

⁴ “Pai' baalo' sinungkalalaing ra tayar min, sinungkalalaing ondo' sumalu ra atan pana ondo' soroi ra limbowon, ra tana' ti kapoam ralalom ru timug ragana' ru tana' ti.

⁵ Pai' samba ra sinungkalalaing ru atan pana, sabap ra Aku noyo Tuhan i Aki Kapuuno' min, am kalo masaga' Aku pogondoon ra atan pana. Ukumin Ku ulun masisang Raki'. Ukumin Ku niayuk papag nilo polos ra papag ra katalu am kaapat.

⁶ Kaa' mapakito Aku ra togom Ku ra riribu papag ru ulun ondo' motogom Raki' am gumagaya' ra ukum Kuno.

⁷ “Pai' sabito' inggalan Kuno koson kuayan ra malaat sabap ra Aku Tuhan i Aki Kapuuno' mu, mangukum ra osoi pana ondo' mangumpara' ra inggalan Kuno.

⁸ “Iantako' noyo orou Sabat am urumato' orou raginio koson orou ondo' matulai.

⁹ Akau mokoonom ngoorou mangandoi,

¹⁰ kaa' orou ra katulu' iono orou tangusan ondo' patimpokon Raki'. Paat ra orou raginio sangulun pana kalo pongondoyon: okou, anak muno, ulipon muno, bibiag tinambiag muno kapoam ulun bansa' ru bokon ondo' minayan ra pagun muno.

¹¹ Buoi onom ngoorou Aku, Tuhan nambaal ra tana' ti, limbowon, raat am ngaangai' ondo' soroi ralalom no, kaa' paat ra orou ra katulu' timinangus Aku. Ginio ra Aku Tuhan mambarakat ra orou Sabat am patimpokon ginio Raki'.

¹² “Urumato' noyo ama' am ina' muno, maa' raginio maawar painawo muno ra tana' ti ondo' pataakon Kuno rirun.

¹³ “Pai' pampatoi.

¹⁴ “Pai' lapau.

¹⁵ “Pai' pantakou.

¹⁶ “Pai' panimbaal ra ragu ra ulun bokon.

¹⁷ “Pai' kalaai ra ondo' tagamin ru bokon: baloi nano, andu' nano, ulipon nano, bibiag tinambiag nano, kaladai nano kapoam atan pana soroi riso no.”

Mangalaa' ulun ru Israil

¹⁸ Pakaining ulun ru Israil ra bolos ru tingkalur am bujung, am niayuk nakakito ra ganit am gunung makalisun, nonontol ilo nangalaa' am mininggalur intor ra giu' no.

¹⁹ Konilo ri Musa, “Amon ru mindagu kou ramon, iningon mai. Kaa' amon ru mindagu i Aki Kapuuno' ramon, matoi akai.”

²⁰ Taam i Musa, “Pai' kalaa'; i Aki Kapuuno' matong koson mangkinam ayuk ramuyun, maa' raginio rumayus kau gumagaya' Riso am maa' raginio kalo makatula kau.”

²¹ Kaa' ulun raginilo lakat poyo migor maalur intor ra giu' no, am i Musa ayuk mininggaar ra gaun makapal intok i Aki Kapuuno' minatong.

Aturan ra altar

²² Panusub Tuhan ri Musa mindagu ra ulun ru Israil no, “Nakito min ati kulaan ra Aku, Tuhan mindagu ramuyun intor ra limbowon.

²³ Pai' taligama' pambaal ra sinungkalalaing intor ra pirok kapoam mas koson sambaan ra sapapa' Kuno.

²⁴ Baali' Aku ra altar intor ra tana'; papatampakan min ra taak domba am sapi' min koson ra taak simbalui koson mapabansuk ra guang ru Tuhan, am taak simbalui koson makibarakat ra Tuhan. Giu' ra moonong intok ondo' aruon Kuno ramuyun koson sumambayang Raki', matong Aku am mambarakat ramuyun.

²⁵ Amon ru baalin min Aku ra altar intor ra batu, pai' baalo' intor ra batu ondo' pinutul ra pahat, sabap ra paat ra akau mamakai ra pahat raginio, batu no kalo boo maaya' Raki'.

²⁶ Pai' Aku baali' ra altar ondo' makatukar, maa' raginio kalo makito tayar ru inan min ondo' kalo maaya' ilain.”