JISAYA 58 - Tanou Moonsoi Timugon

Pali ondo' motopot

¹ Mindagu Tuhan, “Kosongowo' noyo golok muno! Balai' noyo ulun Kuno ra tula-tula nilono.

² Moonong orou ilo sumamba Raki', am makibala' ilo ra atan kasagaan Kuno, koson ayuk ilo no mambaal ra moonsoi, am gumagaya' ra ukum Kuno. Mindagu ilo ra matasu' ilo sumamba Raki' am kitaakon nilo ukum Kuno ondo' matimpok.”

³ Mangkuot bansa' raginio, “Atan pakuan mampali amon ru Tuhan kalo magilong? Atan pakuan itakau minggana' guang amon ru Io kalo mampalio?” Mindagu Tuhan, “Sotopot no, liliwa' akau mampali, maguyum kau ra kaatangan galama' am mangimbolo' ra ulun-ulun mangandoi mino.

⁴ Liliwa' mampali, magagansang kau am magagabu' am lumaat. Indoson mino ralan ra mampali mino manguyog Raki' koson mangkirongog ra pakiasian mino?

⁵ Paat ra akau mampali, imboloon min inan mino; ulu pakukuon min koson ra raun ru sakot liminakut. Pabingkalon min konoon karung am manatak ra kaau, am mombolong ra rasawat nano. Ginio kia inggalanin min ra pali? Indoson min kasagain Kuno baal min raginio?

⁶ Gitio noyo pali ra kasagaan Kuno: Iruo' noyo bangkil kaimbalaan am saanin ra kolondo' katimpakan, am palabuso' noyo ulun-ulun ondo' inimbolo'.

⁷ Pataako' noyo akanon muno ra ulun naitilan, apuo' noyo ulun-ulun musikin ondo' kolondo' ayanan ra baloi muno. Ulun nagibaang anii' ra saluar am bayang, am pai' inggio' pabukat muno ondo' maaya' indanganon.

⁸ Sinda pana sumila' rirun koson ra susuab ti, am pipilat muno mapali' mataki'. Masalok Aku mabaya' ramuyun koson mamayag ramuyun. Ratangan Kuno manindung ramuyun intor ra nansalinut linsuk.

⁹ Bulintok ra akau makiasi', iowon Ku. Bulintok ra akau mampiau, tumaam Aku. Pai' boo pangimpai ra akau ngai', langgai' noyo pantutulaan am manimbaal ra ragu.

¹⁰ Paakano' noyo ulun naitilan am indangano' noyo ulun-ulun ondo' inimpayan. Amon ru makapambaal kau koson raginio, kalandaman pana giu' ra liliut mino masauk matawang koson ra orou ti.

¹¹ Masalok Aku maningganai ramuyun am mamasug ramuyun giu' ra tana' mapua'; Aku magalung ramuyun maa' raginio maligag kau am maikang. Akau koson ra taman ondo' maulian ra timug no, koson ra taur ru timug ondo' kalo igondo' mapua'.

¹² Bandar ondo' lair noyo nasauk ra tuntur ru napuutan baalon min sagulio' ra nambaalan lair. Piawon kau ra ‘Bansa' ondo' nambaal saguli' ra timbok-timbok am nambaal saguli' ra baloi-baloi ondo' natutuk.’ ”

Ampos ru ulun ondo' mangurumat ra orou Sabat

¹³ Mindagu Tuhan, “Urumato' noyo orou Sabat koson ra orou ru Tuhan. Pai' pambaal ra kandoi koson kaatangan muno galama' ra orou raginio. Iantako' noyo orou raginio koson ra orou kaansukan; urumato' noyo orou ru Tuhan ra kalo saugar-ugar; pai' niayuk pangandoi kapoam mindagu ra kolondo' onong.

¹⁴ Akau pana maansukan sabap ra mangurumat Raki'. Saukon Takamin ra urumaton ra titikop ru tana'. Bayag mino mototop ra bansuk intor ra tana' longgom ri Jakub, kinamatuaan min. Aku, Tuhan minindagu noyo.”