KAINGKUALAN 13 - Tanou Moonsoi Timugon

Patimpokon anak katuaan

¹ Indagu Tuhan ri Musa,

² “Patimpokon Raki' ngaangai' anak ungkuyon katuaan. Moonong anak ungkuyon katuaan ru ulun ru Israil, am moonong anak ungkuyon katuaan ru bibiag Aku noyo tatangan.”

Pangiantakan ra ruti' kalo linatakan ra ragi

³ Indagu i Musa ra ulun ru Israil, “Karaa' orou raiti', orou ra akau nangiruan ra pagun ru Misir, intok akau inulipon. Paat ra orou raiti' nagibit Tuhan ramuyun mingkual ralalom ru kuasa' Nano ondo' maayo; kalo makaakan kau ra ruti' ondo' linatakan ra ragi.

⁴ Nangiruan kau ra Misir ra orou raiti', paat ra bulan Abib, iono bulan ra kasaa'.

⁵ Nampator Tuhan ra kinamatuaan mini koson mangani' ramuyun ra tana' ru ulun ru Kanaan, Git, Amori, Giwi am Jibusi. Tana' ti moonsoi am malabung. Maibit kau ru Tuhan ra tana' raginio, musiti' kau mangiantak ra pangiantakan ti moonong bilor, paat ra bulan ra kasaa'.

⁶ Musiti' kau mangakan ra ruti' kalo linatakan ra ragi buoi katuluan, am paat ra orou ra katulu' no baalon min pangiantakan koson mangurumat ra Tuhan.

⁷ Buoi tulu' ngoorou no, musiti' kau mangakan ra ruti' ondo' kalo linatakan ra ragi. Giu' ra titikop ru pagun min, kalo mataak makaragi kapoam atan ayuk pana makaragi.

⁸ Paat ra talimpuun ru pangiantakan no, balai' min toojo anak ungkuyon mino ra mambaal kau ngaangai' no sabap ra atan ondo' binaal ru Tuhan ramuyun, paat ra akau mangiruan ra pagun ru Misir.

⁹ Pangiantakan ti masauk rondo' pangkaraan, koson ra tatandu' ondo' pinabangkos ra longon kapoam rabas mino, koson mapakara' ramuyun ra musiti' kau marayus-rayus mindagu am mintutun ra Ukum ru Tuhan, sabap ra nagibit noyo Tuhan ramuyun miningkual intor ra Misir ralalom ru kuasa' Nano ra maayo.

¹⁰ Iantakon noyo pangiantakan ti ra moonong bilor, paat ra ondo' inaru' noyo.”

Anak katuaan

¹¹ Indagu i Musa ra ulun ru Israil, “Ibiton kau ru Tuhan ra tana' ru ulun ru Kanaan, ondo' binantu' Nano ramuyun am kinamatuaan mini. Makataak No ramuyun,

¹² musiti' kau mapataak ra moonong anak ungkuyon katuaan ra Tuhan. Moonong anak ungkuyon katuaan ru bibiag tinambiag mino Tuhan noyo tatangan.

¹³ Kaa' moonong anak ungkuyon katuaan ru kaladai musiti' min pulion intor Riso am mapataak ra sanginan anak domba koson ra palit. Amon ru marara' kau mamuli' ra anak kaladai no, musiti' min pandakon liog no. Musiti' min pulion moonong anak ungkuyon katuaan min.

¹⁴ Paat ra orou matong, paat ra mangkuot anak ungkuyon mino ra arati' ru ngaangai' ti, musiti' min taamon koson ragitio, ‘Ralalom ru kuasa' ondo' maayo, inibit takau ru Tuhan miningkual intor ra Misir, intok itakau inulipon.

¹⁵ Paat bambalingatan raja' ru Misir am manginga' ritakau mugar, namatoi Tuhan ra moonong anak ungkuyon katuaan am moonong anak ungkuyon katuaan bibiag tinambiag giu' ra Misir. Ginio sabap ra mapataak takau ra moonong anak ungkuyon katuaan bibiag tinambiag koson taak simbalui ra Tuhan, kaa' pulion takau anak ungkuyon katuaan takau.

¹⁶ Pangiantakan ti masauk rondo' pangkaraan, koson ra tatandu' ondo' pinabangkos ra longon kapoam rabas takau, koson mapakara' ritakau ra inibit takau ru Tuhan mingkual intor ra Misir ralalom ru kuasa' Nano ondo' maayo.’ ”

Lugu' ru gaun am lugu' ru apui

¹⁷ Paat ra makataak raja' ru Misir ra ulun ru Israil mugar, kalo naningganai Tuhan risilo maya' ra ralan mansail ra pagun ru Palistin, kabalu' pana ralan raginio mariwa' kaga'. Pangkaraan ri Aki Kapuuno', “Marara' Aku ra ulun Kuno mangulau ra karaan, am sumaguli' ra Misir paat ra ilo makapandai ra musiti' ilo mangayou.”

¹⁸ Ginio ra nagibit Io risilo ra ralan lumimpuong mansail ra tana' kaagisan mongoi ra Raat Galaga. Paat ra ulun ru Israil nangiruan ra Misir, nanakinandoi ilo koson mongoi pangayou.

¹⁹ Nagibit i Musa ra baangkai ri Jusup, sabap ra paat ra io naayag nanusub i Jusup ra ulun ru Israil nagibot manugut raginio. Bilin ri Jusup, “Paat ri Aki Kapuuno' mamayag ramuyun, musiti' min ibiton baangkai kutu mingkual intor ra intok ti.”

²⁰ Iniruanan ulun ru Israil Sukot am nangkim giu' ra Itam, kiing ru tana' kaagisan.

²¹ Tampilon ra matawang, soroi Tuhan ra saang nilo ralalom lugu' ru gaun, koson manulu' ra ralan risilo; tampilon ra rondom soroi Io ra saang nilo ralalom lugu' ru apui, koson mangani' ra sinda risilo. Ginio ra makaugar ilo paat ra matawang am molondom.

²² Buoi songorou lugu' ru gaun soroi ra saang ru bansa' raginio, am buoi sorondom lugu' ru apui soroi ra saang nilo.