JISAYA 63 - Tanou Moonsoi Timugon

Kamanangan ru Tuhan no ra bansa'-bansa'

¹ “Osoi kia io minatong intor ra bandar Bojra giu' ra Idom? Osoi kia io nambayang ra malia' am mugar ra maikang kaga'?” “Io Tuhan ondo' makakuasa' koson mamayag. Io matong koson mapabala' ra kamanangan Nano.”

² “Kua kia ra arara' boo ra kinalia' ru bayang Nano, koson ra binayang ru ulun mangagik ra kawa' ru anggur?”

³ Taam Tuhan, “Nanginjang Aku ra bansa'-bansa' koson ra Aku nanginjang ra kawa' ru anggur. Kolondo' sangulun pana ra ulun Kuno mangindangan Raki'. Nanginjang Aku ra bansa'-bansa' ralalom ru sangit saboi raraa' nilono nampajamol ra bayang Kuno.

⁴ Bulintok no koson mamayag ra ulun Kuno nasaboi noyo; bulintok no koson mangukum ra pantula'-pantula' Kuno nasuku' noyo.

⁵ Mangimuag Aku sabap kolondo' sangulun pana paat Aku maguyum ra ulun mangindangan Raki'. Kaa' sangit Kuno ra mapaangan mapasauk ra Aku maikang, am Aku namanang ra kaikangan Kuno galama'.

⁶ Ralalom ru sangit kikinjangin Ku ngaangai' bansa' am manutuk risilo. Patulukon Ku raraa' nilono ra tana'.”

Kinoonsoi ru Tuhan ra Israil

⁷ Tunungon ku togom ru Tuhan; omporon ku Io sabap nansalinut binaal Nano. Binarakat No ulun ru Israil saboi liminuab sabap ra asi' am togom Nano kolondo' pupus.

⁸ Mindagu Tuhan, “Ilo ulun Kuno, kalo mamparuung ilo Raki'.” Ginio ra Io namayag risilo

⁹ intor ra nansalinut kaimbalaan. Sala' ka ulun sinusub kapoam malaikat, kaa' Tuhan galama' namayag risilo. Ralalom ru togom am kaasian Nano binayag No ilo. Intor poyo ra galing i inalungan No ulun Nano,

¹⁰ kaa' ilo gumuor Riso am mangkinibit ra Tuhan mangiluk guang. Ginio ra Tuhan makimantula' am manggal risilo.

¹¹ Kaa' ilo pana nakakara' bulintok ra galing i, ioginio paat ri Musa, ulipon ru Tuhan. Ilo pana nangkuot, “Ati kia Tuhan, ondo' nangaak ra ulun am tingganai-tingganai nilono maya' ra raat? Ati kia Tuhan ondo' nanaak ra kuasa' Nano risilo?

^12-13 Ati kia Tuhan, ondo' ralalom ru kuasa' Nano nambaal Io ra baal makaimuag ondo' pinabala' galing ri Musa? Linapak No timug ru raat am mangitang ra ulun Nano sumandaup ra raat ondo' malandom, saboi inggalan Nano mauligan kaga' ra sabuoi-buoi no.” Koson ra kuda masigo kalo makasaru ilo sabap ra Tuhan mangindangan risilo.

¹⁴ Ati poyo kulaan ra tambiag ibiton giu' ra limayak malabung, ginio niayuk Tuhan mangitang ra ulun Nano am mapatangus. Kitangon No ulun Nano am maa' raginio ra inggalan Nano uramaton.

Pakiasian ra makimasi' am makiindangan

¹⁵ Iou Tuhan, indukui' akai no intor ra suruga', intok inayanan Muno ondo' mapasau am matulai. Ati boo togom am katulayan Muno? Ati boo togom am kaasian Muli? Pai' oroto' ginio ngaangai' ramon.

¹⁶ Okou noyo Ama' mai. Kinamatuaan maili i Abragam am i Jakub kalo makaulig ramon, kaa' Okou noyo Ama' mai, iou Tuhan! Okou Mamamayag ramon intor poyo ra galing i.

¹⁷ Kaa' ragino kua polosoo' Mu akai makalayau? Kua polosoo' Mu akai bambalingatan saboi akai kalo malaa' Rirun? Saguli' no ramon, sabap risilo ondo' mangandoi Rirun, am sabap risilo ondo' masalok masauk ra longgom Muno.

¹⁸ Akai ulun Muno ra mapasau ininggalaran ru pantula' mai sangkinolor. Manginjang-nginjang ilo ra Baloi Muno,

¹⁹ am pamakuan Muno ramon koson ra kalo igondo' Kou nanguasa' ramon, am koson ra kalo igondo' akai kasauk ra ulun Muno.