KAINGKUALAN 11 - Tanou Moonsoi Timugon

Manala' i Musa ra patayan ru anak ungkuyon katuaan

¹ Indagu boo Tuhan ri Musa, “Mangukum Aku rondo' ayuk boo ukuman ra raja' ru Misir am mamagun nano. Mopongo raginio, mapaugar io boo ramuyun. Akau niayuk poyo pagiruon no intor ragiti.

² Ginio ra indagu no ra ngaangai' ulun ru Israil; susubo' noyo ilo ngaangai' makitaak ra kuliamos limpor mas am pirok intor ra sambalayan nilo.”

³ Nangkinibit Tuhan ra ulun ru Misir mangurumat ra ulun ru Israil. Pagawai am mamagun ru Misir mangurumat kaga' ri Musa.

⁴ Indagu boo i Musa ra raja', “Gitio noyo rinagu ru Tuhan, ‘Olo'-olo' ra tanga' rondom, ongoyon Ku liputo' pagun ru Misir.

⁵ Moonong anak ungkuyon katuaan ra Misir matoi, intor galing ra anak ungkuyon katuaan ru raja' ondo' manungkus ra kurisi' pamarintaan, polos ra anak ungkuyon katuaan ru inulipon ruandu' ondo' mampagiling ra unor-unor. Matoi niayuk anak katuaan ru ngaangai' bibiag tinambiag.

⁶ Maining tangi' mosongou ra titikop ru Misir; baal raginio kalo igondo' kasauk am kalo boo masauk.

⁷ Kaa' intor ra tayar ru ulun ru Israil, ulun kapoam bibiag kalo jojowon. Raginio boo, makapandai kou ra Aku, Tuhan, mapasuai ra ulun ru Misir am ulun ru Israil.’ ”

⁸ Pupus no indagu i Musa, “Ngaangai' pagawai muno matong am samba ra saang kuno. Makitaak ilo maa' raginio magibit aku ra ngaangai' bansa' kuno mangiruan ra pagun ti. Mopongo raginio mugar aku.” Nabaya' ra siminangit toojo, iruani' ri Musa raja'.

⁹ Indagu Tuhan ri Musa, “Kalo mangining raja' no ra ragu muno, maa' raginio mabaal Ku masuang poyo kaimuagan no ra pagun ru Misir.”

¹⁰ Nambaal i Musa am i Arun ra ngaangai' kaimuagan ra saang ru raja', kaa' nangkinibit Tuhan ra bambalingatan raja' no, saboi kalo mangiou raja' ra ulun ru Israil mangiruan ra pagun nano.