JOSUA 12 - Tanou Moonsoi Timugon

Raja'-raja' ondo' kinala ri Musa

¹ Ulun ru Israil nampagaau noyo am minayan ra wilayah tampilon ra sirangon ru Sungoi Jordan, intor ra Limayak Arnon saboi ra Limayak Jordan am saboi ra galur ru Gunung Girmon giu' ra ralayo. Kinala nilo ruo ngaulun raja'.

² Raja' ra sangulun no iono Raja' Sigon, raja' ru ulun ru Amori ondo' namarinta giu' ra Gisybon. Pamarintaan nano nakasimpung sampiruo intor ra libung Giliad: intor ra Aroir (giu' ra kiing ru limayak Arnon) am bandar giu' ra tatanga' ru limayak no saboi ra Sungoi Jabok, iono balitan ru Amon;

³ nakasimpung niayuk Limayak Jordan, intor ra Tasik Galilia tampilon ra rabugus saboi ra Bit-Jisimot (giu' ra tampilon sirangon ru Raat Matoi) am rayus ra lonson toojo ru Gunung Pisga.

⁴ Ilo niayuk nangala ra Raja' Og intor ra Basan, sangulun intor ra papag Ripaim ondo' pupus; raja' no namarinta giu' ra Asytarot am Idrii.

⁵ Pamarintaan nano nakasimpung Gunung Girmon, Salka am titikop ru Basan, saboi ra balitan ru Gisur am Maakga am niayuk sampiruo intor ra Giliad, saboi ra wilayah ru pamarintaan ru Raja' Sigon intor ra Gisybon.

⁶ Raja'-raja' no kinala ri Musa am ulun ru Israil. I Musa ulipon ru Tuhan, nanaak noyo ra wilayah ru raja'-raja' no ra bansa' ru Rubin, Gad am sampiruo intor ra bansa' ru Manasi koson longgom nilo galama'.

Raja'-raja' ondo' kinala ri Josua

⁷ I Josua am ulun ru Israil nangala ra ngaangai' raja' giu' ra wilayah tampilon ra kalasaan ru Sungoi Jordan, intor ra Baal-Gad giu' ra limayak pagun Libanon saboi ra Gunung Galak giu' ra rabugus maar ra Idom. Tana' no tinayar ri Josua ra bansa'-bansa' ru Israil, am pinataak ginio risilo koson tana' no longgom nilo.

⁸ Tana' raginio nakasimpung intok kabuluran, lonson toojo ru bulur tampilon ra kalasaan, Limayak Jordan am lonson toojo ru bulur ra giu' no, pipilon-pipilon ru bulur tampilon ra sirangon am tana' mapua' tampilon ra rabugus. Intok raginio inayanan ru ulun ru Git, Amori, Kanaan, Piris, Giwi am Jibusi ragili.

⁹ Ulun ru Israil nangala ra raja'-raja' intor ra bandar-bandar ragitio: Jiriko, Ai (maar ra Bitil)

¹⁰ Jirusalim, Gibron,

¹¹ Jarmut, Lakgis,

¹² Iglon, Gijir,

¹³ Dibir, Gidir,

¹⁴ Orma, Arad,

¹⁵ Libna, Adulam,

¹⁶ Makida, Bitil,

¹⁷ Tapua, Gipir,

¹⁸ Apik, Lasaron,

¹⁹ Madon, Gajor,

²⁰ Simron-Miron, Aksap,

²¹ Taanak, Migido,

²² Kidis, Jokniam (giu' ra Karmil),

²³ Dor (giu' ra kiing ru nagas), Goyim (giu' ra Galilia)

²⁴ am Tirja – ngaangai' no 31 ngaulun raja'.