JISAYA 6 - Tanou Moonsoi Timugon

I Aki Kapuuno' nampiau ri Jisaya koson pasaukon ra nabi

¹ Paat ra bilor pinatayan ru Raja' Ujia, nakito ku Tuhan. Nanturung Io ra panturungan Nano ondo' masawat am matulai. Pompor ru sukub Nano nakalimpot pakataub ra Baloi ru Tuhan.

² Ilo ondo' maayag ondo' masimbula' koson ra apui minigor ra libung Nano: moonong ilo mokoondo' onom kawo. Moonong ilo no ruo kawo pakayon no koson pananaub ra bulos, ruo kawo poyo pananaub ra inan, am ruo poyo pakayon mansiab,

³ Ilo ondo' maayag no mampiau ra rondo' am bokon, “Matulai, matulai, matulai! Matulai noyo Tuhan Ondo' Maayo Kaga' Kuasa'! Tana' natikop ra rinatangan Nano ondo' matulai.”

⁴ Bolos nilo ondo' maayag no mangkinibit ra lugu' Baloi ru Tuhan no mauyog, am Baloi ru Tuhan no nototop ra lisun.

⁵ Indagu aku boo, “Aibui boo raki'! Kolondo' boo kalansanan kuno, sabap moonong raguon kuno makatula, am nakalatok aku ra ulun koson niayuk raginio. Kabalu' pana raginio, mato am ulu kutu galama' nakakito ra Raja', Tuhan Ondo' Maayo Kaga' Kuasa'!”

⁶ Kopongo raginio rondo' risilo ondo' maayag no nansiab timinuun minatong raki', nagibit ra baa ondo' sinumpit no intor ra altar.

⁷ Baa no pinajalak no ra bibil kuno liliwa' mindagu, “Baa ti nakajalak noyo ra bibil muno. Ginio ra, kasalaan muno linulu' noyo, tula muno pana inampun noyo.”

⁸ Kopongo raginio mangkirongog aku ra Tuhan mindagu, “Osoi kia susubon Kutu? Osoi kia masauk ra ulun susubon takau?” Taam aku, “Giti aku, Susubo' aku no!”

⁹ Io pana nanusub raki' mampasaboi ra tanou ti ra ulun, “Rayusi' min mangkirongog, kaa' kalo makarati'. Rayusi' min mampaguang, kaa kalo mapandayan min atan kasaukan.”

¹⁰ Indagu Io boo raki', “Ngongolo' pangkaraan ru ulun ti, barato' talingo nilono am bolowo' mato nilono maa' raginio kalo makakito ilo, kapoam mokorongog, kapoam makarati'. Amon kalo koson raginio, maaru' lair sumaguli' ilo Raki' am babason.”

¹¹ Mangkuot aku, “Kula' buoi ru kasaukan koson ragitio, iou Tuhan?” Taam Io, “Saboi bandar-bandar mapuut, magagai am kolondo' namagun, baloi-baloi kalo boo ayanin, tana' naliung-liung am niayuk mapua'.

¹² Namagun ra bandar-bandar anjungon Ku ra intok maalur, am saukon Ku titikop ru pagun ti masiluk ra kolondo' namagun.

¹³ Poyo amon ru mokoondo' sangungulun intor ra mopor natatang ra pagun no, io pana pusoon. Masauk io koson ra tuor ru puun oak ondo' tinagar. Tuor no tatandu' ra talimpuunan bagu ru ulun ri Aki Kapuuno'.”