JOSUA 24 - Tanou Moonsoi Timugon

Minindagu i Josua ra ulun ru Israil giu' ra Sikgim

¹ Tinimung ri Josua ngaangai' bansa' ru Israil giu' ra Sikgim. Nampiau io ra ngaangai' tuu' lair, ngaangai' tingganai, ngaangai' akim am ngaangai' pagawai ru Israil, am timung ilo giu' ra saang ri Aki Kapuuno'.

² Indagu i Josua risilo ngaangai', “Rongogo' ragu ru Tuhan i Aki Kapuuno' ru Israil, ‘Galing i kinamatuaan min minayan giu' ra sandaup ru Sungoi Iprat am sinamba nilo dewa-dewa. Sangulun intor risilo iono i Tirag, ama' ri Abragam am i Nagor.

³ Kopongo raginio nagibit Aku ri Abragam kinamatuaan mino, intor ra tana' giu' ra sandaup ru Sungoi Iprat am naningganai riso liminiput ra titikop ra tana' ru Kanaan. Nanaak Aku riso ra masuang papag. Nanaak Aku riso ri Isak,

⁴ am ri Isak, nanaak Aku ruo ngaulun anak, iono i Jakub am i Isau. Nanaak Aku ri Isau ra kabuluran Idom koson ra longgom nano tana' raginio, kaa' i Jakub, iono kinamatuaan min am anak-anak nano minongoi ra Misir.

⁵ Aku pana nanusub ri Musa am niayuk i Arun, am naparatong Aku ra kalaatan maayo ra Misir, kaa' naningganai Aku ramuyun miningkual intor ra intok raginio.

⁶ Nagibit Aku ra kinamatuaan min miningkual intor ra Misir. Nangilou ulun ru Misir risilo ra kurita' kuda am saujor nangkuda. Kaa' paat kinamatuaan min nakasaboi ra Raat Galaga,

⁷ nampiau ilo Raki' makiindangan; naparatong Aku ra kalandaman ra lolot nilo am ulun ru Misir. Lininjob Ku ulun ru Misir ra timug ru raat saboi ilo nongolosor. Nakapandai kau ra atan binaal Kuno ra Misir. Nabuoi kau kaga' minayan ra tana' kaagisan.

⁸ Aku pana nagibit boo ramuyun mongoi ra tana' ru ulun ru Amori ondo' minayan giu' ra tampilon sirangon ru Sungoi Jordan. Nangayou ilo ramuyun, kaa' nanaak Aku ramuyun ra kamanangan intor risilo. Ginaau min tana' nilo am namuso Aku risilo paat akau namulunsar risilo.

⁹ Kopongo raginio, manguasa' ru Moab, Raja' Balak anak ri Jipor, nangayou ra Israil. Nanusub Raja' Balak ra ulun minongoi ri Biliam anak ri Bior am nangitaak riso magulas ramuyun.

¹⁰ Kaa' kalo nangiou Aku ra kitaak ri Biliam. Kaa' nambarakat io ramuyun; namayag Aku ramuyun intor ra Raja' Balak.

¹¹ Liminaup kau ra Sungoi Jordan am nakasaboi giu' ra bandar Jiriko. Mamagun ru Jiriko nangayou ramuyun; koson niayuk ra ulun ru Amori, Piris, Kanaan, Git, Girgasi, Giwi am Jibusi. Kaa' nanaak Aku ramuyun ra kamanangan risilo ngai'.

¹² Paat ra akau namulunsar risilo, jinajou Ku ilo koson napagiru' ra ruo ngaulun raja' ru Amori no. Ilang am panah mino kalo napamanang ramuyun.

¹³ Nanaak Aku ramuyun ra pagun ondo' kalo nakandoi min am bandar-bandar ondo' kalo tinirong min. Raino minayan kau ra pagun no am mangakan ra kawa' ru anggur am jaitun intor ra puun-puun ondo' kalo tinanom min.’ ”

¹⁴ “Ginio nai ra,” kon ri Josua, “urumato' noyo Tuhan am mangandoi ayuk Riso ra totopot am gumagaya'. Patiri' noyo tuhan-tuhan ra bokon ondo' sinamba ru kinamatuaan min giu' ra Misopotamia am giu' ra Misir ra galing i. Mangandoi ayuk ra Tuhan.

¹⁵ Amon ru kalo masaga' kau mangandoi ayuk Riso, aruo' noyo raino ri osoi akau mangandoi ayuk, ra tuhan-tuhan ra bokon ondo' sinamba ru kinamatuaan min giu' ra Misopotamia, kapoam ra tuhan-tuhan ru ulun ru Amori giu' ra pagun ondo' inayanan min raino. Kaa' ra aku am sasambaloi kuno, masaga' akai mangandoi ayuk ra Tuhan.”

