JOSUA 19 - Tanou Moonsoi Timugon

Wilayah tayar ru bansa' ru Simion

¹ Pantayaran karuo iono tana' tayar ru sasambaloi ralalom bansa' ru Simion. Balitan ru tana' nilo nakasubol ralalom wilayah ru bansa' ru Jiuda.

² Wilayah no nakasimpung bandar Birsyiba, Syiba, Molada,

³ Gajar-Sual, Bala, Ijim,

⁴ Iltolad, Bitul, Orma,

⁵ Jiklag, Bit-Gamarkabot, Gajar-Susa,

⁶ Bit-Libaot, am Sarugin; ngaangai' no mopor am talu bandar nabaya' ra ngaangai' pekan giu' ra liput no.

⁷ Suai raginio nakasimpung niayuk bandar Ain, Rimon, Itir am Asan; ngaangai' no apat bandar nabaya' ra ngaangai' pekan giu' ra liput no.

⁸ Wilayah nilo nakasimpung ngaangai' pekan giu' ra liliut ru bandar-bandar no, saboi ra Baalat-Biir (kapoam Rama) giu' ra tampilon rabugus. Ginio noyo tana' ondo' inapu ru sasambaloi ralalom ru bansa' ru Simion.

⁹ Sabap ra maayo kaga' wilayah Jiuda no risilo, santayaran ra wilayah no tinaakan ra bansa' ru Simion.

Wilayah tayar ru bansa' ru Jibulon

¹⁰ Pantayaran katalu iono tana' tayar ru sasambaloi ralalom ru bansa' ru Jibulon. Tana' ondo' inapu nilo malangka' saboi ra bandar Sarid.

¹¹ Intor ra giu' balitan no sumaboi ra tampilon kalasaan sumaboi ra Marala, am nakarapil ra balitan ru bandar Dabisit am anak ru sungoi tampilon sirangon ru Jokniam.

¹² Giu' ra tampilon ra bokon ru bandar Sarid, balitan raginio sumaboi ra sirangon mongoi ra balitan ru Kislot-Tabor, am mongoi ra Dobrat am nagaloi ra Japia.

¹³ Intor ra giu' balitan raginio sumaboi ra tampilon sirangon saboi ra Gat-Gipir am It-Kajin, am lumikou ra Nia sumaboi ra Rimon.

¹⁴ Giu' ra tampilon ralayo, balitan no sumaboi ra Ganaton am polos ra Limayak Jitpa-Il.

¹⁵ Tana' nilo nakasimpung bandar Katat, Nagalal, Simron, Jidala am Bitligim; ngaangai' no mopor am ruo bandar nabaya' ra ngaangai' pekan giu' ra liput no.

¹⁶ Ngaangai' bandar am ngaangai' pekan nokosor ralalom ru wilayah ondo' inapu koson ra longgom ru ngaangai' sasambaloi ralalom bansa' ru Jibulon.

Wilayah tayar ru bansa' ru Isakar

¹⁷ Pantayaran kaapat iono tana' tayar ru sasambaloi ralalom ru bansa' ru Isakar.

¹⁸ Wilayah nilo nakasimpung bandar Jijriil, Kisulot, Sunim,

¹⁹ Gaparaim, Sion, Anagarat,

²⁰ Rabit, Kisyon, Ibis,

²¹ Rimit, In-Ganim, In-Gada am Bit-Pajis.

²² Balitan raginio niayuk nakarapil ra balitan ru bandar Tabor, Sagajima, Bit-Simis am polos ra Sungoi Jordan; ngaangai' no mopor am onom bandar nabaya' ra ngaangai' pekan giu' ra liput no.

²³ Ngaangai' bandar am ngaangai' pekan nokosor ralalom wilayah ondo' inapu koson ra longgom ru ngaangai' sasambaloi ralalom bansa' ru Isakar.

Wilayah tayar ru bansa' ru Asyir

²⁴ Pantayaran kalimo iono tana' tayar ru ngaangai' sasambaloi ralalom bansa' ru Asyir.

²⁵ Intok nilo nakasimpung bandar Gilkat, Gali, Bitin, Aksap,

²⁶ Alamilik, Amad am Misal. Giu' ra tampilon kalasaan, balitan no nakarapil ra balitan ru Gunung Karmil am Sungoi Libnat.

²⁷ Intor ra giu' balitan no lumikou tampilon ra sirangon, sumaboi ra Bit-Dagon am nakarapil ra balitan ru Jibulon am Limayak Jipta-Il sumaboi ra Bit-Imik am Nigiil giu' ra ralayo. Balitan raginio pana sumaboi ra ralayo mongoi ra Kabul,

²⁸ Ibron, Rigob, Gamon am Kana saboi ra Sidon.

