JOSUA 22 - Tanou Moonsoi Timugon

Nanusub i Josua ra bansa'-bansa' ru sirangon rumuli' ra wilayah nilo

¹ I Josua pana nanimung ra ulun intor ra bansa' ru Rubin, Gad am Manasi Sirangon.

² Indagu io risilo, “Binaal min noyo ngaangai' nanusuban ri Musa, ulipon ru Tuhan no am ginagaya' min noyo ngaangai' susuban kuno.

³ Buoi ti kalo nompoloso kau ra gino ngai' ulun ru Israil tumula' misangulun. Pinagilayan min giminagaya' ra susuban ru Tuhan i Aki Kapuuno' min.

⁴ Raino, koson ra binantu' Nano, Tuhan i Aki Kapuuno' min nanaak noyo ramuyun ra kamiaan ra gino ngai' min ulun ru Israil. Ginio ra, ruli' noyo ra pagun longgom muno, tana' tampilon ra sirangon ru Sungoi Jordan ondo' tinaakan ri Musa, ulipon ru Tuhan ramuyun.

⁵ Tutuno' noyo ra akau giminagaya' ra ukum ondo' tinaakan ri Musa: Tagami' noyo Tuhan i Aki Kapuuno' min, baalo' noyo kasagaan Nano, gagayaa' parinta Nano, gagaya' no Riso, am pangandoi ayuk Riso ra sototopot ru guang am salibuor.”

^6-8 I Josua nambarakat risilo am napaugar risilo ra ragu ragitio, “Raino langkaya' kau am minuli' kau nagibit ra masuang bibiag tinambiag, pirok, mas, gangsa', basi' am bayang. Tatayaro' noyo kuliamos ginaau ondo' inalap min intor ra pantula', ra gino ngai' min.” Kopongo raginio minuli' ilo. Tinaakan ri Musa tana' giu' ra tampilon sirangon ru Sungoi Jordan ra sampiruo intor ra bansa' ru Manasi, am tinaakan ri Josua tana' tampilon ra kalasaan ru Sungoi Jordan ra sampiruo poyo bansa' ru Manasi, nabaya' ra bansa'-bansa' ra bokon.

⁹ Ginio ra ulun intor ra bansa' ru Rubin, Gad am Manasi Sirangon minuli'. Iniruanan nilo ulun ru Israil ra bokon giu' ra Silo, giu' ra tana' ru Kanaan, am minongoi ilo ra Giliad, giu' ra tana' longgom nilo galama', ondo' inapu nilo sumugut ra susuban ru Tuhan ondo' pinabala' galing ri Musa.

Altar giu' ra igig ru Sungoi Jordan

¹⁰ Paat ra bansa' ru Rubin, Gad am Manasi Sirangon nakasaboi giu' ra Gililot, paat ra lakat poyo giu' ra tampilon kalasaan ru Sungoi Jordan, nambaal ilo rondo' altar ondo' maayo am moonsoi kaga' giu' ra igig ru sungoi no.

¹¹ Ulun ru Israil ra bokon binalaan ra baal raginio, “Ulun intor ra bansa' ru Rubin, Gad am Manasi Sirangon nambaal noyo ra altar giu' ra Gililot maar ra Sungoi Jordan, tampilon ra wilayah takau!”

¹² Pokorongog ulun ru Israil ra baal raginio, timung ilo ngaangai' giu' ra Silo koson mangayou ra bansa'-bansa' ru Israil intor ra sirangon ru Sungoi Jordan.

¹³ Ulun ru Israil pana nanusub ri Pinigas anak ru Imam Iliajar mongoi ra bansa' ru Rubin, Gad am Manasi Sirangon giu' ra libung Giliad.

¹⁴ Mopor ngaulun tingganai minongoi nabaya' ri Pinigas, sangulun intor ra moonong bansa' giu' ra tampilon kalasaan ru Sungoi Jordan; moonong ulun no iono tingganai ru sasambaloi ralalom ru bansa' ru sigagama'.

¹⁵ Nakasaboi ilo ra libung Giliad am minuma' ra bansa' ru Rubin, Gad am Manasi Sirangon.

¹⁶ Tayar ra bala ru ngaangai' ulun ru Tuhan, indagu ilo, “Kua kia pambaal kau ra baal ondo' malaat ti ri Aki Kapuuno' ru ulun ru Israil? Binaal altar raginio, giminuor kau ra Tuhan! Kalo boo maya' kau Riso!

¹⁷ Karaa' noyo tula takau giu' ra Pior, paat ra Tuhan nangukum ra ulun Nano ra maruol tumapik. Itakau lakat poyo naimbolo' ra kinibit ru tula raginio. Kalo poyo kia sama' tula raginio?

¹⁸ Masaga' kau kia mangiruan ra Tuhan raino? Amon ru orou raiti' gumuor kau Riso, susuab no sumangit Io ra moonong ulun ru Israil.

