JOSUA 7 - Tanou Moonsoi Timugon

Tula ri Akgan

¹ Ragu ru Tuhan ondo' manginggalar ra ulun ru Israil mangalap ra atan pana intor ra bandar Jiriko ondo' sotopot no pusoon, kalo ginagaya'. Sangulun ondo' makainggalan ri Akgan anak ri Karmi minanggal ra susuban no. Ginio ra siminangit Tuhan ra ulun ru Israil. (Akgan anak ri Karmi am akupu ri Jabdi; intor io ra bansa' ru Jirag, santayaran intor ra bansa' ru Jiuda.)

² Nanusub i Josua ra kukula' ngaulun intor ra Jiriko mongoi ra Ai, rondo' bandar tampilon ra sirangon ru Bitil, maar Bit-Awin. Nanusub i Josua risilo lumiput ra pagun no. Kabaal nilo ginio,

³ nanaak ilo ri Josua ra pambalaan, “Kalo pana ngaangai' ulun mongoi bulunsar ra bandar no. Atari' ruo kapoam talu ngaribu ngaulun ayuk. Kalo pana ngaangai' pulalai ru saujor mongoi ra giu' koson mangayou sabap ra bandar Ai sala' ka bandar ondo' maayo.”

⁴ Ginio ra olo'-olo' talu ngaribu ngaulun ru Israil ayuk mamulunsar ra bandar no, kaa' binulunsar ilo paluguto'.

⁵ Nangilou ulun Ai risilo intor ra kulobon garabang ru bandar no saboi ra intok ru kuari, am namatoi ra olo'-olo' talu ngoopor am onom ngaulun ru Israil giu' ra pipilon ru bulur. Ginio ra magalabo am mangalaa' ulun ru Israil.

⁶ Rinilak ri Josua am tingganai-tingganai ru Israil bayang sabap ra mangiluk guang, am kubu ra saang ru Kaban Nabantuan ru Tuhan saboi palunggai'. Pinatauk nilo niayuk kaau ra rasawat ru ulu koson mapakito ra kangilukan nilo.

⁷ Indagu i Josua, “Iou Tuhan Raja', kua kia pagibit Kou ramon lumaup ra Sungoi Jordan? Masaga' Kou kia mapataak ramon ra ulun ru Amori maa' raginio pusoon nilo? Kua pai' Mu polosoon akai mayan ayuk giu' ra sandaup ru sungoi no?

⁸ Iou Tuhan, atan kia ondo' maalap kuno maragu raino, malupus ulun ru Israil binulunsar paluguto' ru pantula'?

⁹ Ulun ru Kanaan am ngaangai' ulun ra pagun ti mokorongog ra baal raginio. Inawangan nilo akai am namatoi ramon ngai'! Atan kia boo ondo' baalon Muno koson magalung ra kaurumatan Muno?”

¹⁰ Indagu Tuhan ri Josua, “Bigor noyo! Kua kia kubu kou koson raginio?

¹¹ Makatula noyo ulun ru Israil! Liminungkang ilo ra nabantuan ondo' pinaguutan Kuno risilo. Nangalap ilo ra santayaran kuliamos ondo' pusoon sotopot no. Nantakou ilo ra kuliamos-kuliamos am pagabau poyo. Binulian nilo pabayaa' ra kuliamos nilo galama'.

¹² Ginio ra kalo makagula' ulun ru Israil ra pantula'. Liminugut ilo kalalaat sabap ra ilo galama' ukumin ra pusoon. Kalo boo mabaya' Aku risilo ondo' ayuk am mamuso ilo ra kuliamos ondo' sotopot no kalo buliin nilo.

¹³ Sukal no! Kapasawo' noyo ulun raginio am susubo' ilo tumampos muma' Raki'. Susubo' ilo tumampos muma' Raki' ra susuab no sabap Aku Tuhan am i Aki Kapuuno' ru ulun ru Israil mindagu, ‘Akau ulun ru Israil, soroi ramuyun santayaran ra kuliamos ondo' sotopot no pusoon sumugut ra susuban Kuno. Kalo makapangala kau ra pantula' ra kalo poyo mapatiran min kuliamos-kuliamos raginio.’

