JUNUS 4 - Tanou Moonsoi Timugon

Sangit ri Junus am pangampunan ri Aki Kapuuno'

¹ Totopot kalo masaga' i Junus ra baal raginio, am io pana siminangit.

² Io pana makiasi' boo, “Iou Tuhan, paat ra aku kalo poyo minugar intor ra baloi kuli ragili, sala' ka kia rinagu ku noyo ra Okou maaru' mambaal ragitio? Ginio noyo sabap ra gumogot aku magiru' mongoi ra Sipanyol! Nakapandai aku no ra Okou i Aki Kapuuno' ondo' motogom kaga' am makaasi', masalok moorot guang, molomoi, am masalok tumampos koson mangulau ra guang saboi kalo mamparatu' ra ukuman.

³ Raino, iou Tuhan, polosoo' noyo aku matoi ayuk, sabap ra moonsoi poyo matoi aku ka maayag.”

⁴ Taam Tuhan, “Kolondo' sasaban muno koson sumangit.”

⁵ Kopongo raginio minongoi i Junus ra tampilon sirangon ru bandar no, am panturung ra giu' no. Nangkalukub io, am sindung io ra giu', liliwa' maginaa atan masauk ra bandar Niniwi.

⁶ Paat raginio Tuhan i Aki Kapuuno' nampatuu' ra rondo' tutuu' koson masindungan i Junus saboi maansayan io. Masaga' toojo i Junus ra tutuu' no.

⁷ Kaa' suabon no maar matawang, ralalom susuban ri Aki Kapuuno' rondo' ulor sinusub no minongoi pangakan ra tutuu' i saboi nolonot.

⁸ Pakasirang mato ru orou, namparatong i Aki Kapuuno' ra angin malasu' ondo' siminiob intor ra sirangon. Maar malausan i Junus sabap orou ondo' mapangit toojo koson ayuk monolob ra ulu nano. Ginio ra malawo boo guang nano am gumogot matoi, kono, “Moonsoi poyo matoi aku ka maayag!”

⁹ Kaa' indagu i Aki Kapuuno' riso, “Kalo matanda' ra okou sumangit ra tutuu' no!” Taam i Junus, “Kua ra kalo? Topot matanda' ra aku sumangit kaga' suku' matoi.”

¹⁰ Tuhan pana mindagu boo riso, “Tutuu' ti tumuu' sorondom ayuk, am kalo boo tumuu' ra orou sumunu' no; okou totopot kalo nampatuu' riso kapoam nagalung riso. Kabalu' pana raginio, makaasi' kou ra tutuu' ti.

¹¹ Maaru' Aku makaasi' poyo ra Niniwi, bandar ondo' maayo no sabap ra giu' no mokoondo' nasailan ra 120,000 ngaulun lalaing ondo' kalo mapandai mampasuai ati moonsoi am ati malaat, am niayuk masuang kaga' bibiag.”