JISAYA 66 - Tanou Moonsoi Timugon

Mangakim Tuhan ra bansa'-bansa'

¹ Mindagu Tuhan, “Limbowon no panturungan Kuno, am tana' papakirawan ra kalayam Kuno. Atan kia baloi ondo' maalap min kabaal Raki'? Atan kia intok ayanan moonsoi Raki'?

² Aku galama' namangun ra tana' ti. Maansayan Aku ra ulun minggana' guang am tumalikur ra tula, ondo' malaa' am gumagaya' Raki'.

³ Ulun raginio mambaal maya' ra kasagaan ru guang nilo. Pangkaraan nilo manimbalui ra sapi' gawayan nogondo' ayuk ra mampatoi ra ulun koson pataakon koson ra taak simbalui, mapataak ra anak domba kapoam mamandak ra liog ru uku', mapataak ra gandum kapoam raraa' ru bauwi; monolob ra kaminyan kapoam makiasi' ra sinungkalalaing. Masaga' ilo sumamba maya' ra ralan majamol kaga'.

⁴ Ginio ra palumpaan Ku karaat no risilo, ioginio karaat ra kalaanin nilo. Baal raginio masauk sabap ra bulintok ra Aku mampiau, kolondo' sangulun pana tumaam, am bulintok ra Aku mindagu, kolondo' sangulun pana mangkirongog. Masaga' ilo manggal Raki' am mambaal ra malaat.”

⁵ Rongogo' noyo ragu ru Tuhan, akau ngai' ondo' malaa' am gumagaya' Riso: “Sabap ra akau gumagaya' Raki', santayaran intor ra bansa' mino galama' masisang am mangimpai ramuyun. Magasab ilo ramuyun am mindagu, ‘Polosoon noyo Tuhan mapaintalang ra katulayan Nano am mamayag ramuyun, maa' raginio makakito akai ra akau maansukan.’ Kaa' ilo galama' tauyuon.

⁶ Rongogo' noyo posogolos ralalom ru bandar. Bolos intor ra Baloi ru Tuhan no bolos ru Tuhan ondo' mangukum ra pantula'-pantula' Nano.

⁷ Bandar Kuno ra matulai koson ra sangulun ruandu' maganak ondo' kalo marualan.

⁸ Nakaili' kia osoi-osoi nakakito kapoam nokorongog ra baal koson raginio? Nakaili' kia rondo' bansa' inanak ra songorou? Sion kalo boo mabuoi maimbolo'; bansa' raginio anakon mataki'.

⁹ Indoson min polosoon Ku ulun Kuno tinayon saboi maukop bulan, am kalo mataak anakon.” Tuhan minindagu noyo.

¹⁰ Pakaansuk noyo mababaya' ra Jirusalim, akau ngai' ondo' monogom ra bandar no. Pakaansuk noyo mababaya' ra Jirusalim ragino, akau ngai' ondo' nantangi' ra galing i.

¹¹ Makasia' kau ra kinalangkayaan nano koson ra lalagang makasia' ra gatas ru ina' nano.

¹² Mindagu Tuhan, “Aniin Takamin ra kinalangkayaan ra sabuoi-buoi no. Kinalangkayaan ru pagun-pagun ra bokon tumilis ra pagun muno koson ra sungoi ondo' kalo igondo' kapua'. Masauk kau koson ra anak ondo' patition ru ina' nano, ondo' kubibilon am tagamin.

¹³ Bansukon Takamin giu' ra Jirusalim, koson ra ina' mapabansuk ra anak nano.

¹⁴ Paat ra akau makakito ra kasaukan raginio, maansukan kau. Maligag kau koson ra sakot malabung. Bagu no makapandai kau ra Aku, Tuhan mangindangan ra ulun ondo' gumagaya' Raki', am pakitonon Ku sangit Kuno ra pantula' Kuno.”

¹⁵ Matong Tuhan mabaya' ra apui. Matong Io sumakoi ra bagiu' koson mangukum ra ulun ondo' sangitin Nano.

¹⁶ Mabaya' ra apui am ilang, ukumin No ngaangai' ulun ru tana' ti ondo' mapandayan No makasala; masuang ulun ukumin ra matoi.

¹⁷ Mindagu Tuhan, “Mamaar noyo pupus ru ulun mamasau ra inan koson sumamba ra sinungkalalaing, iono ilo ondo' mugar saguluyur giu' ra taman-taman dewa, am ondo' mangakan ra bauwi, kual ru tikus, am niayuk nansalinut akanon ra majamol.

¹⁸ Makapandai Aku ra karaan am binaal nilono. Matong Aku koson manimung ra ngaangai' bansa'. Paat ra ilo makatimung, makakito ilo ra kuasa' Kuno,

¹⁹ am makaliman ra Aku noyo mangukum risilo. Kaa' santayaran risilo no bayagon Ku, am pootoron Ku ra bansa'-bansa' giu' ra pagun-pagun maalur, ondo' kalo poyo igondo' pokorongog ra katulayan Kuno, kapoam makakito ra kinaayo Kuno am kuasa' Kuno. Pootoron Ku ilo giu' ra Sipanyol, Libia am Lidia mabaya' ra ulun mapandai kaga' mamanah, am niayuk giu' ra Tubal am Junani. Pabalaan nilo katulayan Kuno ra tatanga' ru ngaangai' bansa' no.

²⁰ Ibiton nilo ngaangai' ulun ru bansa' mino muli' intor ra pagun-pagun raginio koson ra taak nilo Raki'. Sumakoi ilo ra kuda, baghal, unta, kurita' kuda am pedati mongoi ra bulur Kuno ra matulai giu' ra Jirusalim, koson ra ulun ru Israil magibit ra gandum pinasuang ra rondo' intok mapasau mongoi ra Baloi ru Tuhan koson maringkuanang Raki'.

²¹ Santayaran risilo no pasaukon Ku ra imam am ulun ru Liwi.

²² Koson ra limbowon bagu am tana' bagu mantilayun sabap ra kuasa' Kuno, koson raginio niayuk ra papag mino am inggalan mino mantilayun.

²³ Paat ra moonong pangiantakan ra Bulan Bagu am orou Sabat, ulun intor ra ngaangai' pagun matong sumamba Raki' giu' ra Jirusalim.

²⁴ Bulintok ra ilo muli', makito nilo baangkai-baangkai ru ulun ondo' giminuor Raki'. Ulor mangakan ra baangkai nilono kalo matoi, am apui monolob risilo no kalo malasa'. Pagilayan raginio makalalaa' kaga' ra ngaangai' ulun.”