JOSUA 10 - Tanou Moonsoi Timugon

Ulun ru Amori kinala

¹ Raja' Adoni-Jidik, namarinta ra Jirusalim, nokorongog ra i Josua nampagaau noyo ra Ai am liningon lunsayo' bandar no, am ra io namatoi ra raja' ru Ai koson ondo' binaal nano ra bandar Jiriko am raja' nano. Nokorongog raja' no ra nambaal ulun ru Gibion ra nabantuan pabansayan am ulun ru Israil am raino minayan ulun ru Gibion nasimpung ra ulun ru Israil.

² Mamagun ru Jirusalim nalaa' kaga' sabap ra Gibion iono bandar ondo' maayo, nogondo' gayo no ra bandar-bandar ra bokon ondo' mokoondo' ra raja'. Maayo poyo bandar Gibion intor ra bandar Ai am ulun ru Gibion tutumula' ondo' mangapanggol.

³ Ginio ra nambilin Raja' Adoni-Jidik ragitio ra Raja' Gogam intor ra Gibron, Raja' Piram intor ra Jarmut, Raja' Japia intor ra Lakgis am Raja' Dibir intor ra Iglon,

⁴ “Ibok pangindangan raki' mamulunsar ra Gibion, sabap mamagun nano nakimabantu' ra nabantuan pabansayan ri Josua am ulun ru Israil.”

⁵ Kalimo-limo ngaulun raja' ru Amori no iono raja' intor ra Jirusalim, Gibron, Jarmut, Lakgis am Iglon minatong nababaya' ra ngaangai' saujor nilo, am nagawang am namulunsar ra Gibion.

⁶ Napasaboi ulun ru Gibion ra tanou ragitio ri Josua giu' ra pangkiman Gilgal, “Tuan pai' akai tatango'! Ibok pangindangan ramon ra mataki'! Pamayag no ramon! Ngaangai' raja' ru ulun ru Amori giu' ra kabuluran nagamung am namulunsar noyo ramon!”

⁷ Ginio ra i Josua am ngaangai' saujor nano, nakaaya' pulalai nano ondo' moonsoi kaga' minugar intor ra Gilgal.

⁸ Indagu Tuhan ri Josua, “Pai' kalaa' risilo. Nanaak Aku noyo rirun ra kamanangan. Kolondo' sangulun pana intor risilo makaanggal rirun.”

⁹ Nosorondom i Josua am saujor nano minugar intor ra Gilgal mongoi ra Gibion, am ilo pana namulunsar ra ulun ru Amori ra namulali'.

¹⁰ Nangkinibit Tuhan ra ulun ru Amori magalabo paat nakakito ra saujor ru Israil. Namatoi ulun ru Israil risilo giu' ra Gibion am nangilou ra pantula' ondo' lakat poyo naayag, mongoi ra pipilon ru gunung giu' ra Bit-Oron saboi ra Ajika am Makida giu' ra rabugus.

¹¹ Paat ulun ru Amori nagiru' intor ra ulun ru Israil mansail ra pipilon ru gunung, naparatu' Tuhan ra rasam batu risilo ra galur ru ralan saboi ra Ajika, saboi masuang poyo pinatoi ru rasam batu intor ra ondo' pinatoi ru ulun ru Israil.

¹² Paat ra orou ru Tuhan napamanang ra ulun ru Israil ra ulun ru Amori, minindagu i Josua ra Tuhan. Giu' ra saang ru ulun ru Israil indagu i Josua, “Okou mato ru orou, uog noyo giu' rasawat ru Gibion. Okou sila', uog noyo giu' rasawat ru Limayak Ayalon.”

¹³ Mato ru orou minuog am sila' pana kalo mininsir saboi ulun ru Israil nangala ra pantula' nilo. Tunung ragitio natulisan ralalom ru Kitab Jasar. Mato ru orou minuog ra tatanga' ru limbowon nonsongorou, am nabuoi kaga' bagu no timinolop mato ru orou paat orou raginio.

¹⁴ Iou pana paat ra galing am niayuk intor ra orou raginio, baal raginio kalo igondo' nasauk paat Tuhan siminugut ra kasagaan ru ulun. Paat orou raginio nangayou Tuhan tayar ru ulun ru Israil.

¹⁵ Kopongo raginio siminaguli' i Josua am saujor nano ra pangkiman giu' ra Gilgal.

I Josua namparakop ra limo ngaulun raja' ru Amori

¹⁶ Kaa' limo ngaulun raja' ru Amori no nagiru' am nansibuni giu' ralalom luang batu giu' ra Makida.

¹⁷ Paat ilo natuum, binalaan i Josua ra intok nansibunian nilo.

¹⁸ Indagu i Josua, “Luiro' batu mangaayo no ra kabang ru luang batu no. Pailayin ra kukula' ngaulun magalung ra giu' no,

¹⁹ kaa' pai' kau uog ra intok raginio. Ilowo' pantula' am bulunsaro' ilo intor ra tinaulian. Pai' ilo polosoo' mumpos ra bandar nilono! Tuhan i Aki Kapuuno' min nanaak noyo ra kamanangan ramuyun mampaala risilo.”

²⁰ I Josua am ulun ru Israil namatoi ra ulun ru Amori, kabalu' pana mokoondo' kukula' ngaulun ondo' nakapagiru' giu' ra ralalom ru bandar nilo saboi kalo napatoi.

²¹ Kopongo raginio ngaangai' saujor ru Israil siminaguli' ri Josua ra naayag giu' ra Makida. Kolondo' sangulun pana giu' ra pagun no ondo' makakau' mindagu manggal ra ulun ru Israil.

