JUNUS 3 - Tanou Moonsoi Timugon

Gumagaya' i Junus ra Tuhan

¹ Mindagu Tuhan ri Junus ra kainduo.

² Indagu Tuhan, “Ongoi no ra Niniwi, bandar maayo no. Balai' mamagun ru bandar no ra tanou ondo' taakin Ku rirun ti.”

³ Ginio ra i Junus giminagaya' ra Tuhan am ongoi ra Niniwi. Niniwi rondo' bandar ondo' maayo kaga', suku' ra kataluan amon mantana' mongoi ra giu'.

⁴ Siminubol i Junus ra bandar no, am kalupus nonsongorou minugar, tumalimpuun io mampatanou ra tanou ti, “Apat ngoopor ngoorou poyo, pusoon noyo Niniwi!”

⁵ Mamagun ru Niniwi mangintopot ra tanou ri Aki Kapuuno' no. Ngaangai' mamagun mamatas koson mampali, am ngaangai' ulun, ondo' langkaya' am poyo musikin, nambayang ra konoon karung koson mampakito ilo ra pansagulian guang ra tula nilo.

⁶ Pokorongog raja' Niniwi ra tanou no, tuun io intor ra panturungan nano. Inalus no sukub nano am bayango' no konoon karung, am turung io ra rasawat ru kaau.

⁷ Raja' pana nampatanou niayuk ra susuban ragitio ra ngaangai' mamagun ru bandar Niniwi, “Gitio noyo ragu pamatasan intor ra raja' am ngaangai' menteri: Ngaangai' ulun, sapi', domba, am bibiag tinambiag ra bokon inggalarin mangakan am manginum.

⁸ Ulun am tinambiag musiti' mambayang ra konoon karung. Moonong ulun musiti' totopot makiasi' ri Aki Kapuuno', am lumonggo' mambaal ra kalaatan am binaal nano ondo' napanu' ra tula.

⁹ Maaru' lair kulawon ri Aki Kapuuno' ginuang Nano am kalo boo sumangit, am itakau pana kalo mapuso!”

¹⁰ Nakito ri Aki Kapuuno' binaal nilo; nakito No ra ilo kalo boo nambaal ra malaat. Ginio ra nangulau Io ra guang Nano am kalo boo sinugut ukuman ondo' inatang Nano risilo.