JOSUA 17 - Tanou Moonsoi Timugon

Bansa' ru Manasi Kalasaan

¹ Santayaran intor ra tana' ra tampilon kalasaan ru Sungoi Jordan tinaakan ra kukula' sasambaloi ru papag ri Manasi, anak katuaan ri Jusup. I Makgir, ama' ri Giliad, iono anak ungkuyon katuaan ri Manasi; i Makgir niayuk sangulun tutumula'. Ginio ra libung Giliad am Basan giu' ra tampilon sirangon ru Sungoi Jordan tinaakan riso.

² Tana' giu' ra tampilon kalasaan ru Sungoi Jordan tinaakan ra sasambaloi ru bansa' ru Manasi ra bokon: sasambaloi ri Abiijir, Gilik, Asriil, Sikgim, Gipir am Simida. Ilo papag ra ungkuyon intor ri Manasi anak ri Jusup am ilo tingganai ru sasambaloi.

³ Kaa' i Jilapiad anak ri Gipir, akupu ri Giliad, (i Giliad anak ri Makgir, akupu ri Manasi), kolondo' anak ungkuyon. I Jilapiad makaanak ruandu' ayuk. Inggalan nilo i Makla, i Noa, i Golga, i Milka am i Tirja.

⁴ Minuma' ilo ri Imam Iliajar, i Josua anak ri Nun, am niayuk tingganai-tingganai ru Israil am indagu, “Nanusub Tuhan ri Musa maa' raginio manaak ramon ra tayar ru tana' koson masauk ra longgom mai koson ra pabukat mai ra ungkuyon.” Ginio ra, koson ondo' nanusuban ru Tuhan, ilo pana inanian ra tana' nabaya' ra kukula' ngaulun pabukat ungkuyon nilo.

⁵ Ginio sabap ra bansa' ru Manasi nakaalap mopor ngantayaran tana', suai ra libung Giliad am Basan giu' ra tampilon sirangon ru Sungoi Jordan,

⁶ sabap ra papag nano ra ungkuyon am ruandu' nakaalap ra tayar ru tana'. Tana' Giliad tinaakan ra papag ri Manasi ra bokon.

⁷ Balitan ru wilayah Manasi tinalimpuun intor ra Asyir saboi ra Mikmitat, giu' ra tampilon sirangon ru Sikgim. Intor ra giu' balitan raginio sumaboi ra rabugus, nakasimpung intok ru ulun In-Tapua.

⁸ Tana' giu' ra liliut ru Tapua longgom ri Manasi, kaa' bandar Tapua giu' ra balitan ru wilayah no longgom ru papag ri Ipraim.

⁹ Intor ra giu' balitan raginio tumuun saboi ra Sungoi Kana. Ngaangai' bandar giu' ra tampilon rabugus anak ru sungoi longgom ri Ipraim, kabalu' pana bandar-bandar giu' ra wilayah Manasi. Balitan ru wilayah Manasi ra rayus no mansusug ra igig tampilon ralayo ru anak ru sungoi no, am polos giu' ra Raat Tanga'.

¹⁰ Wilayah Ipraim nokosor tampilon rabugus, am wilayah Manasi nokosor tampilon ralayo; Raat Tanga' nasauk ra balitan ru karuo-ruo wilayah ragitio giu' ra tampilon kalasaan. Wilayah Asyir nokosor tampilon ra kalasaan ralayo am wilayah Isakar nokosor tampilon ra sirangon ralayo.

¹¹ Ralalom ru wilayah Isakar am Asyir, bansa' ru Manasi tatangan ra bandar Bit-Sian am Jibliam nabaya' ra ngaangai' pekan ra liliut nano, nakaaya' niayuk bandar Dor (ondo' igig ru nagas), Indor, Taanak, Migido am bandar-bandar giu' ra liliut no.

¹² Kaa' bansa' ru Manasi napagiru' ra mamagun ru ngaangai' bandar no. Ginio ra lakat poyo ulun ru Kanaan minayan ra giu' no.

¹³ Kaa' niayuk kalupus ulun ru Israil nasauk ra maikang poyo, kalo pinagiru' nilo ngaangai' ulun ru Kanaan. Ulun ru Israil nampajajal ayuk ra ulun ru Kanaan mangandoi risilo.

Nakitaak bansa' ru Ipraim am bansa' ru Manasi Kalasaan ra tana' paruangon

¹⁴ Indagu papag ri Jusup ri Josua, “Kua panaak kou ramon rondo' ayuk tayar ru tana' koson longgom mai? Masuang akai toojo sabap binarakat akai ru Tuhan.”

¹⁵ Taam i Josua, “Amon ru masuang kau toojo am kabuluran ru Ipraim boborok kaga' ramuyun, ongoi noyo ra kataunan giu' ra tana' ru ulun ru Piris am ulun ru Ripaim. Ukabo' noyo tana' bagu giu' ra kataunan nilono.”

¹⁶ Taam papag ri Jusup, “Kabuluran no kalo sama' gayo no ramon, kaa' ulun ru Kanaan giu' ra tana' marata' makakarita' kuda intor ra basi' – iou ra ulun ru Kanaan giu' ra Bit-Sian am giu' ra ngaangai' pekan ra liliut no, am pana ra mamagun ru Limayak Jijriil.”

¹⁷ Indagu i Josua ra bansa' ru Ipraim am bansa' ru Manasi Kalasaan, iono papag ri Jusup, “Masuang kau toojo am maikang kau kaga'. Makaalap kau masailan intor ra rondo' tayar.

¹⁸ Intok ra kabuluran no masauk niayuk ra longgom min. Kabalu' pana intok no kataunan, longgom min ngaangai' no am mangukab ra tana' no. Pagiruon min ulun ru Kanaan, kabalu' pana ilo bansa' ondo' maikang am makakarita' kuda intor ra basi'.”