JOSUA 3 - Tanou Moonsoi TimugonUlun ru Israil liminaup ra Sungoi Jordan 1 Tawang ra suabon no, kiminarat mataki' i Josua am ngaangai' ulun ru Israil. Nangiruan ilo ra pangkiman giu' ra Sitim, am ongoi ra Sungoi Jordan. Nangkim ilo ra giu' no liliwa' naginaa koson lumaup ra sungoi no. 2 Kopongo talu ngoorou, liminiput tingganai nilo ra pangkiman 3 am indagu ra ulun ru Israil, “Paat ra akau makakito ra imam-imam magibit ra Kaban Nabantuan ru Tuhan i Aki Kapuuno' min, ugar noyo am baya' noyo risilo. 4 Kalo igondo' kau ongoi ragiti, ginio ra maningganai ilo ra pangkiralanan min. Kaa' pai' inggaar ra Kaban Nabantuan. Ugar noyo olo'-olo' sakilomito giu' ra tinaulian ru Kaban Nabantuan.” 5 Indagu i Josua ra ulun raginio, “Impasawi' min inan mino sabap ra susuab no mambaal Tuhan ra kaimuagan ra tatanga' min.” 6 I Josua pana nanusub ra imam-imam nangkayang ra Kaban Nabantuan am minugar siminigulu ra ulun ru Israil. Imam-imam no pana nambaal koson raginio. 7 Indagu Tuhan ri Josua, “Atan ondo' baalon Kuno ra orou raiti' mangkinibit ra ulun ru Israil mangurumat toojo Raki'. Makaliman ilo ra mabaya' Aku rirun koson Aku nabaya' ri Musa. 8 Susubo' imam-imam ondo' nagibit ra Kaban Nabantuan no maa' raginio tumapung ra sungoi ra ilo makasaboi ayuk ra giu' no, am migor maar ra kiing no.” 9 I Josua pana mindagu ra ulun raginio, “Ibok, rongogo' ragu ru Tuhan i Aki Kapuuno' min. 10 Paat ra akau jumalai ra maagu no, maaru' pagiruon No ulun ru Kanaan, Git, Giwi, Piris, Girgasi, Amori am Jibusi. Makapandai kau ra i Aki Kapuuno' ondo' maayag soroi ra tatanga' min 11 paat Kaban Nabantuan ru Tuhan ru limbowon am tana' ti, saanin lumaup ra Sungoi Jordan, sumigulu ramuyun. 12 Raino pilio' mopor am ruo ngaulun, sangulun intor ra moonong bansa' ru Israil. 13 Paat ra imam-imam ondo' nansaan ra Kaban Nabantuan ru Tuhan mapatapung ra kalayam ralalom timug, muog Sungoi Jordan ra tumilis; timug ondo' tumilis intor ra ralayo moombon giu' ra rondo' intok.” 14-15 Paat raginio mangkumos am koson ra kaindalaman, nampaliur Sungoi Jordan. Paat ra ulun ru Israil nangiruan ra pangkiman koson lumaup ra Sungoi Jordan, imam-imam ondo' nansaan ra Kaban Nabantuan minugar ra saang nilo. Makatapung ayuk kalayam ru imam-imam no ralalom ru timug, 16 muog sungoi no tumilis. Maalur giu' ra ralayo ru sungoi, natimung timug no giu' ra Adam, rondo' bandar maar ra Sartan. Timug ondo' tumilis mongoi ra Raat Matoi naputat toojo. Ginio ra nakalaup ulun ru Israil ra sungoi maar ra bandar Jiriko. 17 Buoi ru ulun ru Israil mugar ra lonor ru sungoi ondo' mapua', imam-imam ondo' nansaan ra Kaban Nabantuan migor ra tatanga' ru lonor ru sungoi ondo' mapua' no, saboi ngaangai' ulun makasaboi ra sandaup. |
Hakcipta © Bible Society of Malaysia, 2013.
Bible Society of Malaysia