JISAYA 50 - Tanou Moonsoi Timugon

¹ Tuhan mindagu ri Israil, “Okou ulun Kuno, indos mu inggalarin Tokou koson ra sangulun ralaki mangali ra andu' nano? Koon poyo raginio, ati surat pangalian nano? Indoson muno tinalan Tokou, koson ra sangulun ama' nantalan ra anak nano ra mansisika' ra utang? Sala'! Okou rinakop am pinatiran, sabap ra tula am kalaatan muno galama'!

² Kua kolondo' sangulun pana ulun Kuno tumaam, Paat ra Aku matong mampiau risilo? Mongkoror ilo ayuk kia sabap ra mampaguang kalo makakau' Aku mapalabus am mamayag risilo? Sotopot no, maya' ra panusuban Kuno raat masauk mapua', sungoi-sungoi saukon Ku ra tana' kaagisan saboi papait matoi am mongootong.

³ Limbowon saukon Ku mapiot londom, Taubin Ku koson ra konoon panguliran.”

Pampagagayaan ra ulipon ru Tuhan

⁴ Tuhan Ondo' Masawat Kaga' mangila' raki' makimansunur, maa' raginio ragu kuno mapaikang ra ulun maagui. Moonong susuab patirongon No gogoton kuno koson mangkirongog ra pangilaan Nano koson raki'.

⁵ Tuhan mapaarati' raki'; kalo manggal aku kapoam mugar intor Riso.

⁶ Patungayon ku tumbung kuno ra ulun ondo' mampalamba' raki'; am pingas kuno ra ulun ondo' mamubul ra jangut kuno. Kalo patalikuron ku bulos kuno bulintok ra aku asabin am tiwagin.

⁷ Sabap ra Tuhan i Aki Kapuuno' mangindangan raki', aku pana kalo tauyuon. Ikangon ku guang kuno koson mongorot; makapandai aku ra kalo tauyuon aku.

⁸ Sabap ra mamaar i Aki Kapuuno', mambala' Io ra aku kolondo' sala. Osoi masaga' mansang raki'? Mabaya' to mongoi ra makama. Osoi kia manggal raki'? Susubo' io minggaar raki'.

⁹ Sotopot no, Tuhan Ondo' Masawat Kaga' manungka' raki', osoi makakau' mindagu ra aku makasala? Ngaangai' ulun ondo' manguu' raki' no mapuso koson ra konoon narilak kinokot ru kilau.

¹⁰ Akau ondo' mangurumat ra Tuhan, am mangkirongog ra ragu ru ulipon Nano, ralan ra bayain mino magu' molondom, am kolondo' sinda makatampulau ramuyun; kaa' pangintopot noyo ra Tuhan; am lansang no ri Aki Kapuuno' mino.

¹¹ Akau ondo' masaga' mangimbolo' ra ulun bokon, pusoon kau ru atang min galama'. Tuhan noyo nambaal raginio masauk, imboloon kau noyo toojo.