JOSUA 4 - Tanou Moonsoi Timugon

Mopor am ruo batu pangkaraan tinirong

¹ Kopongo nakalaup ngaangai' bansa' no ra Sungoi Jordan, indagu Tuhan ri Josua,

² “Pilio' mopor am ruo ngaulun, sangulun intor ra moonong bansa',

³ am susubo' ilo mangalap ra mopor am ruo batu intor ra tatanga' ru sungoi, tuma' toojo ru binigaran ru imam-imam no. Susubo' ilo mangkayang ra batu-batu no am mapabanta' raginio giu' ra intok min mangkim ra rondom raiti'.”

⁴ I Josua pana nampiau ra mopor am ruo ngaulun pinili' nano

⁵ am indagu, “Tuun ra sungoi giu' ra saang ru Kaban Nabantuan ru Tuhan i Aki Kapuuno' min. Sigagama' musiti' mangalap rondo' batu, rondo' batu tayar ru moonong bansa' ru Israil. Saani' batu no.

⁶ Batu-batu no mampakara' ra ulun ru Israil ra binaal ru Tuhan. Paat ra orou matong, paat anak-anak mino mangkuot ra arati' ru batu-batu no,

⁷ balain ilo ra Sungoi Jordan minuog tumilis paat Kaban Nabantuan ru Tuhan sinaanan lumaup ra sungoi no. Batu-batu no magail mampakara' ra ulun ru Israil intor ra kasaukan ondo' nasauk ragiti.”

⁸ Sinugut nilo susuban ri Josua. Koson ra susuban ru Tuhan ri Josua, nangalap ilo mopor am ruo batu intor ra tatanga' ru Sungoi Jordan, rondo' batu tayar ru moonong bansa' ru Israil. Nansaan ilo ra batu-batu no mongoi ra intok pangkiman am pinabanta' ngaangai' no ra giu'.

⁹ Pinatampas niayuk ri Josua mopor am ruo batu giu' ra tatanga' ru Sungoi Jordan, intok binigaran ru imam-imam no. (Soroi poyo batu-batu ra giu' no saboi raino).

¹⁰ Imam-imam minigor ra tatanga' ru Sungoi Jordan saboi ngaangai' ondo' nanusuban ru Tuhan ri Josua nabaal ru ulun raginio. Ginio noyo ondo' nanusuban ri Musa ri Josua. Liminaup ulun ru Israil ra sungoi ra mataki'

¹¹ am paat ra ilo ngaangai' nakasaboi ra sandaup, imam-imam ondo' nansaan ra Kaban Nabantuan ru Tuhan minugar ra saang nilo.

¹² Ngaangai' ulun intor ra bansa' ru Rubin, Gad am sampiruo bansa' ru Manasi liminaup pagulu intor ra ulun ru Israil ra bokon, am nakatampos ilo mangayou koson nanusuban ri Musa.

¹³ Ngaangai' no mokoondo' olo'-olo' 40,000 ngaulun ungkuyon ondo' nakatampos mangayou. Giu' ra saang ru Tuhan, liminaup ilo mongoi ra tana' marata' magana' maar ra bandar Jiriko.

¹⁴ Binaal ru Tuhan paat ra orou raginio nambaal ra ulun ru Israil mangurumat ri Josua koson ulun maatang. Nangurumat ilo riso buoi ru bayag nano koson ilo nangurumat ri Musa ragili.

¹⁵ Tuhan pana nanusub boo ri Josua

¹⁶ manusub ra imam-imam ondo' nansaan ra Kaban Nabantuan mingkual intor ra Sungoi Jordan.

¹⁷ Ginagaya' ri Josua susuban ru Tuhan.

¹⁸ Pakasaboi imam-imam no ra tobo ru sungoi, timinilis poyo timug ru sungoi am nampaliur koson ra talimpuun.

¹⁹ Ulun ru Israil liminaup ra sungoi no paat ra orou Koopor sila' kasaa', am nangkim ilo giu' ra Gilgal, tampilon ra sirangon ru bandar Jiriko.

²⁰ Giu' no pinatampas ri Josua mopor am ruo batu ondo' inalap intor ra Sungoi Jordan.

²¹ Indagu io ra ulun ru Israil, “Paat ra orou matong, paat anak akupu min mangkuot ra arati' ru batu rati,

²² balain ilo ra ulun ru Israil liminaup ra Sungoi Jordan ra lonor ondo' mapua'.

²³ Balain ilo ra Tuhan i Aki Kapuuno' min napakapua' ra sungoi no tayar min saboi liminaup kau raginio, koson ra Io napakapua' ra Raat Galaga tayar mai saboi liminaup akai raginio.

²⁴ Ra sauk raginio, ngaangai' ulun ru tana' makapandai ra mapara' gayo ru kuasa' ru Tuhan. Ginio ra mangurumat kau ra Tuhan i Aki Kapuuno' min ra sabuoi-buoi no.”