JISAYA 52 - Tanou Moonsoi Timugon

Mapalabus i Aki Kapuuno' ra Jirusalim

¹ Luat noyo, okou Jirusalim, luat noyo! Ikango' guang muno! Sulungi' bayang moonsoi kaga' muno! Okou Jirusalim, bandar ondo' matulai, ulun majamol kalo boo sumubol ra kulobon garabang muno.

² Luat no intor ra kaau, okou Jirusalim, kabuli' kaau ondo' siminokot rirun. Bugali' rantai ondo' siminigot ra liog muno, akau namagun ru Sion ondo' narakop!

³ Mindagu Tuhan ra ulun Nano, “Akau tinalan ra kolondo' logo, ragino palabuson kau ra kolondo' niayuk logo.

⁴ Galing i minayan kau giu' ra Misir koson ulun bansa' ru bokon. I Asyur pana nangimbolo' ramuyun ra kolondo' sasaban.

⁵ Ragino atan kondoyon Ku ragiti? Mamparakop ulun ru Babil ramuyun ra kolondo' sasaban. Ilo ondo' mangimbolo' ramuyun malilimbau am rayusin nilo magasab Raki'.

⁶ Ginio sabap ra akau mangiou ra Aku i Aki Kapuuno', am bulintok raginio makapandai kau ra Aku noyo minindagu ramuyun.”

⁷ Mapara' piboo bonsoi magilong ra ratangan ru ulun sinusub; mugar io mansail ra kagunungan am magibit ra tanou moonsoi, tanou pababansayan, tanou pamayagan ra tayar Sion; kono, “I Aki Kapuuno' muno Raja'!”

⁸ Rongogo' noyo noloos ayuk kaantakan ru mantatamung ra bandar, ngaangai' ilo magilakup! Sabap mato nilo galama' magilong Tuhan siminaguli' ra Sion.

⁹ Pagitapap kano, akau napuutan ru Jirusalim, sabap ra Tuhan mangansuk ra ulun Nano am mapalabus ra Jirusalim.

¹⁰ Tuhan mapakito ra kuasa' Nano ra saang ru mato ru nansalinut bansa'. Titikop ru tana' pana makainono' ra pamayagan intor ri Aki Kapuuno' takau.

¹¹ Ugar no! Iruani' noyo bandar Babil, akau ondo' nagibit ra kuliamos ru baloi ri Aki Kapuuno'! Pai' kau kambong ra kuliamos ondo' majamol no, tulayo' min inan mino ra kalo poyo mintor kau.

¹² Kalo maajag-ajag kau mugar, am sala' ka koson ra ulun ondo' tumangkus ayuk pagiru'. Sabap ra Tuhan no mangitang ramuyun; i Aki Kapuuno' ru Israil manindung ramuyun intor ra nansalinut pisuk.

Ulipon ondo' naimbolo'

¹³ Indagu Tuhan, “Sotopot no, ulipon Kuno makaampos; omporon io am urumaton.

¹⁴ Galing i masuang ulun makatigog magilong riso, bulos nano pinilatan saboi koson sala' boo ka ulun.

¹⁵ Kaa' ragino masuang bansa' binaal no mangimuag, raja'-raja' kalo makaindagu sabap ra mangimuag. Magilong am makarati' ilo, ondo' buoi ti kalo makapandai ilo.”