KAINGKUALAN 19 - Tanou Moonsoi Timugon

Giu' ulun ru Israil ra Gunung Sinai

^1-2 Iruani' boo ru ulun ru Israil Rapidim. Paat ra orou kasaa' sila' katalu ra ilo nakaingkual intor ra Misir, nakasaboi ilo ra tana' kaagisan Sinai. Nangkim ilo ra giu' no, lonson toojo ru Gunung Sinai.

³ Nagaloi i Musa rasawat ru gunung mongoi tuum ri Aki Kapuuno'. Pampiau Tuhan ri Musa intor ra gunung no am nanusub riso mambala' ra ulun ru Israil, papag ri Jakub,

⁴ “Nakito min atan ondo' binaal Kuno ra ulun ru Misir, ati kulaan Aku nagibit ramuyun Raki' ra intok ragitio, koson sanginan kanui ondo' nagibit ra anak nano ra kawo nano.

⁵ Raino amon gumagaya' kau Raki' am gumuut ra nabantuan Kuno, masauk kau ra ulun Kuno galama'. Titikop ru tana' ti Aku tatangan, kaa' masauk kau ra ulun pilion Kuno.

⁶ Masauk kau ra ulun ondo' patimpokon Raki' galama', am mangandoi kau ayuk Raki' koson ra imam.”

⁷ Ginio ra tuun i Musa, am pampiau ra tingganai ru ulun raginilo koson tumimung. Pambala' io boo risilo ra baal ondo' nanusuban ru Tuhan riso.

⁸ Taam ngaangai' ulun no ra nagagampan, “Baalon mai ngaangai' ondo' rinagu ru Tuhan.” Pabalaa' ri Musa baal ragitio ra Tuhan.

⁹ Indagu Tuhan ri Musa, “Matong Aku ramuyun ralalom ru gaun makapal maa' raginio makaining ulun ra Aku mindagu rirun; intor raginio masalok ilo boo mangintopot rirun.” Pinasaboi ri Musa taaman ru ulun raginilo ra Tuhan.

¹⁰ Indagu Tuhan riso, “Ongoi noyo tuum ra ulun raginilo am susubo' ilo migimpasau ra orou raiti' am susuab no. Musiti' ilo mampupu' ra bayang nilo

¹¹ am mopongo ra orou malaas. Paat ra orou raginio tumuun Aku ra Gunung Sinai. Giu' no moonong ulun makakito Raki'.

¹² Baalo' balitan ra liput ru gunung no maa' raginio kalo makasail ulun no. Balai' ilo maa' raginio kalo magaloi ra gunung no kapoam minggaar. Osoi sumail ra balitan no ukumin ra matoi.

¹³ Musiti' ulun no bobolon kapoam tiwon ra panah, am kalo makambong ru osoi pana. Aturan ti masauk ra ulun am bibiag; ngaangai' ondo' sumail ra balitan no kalo polosoon maayag. Kaa' makaining ra bolos maawar intor ra bujung, musiti' ulun raginilo magaloi ra gunung.”

¹⁴ Tuun boo i Musa intor ra gunung am panusub ra ulun raginilo tumampos ra sumambayang. Mampupu' ilo ra bayang,

¹⁵ indagu boo i Musa risilo, “Tampos kano ra orou malaas, am liliwa' ragitio kalo parulugon kau.”

¹⁶ Paat ra orou ra katalu, ra iosusuab, makatimpalak am makaganit ra rasawat ru gunung. Makito gaun makapal ra giu' no, am maining bolos ru bujung ondo' mosongou kaga'. Moonong ulun ra pangkiman no nonontol ra malaa'.

¹⁷ Nagibit i Musa risilo mingkual intor ra pangkiman koson mongoi tuum ri Aki Kapuuno', am bigor ilo ra lonson toojo ru gunung.

¹⁸ Titikop ru Gunung Sinai natikop ra lisun sabap ra timinuun Tuhan ra rasawat no ralalom ru apui. Binuun ru lisun ra makapal no minsawat koson ra lisun ru rapuan, am titikop ru gunung no nogonggon kaga'.

¹⁹ Bolos ru bujung sumongou poyo. Mindagu i Musa ri Aki Kapuuno' am tumaam Io ra tingkalur.

²⁰ Timinuun Tuhan ra rasawat ru tampak Gunung Sinai, am pampiau ri Musa mongoi ra rasawat ru gunung no. Pagaloi i Musa ra gunung,

²¹ am indagu Tuhan riso, “Tuun no am pinsono' ulun raginilo maa' raginio kalo sumail ra balitan no koson milong Raki'. Amon ru sumail ilo, masuang ulun matoi.

²² Imam-imam pana ondo' matong inggaar Raki' musiti' impasawin inan nilo. Amon ru kalo ukumin Ku ilo.”

²³ Indagu i Musa ra Tuhan, “Kalo makaaloi ulun no ragiti, sabap ra nanusub Kou ramon mangkara' ra gunung ti matulai am balitin ra liput no.”

²⁴ Taam Tuhan, “Tuun noyo am saguli' ragiti mabaya' ri Arun. Kaa' imam-imam am ulun kalo pasailon ra balitan no koson matong Raki'. Amon ru sumail ilo, ukumin Ku ilo.”

²⁵ Tuun boo i Musa koson tumuum ra ulun raginilo am pambala' risilo ra atan ondo' rinagu ru Tuhan.