KAINGKUALAN 10 - Tanou Moonsoi Timugon

Gapu'

¹ Indagu boo Tuhan ri Musa, “Ongoi noyo tuum ra raja'. Aku nangkinibit riso am pagawai nano bambalingatan, maa' raginio mabaal Ku kaimuagan-kaimuagan ti ra tatanga' nilo,

² am maa' raginio mabalaan min anak am akupu min ati kulaan inanja'-anja' Ku ulun ru Misir, paat ra Aku mambaal ra kaimuagan. Makapandai kau ngaangai' ra Aku noyo Tuhan.”

³ Ginio ra ongoi boo tuum i Musa am i Arun ra raja' am indagu riso, “Tuhan i Aki Kapuuno' ru ulun ru Ibrani mindagu, ‘Kula' poyo buoi mu kalo masaga' kumuku' Raki'? Paugaro' noyo ulun Kuno maa' raginio makasambayang ilo Raki'.

⁴ Amon ru lakat poyo marara' kou, ra susuab no maparatong Aku ra gapu' ra pagun muno.

⁵ Titikop ralimbou ru tana' matikop ra masuang kaga' gapu'. Mangakan gapu' ra ngaangai' tatanom am niayuk puun tataun ondo' kalo natungkob ru rasam batu.

⁶ Mototop ru gapu' istana muno am baloi ru pagawai muno, am niayuk baloi ru ngaangai' mamagun muno. Karaat ragitio makalalaa' poyo intor ra atan ondo' nailian ru kinamatuaan muli.’ ” Talikur i Musa am ugar.

⁷ Indagu pagawai no ra raja', “Kula' poyo buoi ru ulun no mantipagon ritakau? Polosoon noyo ulun ru Israil no mugar maa' raginio makasambayang ilo ra Tuhan i Aki Kapuuno' nilo. Ilai' noyo, jajajou ayuk boo pagun takau ti!”

⁸ Ginio ra piniau saguli' i Musa am i Arun tumuum ra raja'. Indagu raja' risilo, “Paugaron kau koson sumambayang ra Tuhan i Aki Kapuuno' mino. Kaa' osoi intor ramuyun mugar?”

⁹ Taam i Musa, “Makakai' akai mugar, makaaya' lalaing am ulun mangatutuo. Anak ungkuyon am anak ruandu', ngaangai' domba, kambing am sapi' ibiton mai sabap ra moonsoi ra akai mambaal ra rondo' pangiantakan maayo koson mangurumat ra Tuhan.”

¹⁰ Indagu raja' risilo, “Mampator aku ralalom inggalan ru Tuhan ra kalo iowon takamin magibit ra bala ruandu' am lalaing! Mapandayan ra mangatang kau ra gumuor.

¹¹ Kalo! Bala ungkuyon ayuk paugaron koson mongoi sambayang ra Tuhan, amon ru baal raginio ondo' kasaga' min.” Kopongo raginio pinaugar i Musa am i Arun intor ra istana.

¹² Indagu Tuhan ri Musa, “Patutuyo' kalindu' muno ra tana' ru Misir koson maparatong ra gapu'. Matong gapu' koson mangakan ra ngaangai' tutuu' ondo' kalo nalupis ru rasam batu.”

¹³ Ginio ra kakato' ri Musa jujuga' nano, am pagangino' ru Tuhan angin sirangon mongoi ra pagun no buoi songorou am sorondom. Katawang ra susuab, nagibit angin no ra gapu'.

¹⁴ Ratong gapu' ra sampanon ra mangaayo saboi nakatikop ra titikop pagun. Kalo igondo' pakakito ulun ra kinasuang ru ginio, am kalupus ginio pana baal raginio kalo boo nasauk.

¹⁵ Natikop ra gapu' ralimbou ru tana' saboi makito ra maitom tana'. Nangakan gapu' ra ngaangai' ondo' kalo nalupis ru rasam batu, nakaaya' ngaangai' kawa' ra puun tataun. Titikop pagun ru Misir, kolondo' rondo' pana ondo' masansam soroi ra puun tataun kapoam tutuu'.

¹⁶ Pampiau mataki' raja' ri Musa am i Arun, indagu io, “Makatula' aku ra Tuhan i Aki Kapuuno' min am akau.

¹⁷ Ampuno' noyo tula kuno raino ti ayuk, am pakiasi' noyo ra Tuhan i Aki Kapuuno' mino koson mapainggalur Io intor raki' ra ukuman ondo' makalalaa' kaga' ti.”

¹⁸ Iruani' ri Musa raja' am pakiasi' ra Tuhan.

¹⁹ Ginio ra kulawo' ru Tuhan tampilon ru angin sirangon saboi nasauk ra angin kalasaan ondo' mapuor kaga'. Siniob gapu'-gapu' no ru angin no am inibit ra Raat Galaga, kolondo' boo sanginan pana ra gapu' no natatang ra titikop ru tana' ru Misir.

²⁰ Kaa' nangkinibit Tuhan no ra raja' nagulayun bambalingatan, am kalo mapaugar raja' no ra ulun ru Israil.

Kalandaman

²¹ Indagu Tuhan ri Musa, “Kakato' longon muno tampilon ra limbowon, am kalandaman ra molondom kaga' matikop ra titikop ru tana' ru Misir.”

²² Kakato' ri Musa longon nano tampilon ra limbowon, am kalandaman ondo' molondom kaga' matikop ra titikop ru tana' ru Misir buoi kataluan.

²³ Kalo makapangkito ulun ru Misir ra rondo' am bokon, am buoi ru ginio kolondo' sangulun pana ondo' mingkual intor ra baloi. Kaa' intok inayanan ru ulun ru Israil nagulayun matawang.

²⁴ Pampiau boo raja' ri Musa am indagu, “Paugaron kau am makasambayang ra Tuhan. Andu' am anak mino niayuk paayaan ramuyun. Kaa' kalo pagibiton kau ra domba, kambing am sapi' min.”

²⁵ Taam i Musa, “Amon ru koon raginio, musiti' okou no manampos ra bibiag tinambiag koson ra taak simbalui pataakon ra Tuhan, am taak simbalui koson mapabansuk ra guang ru Tuhan, i Aki Kapuuno' mai.

²⁶ Musiti' akai magibit ra ngaangai' bibiag tinambiag; sanginan pana kalo patatangon. Musiti' mai pilion bibiag tinambiag ondo' pataakon ra Tuhan i Aki Kapuuno' mai. Makasaboi akai ra giu', bagu mai mapandayan ati bibiag tinambiag ondo' pataakon.”

²⁷ Nangkinibit Tuhan ra raja' bambalingatan saboi kalo mapaugar ra ulun ru Israil.

²⁸ Indagu raja' ri Musa, “Ugar noyo intor ragiti! Pai' noyo tuum raki'! Amon ru tumuum kou poyo raki', matoi kou.”

²⁹ “Koson ra rinagu muno raja',” taam ri Musa, “kalo boo tuumon tokou.”