¹⁶ Taam ulun ru Israil, “Kalo noyo toojo mangiruan akai ra Tuhan koson mangandoi ayuk ra tuhan-tuhan ra bokon!

¹⁷ Tuhan i Aki Kapuuno' takau napalabus noyo ra kinamatuaan takau am itakau galama' intor ra pangulipanan giu' ra Misir, am nakatainu takau noyo ra kaimuagan-kaimuagan ondo' binaal Nano. Nangampin Io ritakau ralalom ngaangai' pangkiralanan takau nansail ra pagun-pagun ru bansa' ra bokon.

¹⁸ Paat itakau namulunsar ra pagun ragitio, Tuhan napagiru' ra ngaangai' ulun ru Amori ondo' minayan ragiti. Ginio ra, akai niayuk mangandoi ayuk ra Tuhan; Io noyo i Aki Kapuuno' takau.”

¹⁹ I Josua pana mindagu ra ulun raginio, “Kaa' maaru' lair kalo mokoorot kau mangandoi ayuk ra Tuhan. Io i Aki Kapuuno' ondo' matulai, am kalo mangampun Io ra tula min. Kalo masaga' Io makasalanan.

²⁰ Amon ru mangiruan kau Riso am mangandoi ayuk ra tuhan-tuhan ru bansa' ru bokon, manggal Io ramuyun am mangukum ramuyun. Mamuso Io ramuyun, kabalu' pana ragili moonsoi Io ramuyun.”

²¹ Taam ulun raginio, “Kalo. Magulayun akai mangandoi ayuk ra Tuhan.”

²² Indagu i Josua risilo, “Akau masauk ra sasi' min galama' ra akau nampili' ra mangandoi ayuk ra Tuhan.” Taam ilo, “Iou. Masauk akai ra sasi'.”

²³ Indagu poyo i Josua, “Amon ru ginio noyo, patiri' noyo tuhan-tuhan ru bansa' ra bokon ondo' soroi ramuyun am bantuo' noyo ra gumagaya' ra Tuhan i Aki Kapuuno' ru Israil.”

²⁴ Indagu boo ulun-ulun raginio ri Josua, “Mangandoi akai ayuk ra Tuhan i Aki Kapuuno' takau. Gagayaan mai susuban Nano.”

²⁵ Paat orou raginio niayuk, nambaal i Josua rondo' nabantuan koson ulun raginio giu' ra Sikgim. Nanaak io risilo ra ukum am aturan ondo' musiti' gagayaan.

²⁶ I Josua nanulis ra susuban-susuban no ralalom ru Kitab ru Ukum ri Aki Kapuuno'. I Josua pana nangalap boo ra rondo' batu ondo' maayo am pinotolorog no ragana' ru puun oak giu' ra intok ondo' patimpokon ra Tuhan.

²⁷ Indagu i Josua ra ngaangai' ulun no, “Batu ti sasi' takau. Batu ti nokorongog noyo ra ngaangai' ragu ru Tuhan ritakau. Ginio ra nasauk batu ti ra sasi' min koson mampakara' ramuyun maa' raginio kalo manggal ri Aki Kapuuno' min.”

²⁸ Kopongo raginio nanusub i Josua ra ulun raginio muli', am sigagama' minuli' giu' ra wilayah galama'.

I Josua am i Iliajar minatoi

²⁹ Kopongo raginio i Josua anak ri Nun, ulipon ru Tuhan no minatoi; umur nano 110 ngambilor.

³⁰ Linobong i Josua giu' ra tana' nano giu' ra Timnat-Sira, giu' ra kabuluran Ipraim, giu' ra tampilon ralayo ru Gunung Gaas.

³¹ Buoi i Josua naayag, ulun ru Israil nangandoi ayuk ra Tuhan. Kopongo i Josua minatoi am buoi ru tingganai-tingganai naayag ondo' nakakito ra ngaangai' binaal ru Tuhan ra ulun ru Israil, nagulayun ulun raginio nangandoi ayuk ra Tuhan.

³² Baangkai ri Jusup ondo' inibit ru ulun ru Israil intor ra Misir, linobong giu' ra Sikgim, giu' ra tana' ondo' binali ri Jakub intor ra anak-anak ri Gimor, ama' ri Sikgim, ra logo no maatus ngampila' ruit pirok. Tana' no pinatungkus ra papag ri Jusup.

³³ I Iliajar anak ri Arun minatoi, am linobong giu' ra Gibia, bandar giu' ra kabuluran Ipraim ondo' pinataak noyo ra anak nano, i Pinigas, anak ri Iliajar.