JOSUA 14 - Tanou Moonsoi Timugon

Pantayaran ra tana' giu' ra tampilon kalasaan ru Sungoi Jordan

¹ Gitio noyo tunung ra ralan ru tana' ru Kanaan giu' ra tampilon kalasaan ru Sungoi Jordan tinayar-tayar ra ulun ru Israil. Imam Iliajar, Josua anak ri Nun am tingganai-tingganai intor ra sasambaloi bansa' ru Israil nantatayar ra tana' no.

² Koson ondo' nanusuban ru Tuhan ri Musa, wilayah-wilayah giu' ra tampilon kalasaan ru Sungoi Jordan tayar ru bansa'-bansa' ondo' siam am maintanga' no, tinayar-tayar ra nagundi'.

^3-4 I Musa nanaak noyo ra tana' giu' ra tampilon sirangon ru Sungoi Jordan ra bansa'-bansa' ondo' ruo am maintanga'. (Papag ri Jusup natayar ra ruo bansa', iono Manasi am Ipraim.) Kaa' kalo nanaak i Musa ra bansa' ru Liwi ra tana' intor ra wilayah ra ati pana. Kaa' tinaakan risilo bandar-bandar koson ra intok ayanan am padang sakot tayar ru bibiag tinambiag nilo.

⁵ Koson raginio noyo ulun ru Israil nantayar-tayar ra tana' raginio koson ondo' nanusuban ru Tuhan ri Musa.

Gibron tinaakan ri Kalib

⁶ Paat ra sangarawan, kukula' ngaulun intor ra bansa' ru Jiuda minuma' ri Josua giu' ra Gilgal. I Kalib anak ri Jipuni, ulun ru Kinas no, minindagu riso, “Nakapandai kou ra rinagu ru Tuhan ri Musa, ulipon ri Aki Kapuuno', ra ito ruo paat itakau giu' ra Kadis-Barnia.

⁷ Paat ri Musa, ulipon ru Tuhan, nanusub raki' intor ra Kadis-Barnia koson mansigo ra pagun no, umur kuno apat ngoopor ngambilor. Siminaguli' aku riso am nagibit ra pabalaan ondo' motopot,

⁸ kaa' ulun ra bokon ondo' nansigo nabaya' raki' nangilaa' ra ulun ru Israil. Kaa' giminagaya' aku ra Tuhan i Aki Kapuuno' kuno.

⁹ Ginio sabap ra nambantu' i Musa ra aku am anak-anak kuno totopot makaalap ra tana' ondo' kininjangan ku noyo koson ra longgom mai.

¹⁰ Raino apat ngoopor am limo ngambilor noyo nansail intor ra Tuhan minindagu raginio. Paat raginio timinanggau ulun ru Israil giu' ra tana' kaagisan. Intor ragili nagalung noyo Tuhan raki' maa' raginio maayag aku rayus sumugut ra bantu' Nano. Ilai' noyo! Raino umur kuno balu' ngoopor am limo ngambilor noyo

¹¹ am lakat poyo maikang koson ragili, paat i Musa nanusub raki'. Lakat poyo maikang aku mangayou kapoam mambaal ra atan ayuk.

¹² Ginio ra pataaki' noyo intok kabuluran no raki', tana' ondo' binantu' ru Tuhan raki' paat ra orou aku am ulun nabaya' raki' nanaak ra pambalaan. Paat ragili okou galama' nokorongog ra bansa' ru maayo ulun ondo' sabiton ra Inak minayan giu' ra intok raginio ralalom ru bandar mangaayo ondo' mokoondo' ra kubu. Maaru' Tuhan mabaya' raki', am makapapagiru' risilo koson ondo' rinagu ru Tuhan.”

¹³ I Josua nambarakat ri Kalib anak ri Jipuni am nanaak riso ra bandar Gibron koson longgom nano.

¹⁴ Saboi raino Gibron lakat poyo linonggom ru papag ri Kalib anak ri Jipuni, ulun ru Kinas no, sabap giminagaya' io toojo ra Tuhan i Aki Kapuuno' ru ulun ru Israil.

¹⁵ Kalo poyo raginio Gibron sabiton ra bandar longgom ri Arba. (I Arba iono ulun bansa' ru Inak ondo' maayo kaga'.) Raino pagun raginio mamimio sabap kolondo' boo pangayawan.