²⁹ Intor ra giu' balitan raginio lumikou ra Rama, saboi ra bandar Tirus ondo' mokoondo' ra kubu; am lumikou ra Gosa am polos ra Raat Tanga'. Wilayah no nakasimpung bandar Magalab, Akjib,

³⁰ Uma, Apik am Rigob; ngaangai' no ruo ngoopor am ruo bandar nabaya' ra ngaangai' pekan giu' ra liput no.

³¹ Ngaangai' bandar am ngaangai' pekan nokosor ralalom ru wilayah ondo' inapu ra longgom ru ngaangai' sasambaloi ralalom bansa' ru Asyir.

Wilayah tayar ru bansa' ru Naptali

³² Pantayaran koonom iono tana' tayar ru ngaangai' sasambaloi ralalom bansa' ru Naptali.

³³ Balitan ru wilayah nilo tinalimpuun intor ra Gilip am sumaboi ra puun tataun oak giu' ra Jaananim, rayus ra Adami-Nikib am mongoi ra Jabniil, saboi ra Lakum, am polos ra Sungoi Jordan.

³⁴ Intor ra giu' balitan raginio lumikou ra kalasaan sumaboi ra Ajnot-Tabor, am mongoi ra Gukok am nakarapil ra balitan ru Jibulon tampilon rabugus, balitan ru Asyir giu' ra tampilon kalasaan am Sungoi Jordan giu' ra tampilon sirangon.

³⁵ Ngaangai' bandar no ondo' mokoondo' ra kubu iono Jidim, Jirid, Gamat, Rakat, Kinirit,

³⁶ Adama, Rama, Gajor,

³⁷ Kidis, Idrii, In-Gajor,

³⁸ Jiron, Migdal-Il, Gorim, Bit-Anat am Bit-Simis; ngaangai' no mopor am siam bandar nabaya' ra ngaangai' pekan giu' ra liput no.

³⁹ Ngaangai' bandar am ngaangai' pekan nokosor ralalom wilayah ondo' inapu ra longgom ru ngaangai' sasambaloi ralalom bansa' ru Naptali.

Wilayah tayar ru bansa' ru Dan

⁴⁰ Pantayaran katulu' iono tana' tayar ru ngaangai' sasambaloi ralalom bansa' ru Dan.

⁴¹ Wilayah nilo nakasimpung bandar Jora, Isytaol, Ir-Simis,

⁴² Saalabin, Ayalon, Jitla,

⁴³ Ilon, Timna, Ikron,

⁴⁴ Iltiki, Gibiton, Baalat,

⁴⁵ Jigud, Binibirak, Gat-Rimon.

⁴⁶ Mi-Jarkon am niayuk Rakon, am niayuk intok giu' ra liliut ru Jopi.

⁴⁷ Paat ra bansa' ru Dan napusaan ra tana', minongoi ilo ra Lisim am namulunsar ra bandar raginio. Ginaau nilo bandar raginio, namatoi ra mamagun nano am nanguasa' ra bandar no. Minayan ilo ra giu' am nangalig ra inggalan ru bandar no intor ra Lisim nasauk ra Dan, sumugut ra inggalan ru kinamatuaan nilo.

⁴⁸ Ngaangai' bandar no am ngaangai' pekan nokosor ra wilayah ondo' inapu koson ra longgom ru ngaangai' sasambaloi ralalom bansa' ru Dan.

Pantayaran ra tana' ondo' pupus

⁴⁹ Paat ra ulun ru Israil nopongo nantatayar ra tana' raginio, nanaak ilo ri Josua anak ri Nun ra santayaran tana' raginio koson longgom nano galama'.

⁵⁰ Koson ra ondo' nanusuban ru Tuhan, nanaak ilo ri Josua ra bandar ondo' kinitaak nano, iono Timnat-Sira giu' ra intok kabuluran Ipraim. Binaal saguli' ri Josua bandar no am namagun ra giu' no.

⁵¹ Ginio noyo Imam Iliajar, Josua anak ri Nun, am ngaangai' tingganai intor ra sasambaloi ru bansa' ru Israil nantatayar ra tana' raginio ra inundi' giu' ra Silo, giu' ra kulobon ru Kim ru Tuhan koson makapandai ra kasagaan ru Tuhan risilo. Raginio noyo ilo nanalasai ra pantayaran ra tana' raginio.