²² Indagu boo i Josua, “Ukabo' kabang ru luang batu no am ibito' raki' limo ngaulun raja' no.”

²³ Luang batu no inukab am raja' ru bandar Jirusalim, Gibron, Jarmut, Lakgis am Iglon inibit miningkual,

²⁴ am pinauma' ri Josua. I Josua pana nampiau ra ngaangai' ulun ru Israil timinimung, am nanusub ra panglima ondo' nangayou nabaya' riso, maa' raginio mapabanta' ra kalayam nilo ra liog ru raja'-raja' no. Ilo pana nambaal koson raginio.

²⁵ Kopongo raginio indagu i Josua ra panglima-panglima nano, “Pai' kalaa' kapoam mapalo guang. Musiti' kau mangintopot am baani sabap gitio noyo ondo' baalon ru Tuhan ra ngaangai' pantula' min.”

²⁶ I Josua pana namatoi ra raja'-raja' no am nampatair ra baangkai-baangkai no ra limo ngampuun tataun, am pinoloso baangkai ra giu' no saboi mamai'.

²⁷ Paat ra tumolop mato ru orou, nanusub i Josua koson patuunon baangkai-baangkai no am ngaangai' patirin ra ralalom ru luang batu intok nansibunian ru raja'-raja' no ragili. Batu mangaayo pinabanta' ra kabang ru luang batu no; batu-batu no lakat poyo soroi ra giu' no saboi raino.

I Josua nampagaau ra masuang poyo wilayah ru ulun ru Amori

²⁸ I Josua namulunsar ra bandar Makida am ginaau no paat orou raginio. Namatoi io ra raja' no am ngaangai' ulun giu' ra bandar no. Kolondo' sangulun pana ondo' natatang, ngaangai' no pinatoi. Pinamakuan ri Josua ra raja' ru bandar Makida koson ra pinamakuan no ra raja' ru bandar Jiriko.

²⁹ Kopongo raginio i Josua am saujor nano minugar intor ra Makida am ongoi ra Libna. Namulunsar ilo ra bandar Libna.

³⁰ Tuhan nanaak niayuk ra ulun ru Israil ra kamanangan ra bandar no am raja' no. Kalo nompoloso ilo ra osoi pana naayag. Namatoi ilo ra moonong ulun ralalom ru bandar no. Pinamakuan nilo ra raja' no koson ra pinamakuan nilo ra raja' Jiriko.

³¹ Intor ra Libna, i Josua am saujor nano minongoi ra Lakgis. Nagawang ilo ra bandar no am namulunsar.

³² Paat orou karuo ru pangayawan no, nanaak Tuhan risilo ra kamanangan ra bandar no. Kalo nompoloso ilo ra sangulun pana naayag giu' ra Lakgis. Koson ondo' binaal nilo giu' ra Libna, namatoi ilo ra ngaangai' ulun giu' ra bandar no.

³³ Raja' Oram intor ra Gijir minatong koson mangindangan ra Lakgis kaa' i Josua nangala ra raja' am saujor nano, am kolondo' sangulun pana pinoloso naayag. Ngaangai' no pinatoi.

³⁴ Intor ra Lakgis, i Josua am saujor nano minongoi poyo ra Iglon. Nagawang ilo ra bandar no am namulunsar.

³⁵ Ginaau nilo bandar no paat orou raginio niayuk am namatoi ra ngaangai' ulun ra giu' no, koson ondo' binaal nilo giu' ra Lakgis.

³⁶ Intor ra Iglon, i Josua am saujor nano minongoi poyo ra Gibron, giu' ra kabuluran. Namulunsar ilo

³⁷ am nampagaau ra bandar no. Namatoi ilo ra raja' no am niayuk moonong ulun giu' ra bandar no am bandar-bandar ra paginggaar no. Linunsai lingono' ri Josua bandar no, koson ondo' binaal no ra bandar Iglon. Kolondo' sangulun pana pinoloso naayag.

³⁸ Siminaguli' boo i Josua am saujor nano giu' ra Dibir am namulunsar ra bandar no.

³⁹ Ginaau no bandar no am raja' nano am ngaangai' bandar ra bokon ondo' mamaar no. Namatoi ilo ra moonong ulun ra giu' no. Pinamakuan ri Josua ra Dibir am raja' no koson pinamakuan no ra bandar Gibron am Libna, am niayuk raja'-raja' ra giu' no.

⁴⁰ Ginaau ri Josua ngaangai' tana' raginio. Kinala no raja'-raja' giu' ra kabuluran, pipilon ru bulur giu' tampilon ra sirangon, lonson toojo ru bulur giu' ra tampilon kalasaan am niayuk tana' mangapua' giu' ra tampilon rabugus. Kalo pinoloso no sangulun pana naayag; namatoi io ra moonong ulun. Ginio noyo susuban ru Tuhan i Aki Kapuuno' ru Israil.

⁴¹ Kinala ri Josua libung-libung intor ra Kadis-Barnia giu' tampilon rabugus saboi ra Gaja maar ra nagas, nakaaya' ngaangai' libung Gosyin, saboi ra Gibion giu' tampilon ralayo.

⁴² Kinala ri Josua ngaangai' raja' no am pagun nilo lingono' sabap Tuhan i Aki Kapuuno' ru Israil nangayou tayar ru Israil.

⁴³ Kopongo raginio i Josua am saujor nano siminaguli' giu' ra pangkiman ra Gilgal.