JOSUA 18 - Tanou Moonsoi Timugon

Pantayaran ra pagun Kanaan ondo' suwo no

¹ Kopongo minayan ra pagun Kanaan, timung ngaangai' ulun ru Israil giu' ra Silo, am nopotolorog ra Kim ru Tuhan.

² Lakat poyo soroi tulu' bansa' ru Israil ondo' kalo poyo nakaalap ra tayar ru tana'.

³ Ginio ra indagu i Josua ra ulun ru Israil, “Kula' poyo buoi muno maginaa ra kalo poyo mangalap ra tana' ondo' tinaakan ramuyun ru Tuhan i Aki Kapuuno' ru kinamatuaan min?

⁴ Pilio' noyo talu ngaulun intor ra moonong bansa'. Manusub aku risilo mongoi ra titikop ru tana' ti koson manutun am manulis ra balitan ru tana' ondo' alapon nilo. Kopongo raginio musiti' ilo sumaguli' raki'.

⁵ Tayaron tana' no ra tulu' ngantayaran: bansa' ru Jiuda magulayun ra wilayah nano giu' ra tampilon rabugus am bansa' ru Jusup giu' ra wilayah nano tampilon ralayo.

⁶ Tulisin noyo baal ru tulu' intok ru tana' raginio, am pataakon ginio raki'. Undion ku koson makapandai ra tayar ra ati pataakon ru Tuhan i Aki Kapuuno' takau tayar ra moonong bansa'.

⁷ Kaa' bansa' ru Liwi kalo makaalap ra tayar ru tana' mabaya' ramuyun, sabap tayar nilo iono mangandoi ra Tuhan koson ra imam. Bansa' ru Gad, Rubin am Manasi Sirangon nakaalap noyo ra tana' giu' ra tampilon sirangon ru Sungoi Jordan, ondo' tinaakan ri Musa, ulipon ru Tuhan risilo.”

⁸ Ngaangai' ulun ondo' pinili' no minongoi panulis ra baal ru tana' no kalupus i Josua nambilin risilo, “Ongoi noyo tutuno' ngaangai' tana' ragitio am tulisi' ngaangai' balitan no, am saguli' no raki'. Aku pana mangundi' giu' ra Silo, koson makapandai ra kasagaan ru Tuhan ramuyun.”

⁹ Kopongo raginio ngaangai' ulun ondo' pinili' no liminiput ra ngaangai' tana' raginio. Tinulisan nilo ralan pantayaran ra tulu' ngantayaran no, am niayuk nanulis ra suang ru bandar ra giu' no. Kopongo raginio siminaguli' ilo ri Josua giu' ra pangkiman ra Silo.

¹⁰ Inundi' ri Josua koson makapandai ra kasagaan ru Tuhan risilo, am napataak ra tayar ru tana' ra moonong bansa' ru Israil ondo' kalo poyo nakaalap ra tana'.

Wilayah tayar ru bansa' ru Binjamin

¹¹ Ngaangai' sasambaloi ralalom ru bansa' ru Binjamin iono bansa' ondo' kasaa' nakaapu ra tayar ru tana'. Tana' nilo nokosor ra lolot ru tana' bansa' ru Jiuda am tana' ru bansa' ru Jusup.

¹² Giu' ra ralayo, balitan ru wilayah nilo tinalimpuun intor ra Sungoi Jordan, am nagaloi ra pipilon giu' ra tampilon ralayo ru Jiriko, am ra kalasaan mansail ra intok kabuluran saboi ra tana' kaagisan Bit-Awin.

¹³ Balitan no sumaboi ra pipilon giu' ra tampilon rabugus ru Lus (ondo' sabiton niayuk ra Bitil), am tumuun ra Atarot-Adar, giu' ra gunung tampilon rabugus ru Bit-Oron-Rabugus.

¹⁴ Balitan no pana mongoi ra rabugus intor ra tampilon kalasaan ru gunung no, am sumaboi ra bandar Kiryat-Baal (kapoam Kiryat-Jiarim). Bandar ragitio longgom ru bansa' ru Jiuda. Ginio noyo balitan ru kalasaan wilayah raginio.

¹⁵ Balitan giu' ra tampilon rabugus tinalimpuun intor ra kiing ru bandar Kiryat-Jiarim am sumaboi ra taur ru timug Mi-Niptoa.

¹⁶ Balitan raginio tumuun ra lonson toojo ru gunung ondo' nantaluma' ra Limayak Ginom, giu' ra pompor ru tampilon ralayo ru Limayak Ripaim. Balitan no pana mongoi ra rabugus mansail ra Limayak Ginom saboi ra tana' mangasawat giu' ra rabugus ra tana' ru ulun ru Jibusi, am mongoi ra taur ru timug In-Rogil.

¹⁷ Intor ra giu' balitan no mongoi ra ralayo, mongoi ra In-Simis, am mongoi ra Gililot ondo' nantaluma' ra Ginting Adumim. Balitan raginio pana tumuun ra Batu Bogan (Bogan iono anak ungkuyon ri Rubin)

¹⁸ am mansail giu' ra tampilon ralayo ru tana' mangasawat ondo' nantaluma' ra Limayak Jordan. Balitan raginio pana tumuun ra limayak

¹⁹ am mansail ra tampilon ralayo ru tana' mangasawat Bit-Golga, am polos giu' ra teluk boborok giu' ra tampilon ralayo ru Raat Matoi, intok nangkabangan ru Sungoi Jordan. Ginio noyo balitan rabugus ru wilayah raginio.

²⁰ Sungoi Jordan nasauk ra balitan giu' ra tampilon sirangon. Ginio noyo balitan ru wilayah ondo' apuon koson ra longgom ru ngaangai' sasambaloi ralalom ru bansa' ru Binjamin.

²¹ Ngaangai' bandar ondo' linonggom ru ngaangai' sasambaloi ralalom bansa' ru Binjamin iono Jiriko, Bit-Golga, Imik-Kijis,

²² Bit-Araba, Jimaraim, Bitil,

²³ Gaawim, Para, Opra,

²⁴ Kipar-Gaamonai, Opni am Giba; ngaangai' no mopor am ruo bandar nabaya' ra ngaangai' pekan giu' ra liput no.

²⁵ Suai raginio nakaaya' niayuk bandar Gibion, Rama, Biirot,

²⁶ Mijpa, Kipira, Moja,

²⁷ Rikim, Jirpiil, Tarala,

²⁸ Jila, Ilip, Jibus (kapoam Jirusalim), Gibia am Kiryat-Jiarim; ngaangai' no mopor am apat bandar nabaya' ra pekan giu' ra liput no. Ginio noyo tana' ondo' inapu koson ra longgom ru sasambaloi ralalom ru bansa' ru Binjamin.