JOSUA 20 - Tanou Moonsoi Timugon

Bandar-bandar pakisindungan

¹ Tuhan pana nanusub ri Josua

² mambala' ra ulun ru Israil, “Pilio' bandar pakisindungan; nanusub Aku ri Musa koson mambala' ramuyun ra baal ragitio.

³ Osoi ondo' namatoi ra ulun am kalo siningon magiru' mongoi ra bandar raginio am mibayag intor ra ulun ondo' mansuli'.

⁴ Magiru' io mongoi ra rondo' ra bandar raginio, am mongoi ra intok pangakiman giu' ra kulobon ru bandar am mambala' toojo ra baal ondo' nasauk ra tingganai-tingganai. Tingganai-tingganai mapaumpos riso ra bandar am manaak riso ra intok ayanan maa' raginio makaayan io ra giu' no.

⁵ Amon ru ulun ondo' masaga' mansuli' no maya' riso ra giu' no, kalo mataakan io ru mamagun ru bandar raginio ra ulun raginio. Musiti' nilo ampinin io sabap namatoi io ra ulun ra kalo siningon am sala' ka siminangit.

⁶ Polosoon io mayan ra bandar no saboi io ukumin ra saang ru ulun nasuangan am saboi matoi ulun ondo' nasauk ra Tingganai Maayo Imam paat raginio. Paulion boo ulun no ra namagunan nali, intor ra intok io nagiru'.”

⁷ Ginio ra giu' ra tampilon kalasaan ru Sungoi Jordan nampili' ilo ra bandar ragitio koson ra bandar pakisindungan: bandar Kidis giu' ra Galilia, giu' ra kabuluran ru Naptali; bandar Sikgim giu' ra kabuluran Ipraim; am bandar Gibron giu' ra kabuluran Jiuda.

⁸ Giu' ra tampilon sirangon ru Sungoi Jordan, giu' ra tana' marata' masawat ru tana' kaagisan tampilon sirangon ru Jiriko, nampili' ilo ra bandar Bijir giu' ra wilayah Rubin; bandar Ramot giu' ra libung Giliad, giu' ra wilayah Gad; am bandar Golan giu' ra libung Basan, giu' ra wilayah Manasi.

⁹ Ginilo noyo bandar pangampinan ondo' pinili' tayar ru ngaangai' ulun ru Israil am osoi ayuk ulun bansa' ru bokon ra popolos nilo. Osoi ondo' namatoi ra ulun ra kalo siningon, makisindung giu' ra rondo' ra bandar raginio intor ra ulun ondo' masaga' mansuli'. Kalo mapatoi io ra kalo akimin galing ra saang ru ulun masuang.