¹⁹ Ginio ra amon ru majamol wilayah min am kalo maaya' saukon ra intok sambayangan ra Tuhan, ratong noyo ra pagun ru Tuhan, intok napasarayan ra Kim ru Tuhan. Pakitaak noyo ra tana' intor ramon, kaa' pai' guor ra Tuhan kapoam akai ra nambaal rondo' poyo altar suai ra altar ru Tuhan i Aki Kapuuno' takau ondo' pinatirong noyo.

²⁰ Karaa' noyo atan koson i Akgan anak ri Jirag minanggal ra susuban pasal ra kuliamos ondo' musiti' pusoon. Kinibit no, ngaangai' ulun ru Israil inukum; sala' ka ayuk i Akgan sangulun ondo' minatoi sabap ra tula nali.”

²¹ Taam ulun intor ra bansa' ru Rubin, Gad am Manasi Sirangon,

²² “Ondo' Maayo Kaga' Kuasa' iono i Aki Kapuuno'! Io noyo Tuhan! Ondo' Maayo Kaga' Kuasa' iono i Aki Kapuuno'! Io noyo Tuhan! Nakapandai Io kua pambaal akai koson raginio am masaga' akai ra akau makapandai niayuk! Amon ru gumuor akai ra Tuhan am kalo mangintopot Riso, potoyo' akai raino niayuk!

²³ Amon ru kalo giminagaya' akai ra Tuhan am nambaal ra altar mai galama' koson intok mapataak ra taak simbalui koson mapabansuk ra guang ru Tuhan, kapoam koson mampataak ra taak simbalui koson paringkuanangan, kapoam taak simbalui koson makibarakat ra Tuhan polosoo' noyo Tuhan galama' mangukum ramon.

²⁴ Kuayan mai sala' ka koson raginio! Binaal mai altar ti sabap maimamang akai maaru' paat orou tauli papag mino mindagu ra papag maino, ‘Kolondo' atan pabukatan min ra Tuhan i Aki Kapuuno' ru Israil!

²⁵ Sinauk noyo ru Tuhan Sungoi Jordan ti ra balitan ru akai am akau intor ra bansa' ru Rubin am Gad. Kolondo' atan pabukatan min ra Tuhan.’ Koson raginio mangkinibit papag mino ra papag maino lumonggo' sumambayang ra Tuhan.

²⁶ Ginio ra binaal mai altar ti sala' ka koson ra intok monsolob ra taak simbalui kapoam mapataak ra taak,

²⁷ kaa' koson ra tatandu' ra karuruo bala takau am papag takau, ra sotopot no sumambayang takau ra Tuhan giu' ra Kim Nano am magibit ra taak simbalui koson mapabansuk ra guang ru Tuhan, taak-taak am taak simbalui koson makibarakat ra Tuhan. Koson raginio kalo makaindagu papag mino ra papag maino kolondo' atan pabukatan ra Tuhan.

²⁸ Kuayan mai koson ragitio: amon masauk baal raginio, makaindagu papag mai ra, ‘Ilai' noyo, kinamatuaan mai nambaal rondo' altar koson ra altar ru Tuhan. Altar no sala' ka panalaban ra taak simbalui kapoam mapataak ra taak, kaa' koson tatandu' tayar ru karuo-ruo bala takau.’

²⁹ Totopot kalo giminuor akai ra Tuhan kapoam liminonggo' mangandoi Riso, am nambaal ra altar koson ra intok mapataak ra taak simbalui koson mapabansuk ra guang ru Tuhan, kapoam mapataak ra taak simbalui koson paringkuanangan, kapoam taak. Totopot kalo nambaal akai ra altar ra bokon; altar ru Tuhan i Aki Kapuuno' takau soroi noyo giu' ra saang ru Kim Nano.”

³⁰ Imam Pinigas am mopor ngaulun tingganai ru ulun ru Israil, tingganai ru sasambaloi ru Israil ondo' minaya' ri Pinigas, nokorongog ra ragu sinail ru bansa' ru Rubin, Gad am Manasi Sirangon. Naansayan ilo nokorongog raginio.

³¹ Indagu i Pinigas anak ru Imam Iliajar risilo, “Raino nakapandai akai ra nabaya' Tuhan ritakau. Kalo giminuor kau Riso. Namayag kau ra ulun ru Israil intor ra ukuman ru Tuhan.”

³² Kopongo raginio minuli' i Pinigas am ngaangai' tingganai no nangiruan ra bansa' ru Rubin am Gad giu' ra libung Giliad, am uli' ilo ra Kanaan am nambala' ra baal raginio ra ulun ru Israil.

³³ Ulun ru Israil naansayan am nongompor ri Aki Kapuuno'. Kalo boo nangatang ilo koson mangayou ra bansa' ru Rubin am Gad, kapoam mamuso ra wilayah nilo.

³⁴ Indagu ulun intor ra bansa' ru Rubin am Gad, “Altar ti nasauk ra sasi' ritakau ngaangai' ra Tuhan noyo i Aki Kapuuno'.” Ginio ra ininggalanan nilo altar no ra “Sasi'”.