¹⁴ Ginio ra balai' ilo ra susuab no ra iosusuab paumaan ilo Raki', bansa' am bansa'. Bansa' ra tuluon Kuno mujak, bansa' am bansa'. Bansa' ra tuluon Kuno mujak, sasambaloi am sasambaloi. Sasambaloi ra tuluon Kuno mujak, sangulun am sangulun.

¹⁵ Ulun ondo' mapandayan nambuli ra kuliamos ra inggalarin no solobon, pabayaan ra sasambaloi nano am ngaangai' rapu' nano sabap nanauyu' io ra Israil am minanggal ra nabantuan Kuno.”

¹⁶ Suabon no, i Josua kiminarat mataki' am paumaa' no ulun ru Israil ra Tuhan, bansa' am bansa', am bansa' ru Jiuda tinulu'.

¹⁷ Paumaa' ri Josua bansa' ru Jiuda, bansa' am bansa', bansa' ru Jirag tinulu'. Paumaa' no boo bansa' Jirag, sasambaloi am sasambaloi, am sasambaloi ri Jabdi tinulu'.

¹⁸ Paumaa' boo ri Josua sasambaloi ri Jabdi, am i Akgan tinulu'. I Akgan anak ri Karmi am akupu ri Jabdi.

¹⁹ Indagu i Josua riso, “Okou anak kuno, raguo' noyo ra motopot ra saang ru Tuhan i Aki Kapuuno' ru Israil am pangiou noyo. Raino pambala' raki' ra atan binaal muno. Pai' bunio' baal raginio intor raki'.”

²⁰ Taam i Akgan, “Sotopot no natulaan aku ra Tuhan i Aki Kapuuno' ru Israil. Gitio noyo binaal kuli.

²¹ Kakito ku rondo' sukub ondo' moonsoi binaal ru Babilonia, pirok ra bagat no maar ruo ngakilogram, am santaun mas ondo' bagat no satanga kilogram intor ra ngaangai' kuliamos ginaau no. Malaai aku kaga' ra kuliamos raginio saboi inalap ku. Kuliamos raginio natanom ra tana' giu' ralalom ru kim kuno; pirok no nakaralalom toojo.”

²² I Josua pana nanusub ra kukula' ngaulun nasimbul mongoi ra kim no. Kapandayi' nilo ra kuliamos inulas no totopot natanom ra giu' no, am pirok nakaralalom toojo.

²³ Inibit nilo kuliamos-kuliamos raginio miningkual intor ra kim, am ibito' ginilo ri Josua am ngaangai' ulun ru Israil. Pabantaa' nilo kuliamos raginio giu' ra saang ru Tuhan.

²⁴ I Josua am ngaangai' ulun ru Israil namparakop ri Akgan am nangalap ra pirok, sukub am mas no, rinakop nilo niayuk anak-anak nano ra ungkuyon am ruandu' am nangalap ra sapi', kaladai, domba, kim am ngaangai' rapu' nano am ngaangai' no inibit mongoi ra Limayak Kapaganan.

²⁵ Indagu boo i Josua, “Ilai' noyo kapaganan ondo' pinaratong muno ramon! Raino Tuhan pana mamparatong ra kapaganan rirun!” Ngaangai' ulun ru Israil pana nomobol ri Akgan saboi minatoi. Nomobol ilo niayuk am nonolob ra sasambaloi nano am ngaangai' rapu' nano.

²⁶ Pumpuni' nilo boo ra batu saboi nasauk rondo' pumpun ondo' maayo. Pumpun ru batu no lakat poyo soroi saboi ra orou raiti'. Ginio sabap ra intok no lakat poyo ininggalanan ra Limayak Kapaganan. Kopongo raginio kalo boo siminangit Tuhan.