KAINGKUALAN 17 - Tanou Moonsoi Timugon

Timug intor ra Batu Maayo

¹ Ngaangai' ulun ru Israil nanatang ra tana' kaagisan Sin am pababanding intor ra rondo' intok mongoi intok ra bokon maya' ra susuban ru Tuhan. Nangkim ilo giu' ra Rapidim, kaa' kalo nakatuum ra timug ra giu' no.

² Mambubutok ilo ri Musa am indagu, “Anii' akai no ra timug inumon.” Taam i Musa, “Kua pambubutok kau? Kua pangkinam kau ra Tuhan?”

³ Kaa' ulun-ulun pinaason kaga' am marayus-rayus ilo mambutok ri Musa. Konilo, “Kua ibito' mu akai mingkual intor ra Misir? Maa' kia raginio akai am anak maiti, am niayuk tinambiag mai matoi ra paason?”

⁴ Pakiasi' toojo i Musa ra Tuhan am indagu, “Atan boo musiti' kuno baalon ra ulun ragitilo? Masaga' ilo mombobol raki'.”

⁵ Indagu Tuhan ri Musa, “Piawo' kukula' ngaulun tingganai ulun ru Israil am baya' risilo mugar sumigulu ra ulun raginilo. Ibito' niayuk jujuga' ondo' pinalamba' muno ra Sungoi Nil.

⁶ Migor Aku ra saang mino rasawat ru rondo' batu maayo giu' ra Gunung Sinai. Lambaa' batu no, am mingkual timug ra inumon ru ulun.” Baalo' ri Musa ginio ra saang ru tingganai ulun ru Israil no.

⁷ Intok no ininggalanan ra Masa am Miriba sabap ra mambubutok ulun ru Israil am mangkinam ra Tuhan paat ra ilo mangkuot, “Maya' kia Tuhan no ritakau kapoam kalo?”

Mangayou manggal ra ulun ru Amalik

⁸ Ratong ulun ru Amalik am pamulunsar ra ulun ru Israil giu' ra Rapidim.

⁹ Indagu i Musa ri Josua, “Pilio' kukula' ngaulun koson mangayou ra ulun ru Amalik ra susuab no. Migor aku ra tampak ru bulur liliwa' mampaguut ra jujuga' koson ra nanusuban ri Aki Kapuuno'.”

¹⁰ Baalo' ri Josua atan ondo' nanusuban ri Musa am ingkual boo mangayou ra ulun ru Amalik, liliwa' i Musa, i Arun am i Gur nagaloi ra tampak ru bulur.

¹¹ Buoi ri Musa nangakat ra kalindu' nano, mamanang ulun ru Israil, kaa' makatuun kalindu' nano, tumalimpuun mamanang boo ulun ru Amalik.

¹² Paat ra naagui noyo kalindu' ri Musa, pangalap i Arun am i Gur rondo' batu am manusub ri Musa manturung ra rasawat no, liliwa' migor ilo ra sapapa' nano koson manungka' ra kalindu' ri Musa polos tumolop mato ru orou.

¹³ Koon raginio noyo ulun ru Amalik kinala ri Josua.

¹⁴ Indagu boo Tuhan ri Musa, “Tulisi' sauk ragitio maa' raginio makara'. Balai' i Josua ra pusoon Ku lingono' ulun ru Amalik.”

¹⁵ Nambaal i Musa rondo' altar am inggalani' no ra “Tuhan Bandira' Kuno.”

¹⁶ Kon ri Musa, “Bingkalo' Bandira' ru Tuhan! Marayus-rayus Tuhan mangayou manggal ra ulun ru Amalik ra sabuoi-buoi no!”