KAINGKUALAN 18 - Tanou Moonsoi Timugon

Nanambului i Jitro ri Musa

¹ I Jitro, iwan ri Musa, imam giu' ra Midian, nakaining ra ngaangai' ondo' binaal ri Aki Kapuuno' tayar ri Musa am ulun ru Israil no paat ra Tuhan nagibit risilo miningkual intor ra Misir.

² Ginio ra nabaya' i Jitro am i Jipora manambului ri Musa. Jipora ti andu' ri Musa, ondo' lakat poyo minayan giu' ra Midian.

³ Nagibit niayuk i Jitro ri Girsom am i Iliijir, ruo ngaulun anak ungkuyon ri Jipora. (Nakaindagu i Musa ra, “Aku ti sangulun bansa' ru bokon ra tana' ondo' kalo nauligan kutu.” Ginio ra ininggalanan no sangulun anak ungkuyon nano i Girsom.

⁴ Minindagu io niayuk ra, “I Aki Kapuuno' ondo' sambaan ru ama' kuli nangindangan am namayag raki' intor ra potoyon ru raja' ru Misir.” Ginio ra ininggalanan no anak ungkuyon no ra sangulun poyo ri Iliijir.)

⁵ Nababaya' i Jitro ra andu' ri Musa am anak ungkuyon ri Musa minongoi ra tana' kaagisan, intok ri Musa nangkim maar ra gunung matulai.

⁶ Pambilin i Jitro ri Musa ra tanou ra matong ilo.

⁷ Ginio ra ingkual i Musa mongoi uma' riso. Igulatur io ra saang ri Jitro am alok riso. Sikuot ilo ra moonsoi ilo kia sigagama', am umpos ra kim ri Musa.

⁸ Nambala' i Musa ri Jitro ra ngaangai' ondo' binaal ru Tuhan ra raja' am ulun ru Misir koson mamayag ra ulun ru Israil. Nambala' io niayuk ri Jitro ra kapaganan ondo' mauma' nilo ralalom pangkiralanan am ati kulaan ilo binayag ru Tuhan.

⁹ Naansukan i Jitro nakaining ra ngaangai' baal raginio.

¹⁰ Indagu io, “Omporo' noyo Tuhan ondo' namayag ramuyun intor ra raja' am ulun ru Misir. Omporo' noyo Tuhan ondo' namayag ra ulun Nano intor ra uliponon!

¹¹ Nakapandai aku ra Tuhan maayo poyo intor ra ngaangai' tuhan, sabap ra nambaal Io ra ngaangai' no paat ra liminaat ulun ru Misir ra ulun ru Israil.”

¹² Pagibit boo i Jitro ra taak simbalui koson mapabansuk ra guang ru Tuhan, am niayuk taak-taak simbalui ra bokon koson pataakon ri Aki Kapuuno'. I Arun am ngaangai' tingganai ru ulun ru Israil minaya' ri Jitro koson mababaya' mangakan ra saang ri Aki Kapuuno'.

I Musa nampili' ra akim-akim

¹³ Paat ra suabon no, nanalasai i Musa ra pansangaran tayar ru ulun ru Israil. Ginio ra kumantisuk io intor ra susuab ti saboi ra rondom ti.

¹⁴ Pakakito i Jitro ra ngaangai' ondo' baalon ri Musa, pangkuot io, “Atan kia ngaangai' baal ti ondo' baalon muno ra ulun ragitilo? Kua baalo' mu sangulun kandoi ti, saboi ngaangai' ulun migor ragiti intor ra susuab ti polos ra rondom ti makibilin rirun?”

¹⁵ Taam i Musa, “Musiti' ku baalon kandoi ti sabap ra ulun matong raki' koson makapandai ra kasagaan ri Aki Kapuuno'.

¹⁶ Amon ru mansangor ruo ngaulun, matong ilo raki' am patasin ku osoi intor risilo ondo' motopot. Mapasaboi aku niayuk ra susuban am ukum ri Aki Kapuuno' risilo.”

¹⁷ Indagu boo i Jitro ri Musa, “Kalo natanda' kandoi mutu.

¹⁸ Ralan ragitio mapabagui rirun am niayuk ngaangai' ulun ti. Kandoi ti maagat kaga' ra okou sangulun mambaal.

¹⁹ Raino iningo' bilin kutu, am i Aki Kapuuno' soroi sumimpung rirun. Motopot ra suali kou ru ulun ragitilo ra saang ri Aki Kapuuno' am mambala' ra pansangaran nilo Riso.

²⁰ Musiti' mu ilaan ilo ra susuban am ukum ri Aki Kapuuno', am niayuk mambala' ati kulaan ilo maayag am atan matanda' baalon.

²¹ Kaa' suai raginio, musiti' kou mampili' ra kukula' ngaulun ungkuyon ondo' mangapintar. Lantiko' ilo ra tingganai ru mamagun ondo' maningganai ra saribu ngaulun, maatus ngaulun, limo ngoopor ngaulun am mopor ngaulun. Musiti' ilo no ulun ondo' malaa' ri Aki Kapuuno', malansanan am kalo masaga' mangapu ra ruit pangambi'.

²² Polosoon ilo magail mangandoi koson ra akim ra ulun. Makapambala' ilo rirun ra ngaangai' ondo' mapagon, kaa' musiti' ilo galama' mamatas ra pansangaran ra mongoborok. Ralan ragitio mapakaluoi ra kandoi muno, sabap ra makaindangan ilo rirun mansaan ra maagat.

²³ Amon ru baalon mu gitio koson ra nanusuban ri Aki Kapuuno', kalo makabagui rirun am ngaangai' ulun makauli' ra baloi am pansangaran masalasai noyo.”

²⁴ Sinugut ri Musa bilin ri Jitro.

²⁵ Nampili' i Musa ra kukula' ngaulun ungkuyon ondo' mapintar ra popolos ru ulun ru Israil, am nampalantik risilo ra tingganai ondo' maningganai ra saribu ngaulun, maatus ngaulun, limo ngoopor ngaulun am mopor ngaulun.

²⁶ Magail ilo mangandoi koson ra akim ru ulun ru Israil. Nambala' ilo ra baal ondo' mangapagon ri Musa, kaa' ilo galama' manalasai ra pansangaran ondo' mongoborok.

²⁷ Indagu boo i Musa ra tumoojo ri Jitro, am uli' boo i Jitro ra pagun nano.