JISAYA 57 - Tanou Moonsoi Timugon

Israil inulas sabap ra sumamba ra sinungkalalaing

¹ Paat ra ulun moonsoi matoi, kolondo' osoi pana makarati' kapoam mampalio riso. Kaa' paat ra ilo matoi, makalabus ilo ra karaat.

² Makaalap ilo ra kaansayan am tumangus ra ralalom ru lobong.

³ Ibok kano, akau ulun makatula. Polosoon akau akimin! Laat mini koson ra ulun mangurana', ulun ondo' masaga' mansawa', am ulun mantalan ra inan.

⁴ Osoi kia kulion mino? Akau ulun maabau-abau, osoi kia kakuritan mino?

⁵ Sumamba kau ra dewa-dewa kalabungan am mansawa' ra saau ru puun-puun keramat. Pataakon min anak-anak mino koson ra taak simbalui giu' ra lapak ru bulur batu, giu' ra limayak sungoi.

⁶ Alapon min batu-batu malamog intor ra sungoi, am sambaan io koson ra sinungkalalaing. Wain am gandum saukon min ra taak ra sinungkalalaing no. Indoson min kia ra kasagain Ku ngaangai' no?

⁷ Mongoi kau ra tampak ru gunung ondo' mangasawat koson mapataak ra taak simbalui am mangimong ra saga' ru guang mino.

⁸ Sinungkalalaing pabantaan min ra talikur ru kulobon mino. Tatangon min Aku. Lumabas kau am tumampak ra kaalangan ondo' maayo mababaya' ra kubayau mino: ulun ondo' binayaran maa' raginio marulug kau. Ginio noyo ralan mangimong ra saga' ru guang mino.

⁹ Mampakai kau ra umau ondo' maamis owou am sumamba ra Dewa Molok. Manusub kau ra ulun mongoi ra pagun-pagun maalur, am niayuk giu' ra pagun ru ulun matoi.

¹⁰ Maagui kau maguyum ra sinungkalalaing ra bokon, kalo masaga' kau tumangus. Indoson min sinungkalalaing mino makapangikang ramuyun saboi akau kalo maagui.

¹¹ Mindagu Tuhan, “Osoi kia dewa-dewa ondo' mangilalaa' ramuyun saboi magabau kau Raki' am lumingon mampalilian Raki'? Kalo kia boo mangurumat kau Raki' sabap nabuoi Aku nongkoror?

¹² Indoson min binaal mino motopot, kaa' pasalulaan Ku kalaatan toojo mino, am sinungkalalaing mino kalo makapangindangan ramuyun.

¹³ Paat ra akau mampiau makiindangan, polosoon sinungkalalaing mino mamayag ramuyun! Sinungkalalaing no mangatatak masiob ru angin! Kaa' ulun ondo' mangintopot Raki' makatungkus ra pagun ti. Sumamba ilo Raki' ralalom ru Baloi Kuno.”

Nambantu' i Aki Kapuuno' koson mangindangan am mamali' ra ulun Nano

¹⁴ Mindagu Tuhan, “Polosoon noyo ulun Kuno sumaguli' Raki'. Pambaal noyo am pongoo' noyo ralan! Tumpailo' noyo moonong mokoompong ra ralan nilono!

¹⁵ Aku noyo i Aki Kapuuno' Ondo' Masawat Kaga' am Matulai Kaga', ondo' maayag ra sabuoi-buoi no. Mayan Aku ra intok masawat am matulai, kaa' mayan Aku niayuk mababaya' ra ulun ondo' minggana' guang am ondo' timinalikur intor ra tula, koson mapatapuli' ra ambiluo am kalansanan nilono.

¹⁶ Aku noyo napaayag ra ulun Kuno. Kalo rayusin Ku manguu' risilo, am kalo masalok sumangit risilo.

¹⁷ Sumangit Aku risilo sabap ra tula nilo am luung nilo. Ginio sabap no ra Aku nangukum am nangiruan risilo. Kaa' mokotog ulu nilono am maya' noyo ra ralan galama'.

¹⁸ Nakito Ku noyo paliso nilono, kaa' mamali' Aku risilo. Kitangon Ku ilo am mangindangan risilo. Bansukon Ku guang ru ulun ondo' mangulir.

¹⁹ Pababansayan pataakon Ku ra ngaangai' ulun, io pana mamaar kapoam maalur! Babason Ku ulun Kuno.

²⁰ Kaa' ulun malaat koson ra raat ondo' makakinulun am kalo igondo' kaliuk; aug no magibit ra ginsamol am losok.

²¹ Ulun makatula kalo maayag.”