JISAYA 49 - Tanou Moonsoi Timugon

Israil, sinda ru bansa'-bansa'

¹ Rongogo' aku, akau pagun-pagun ondo' maalur lioo' min ragu-ragu kutu. Piniau aku ru Tuhan ra aku kalo poyo inanak, pinili' No aku intor poyo ra aku tininai'.

² Ragu-ragu kuno sinauk No malarom koson ra ilang, am ra kalindu' Nano galama' nanindung Io aku. Sinauk No aku koson ra anak ru panah inasa', am pinauli No ra kobon koson tumampos pakayon.

³ Ragu No raki', “Okou noyo ulipon Kuno; katulayon Aku sabap ra okou.”

⁴ Kaa' mindagu aku, “Bagui kuno kolondo' ampos; kinai' ku ikang kuno ra namuta' ayuk!” Kaa' mangintopot aku ra saungon aku ru Tuhan; balasin aku ri Aki Kapuuno' sumugut ra binaal kuno.

⁵ Ra kalo poyo naanak, piniau aku noyo ru Tuhan masauk ra ulipon Nano, koson mapalulur ra ulun ru Israil, maa' raginio sumaguli' ilo Riso. Tuhan napasauk raki' urumaton toojo. I Aki Kapuuno' noyo kaikangan kuno.

⁶ Tuhan mindagu raki', “Kandoi ra maayo kaga' maginaa rirun, okou ulipon Kuno; okou sala' ka mapasaguli' ayuk ra suwo ru papag ri Jakub am mapatapuli' ra kinaayo ru bansa'-bansa' ru Israil, kaa' saukon Ku poyo okou ra sinda ru bansa'-bansa' maa' raginio titikop ru tana' ti bayagon.”

⁷ I Aki Kapuuno' matulai Mamamayag ru Israil mindagu ra ulun ondo' asasabin toojo, am ondo' kasisangin ru bansa'-bansa' am niayuk masauk ra ulipon ru nasuangan mangunguasa', “Raja'-raja' makakito ra binaal Kuno, am sumukal ilo am mangurumat Raki'. Nasuangan ru mangunguasa' magilong niayuk riso, am migulatur sumamba.” Ginio masauk sabap ra Tuhan nampili' noyo ra ulipon Nano; i Aki Kapuuno' matulai ru Israil manugut ra bantu' Nano.

Jirusalim binangun saguli'

⁸ Tuhan mindagu ra ulun Nano, “Bulintok ra Aku mangiou, tumaam Aku; orou ra Aku mamayag, indanganon Takamin. Sindungin am alungin Takamin, am saukon Ku nabantuan ra bansa'-bansa'. Tapulion Ku pagun ra masiluk masauk ra tana' tungkuson ondo' ayanin.

⁹ Ulun ra inaput susubon Ku mingkual; ondo' soroi ra intok molondom ibiton Ku ra intok matawang. Giu' ra bulur nabugasan pana kolondo' kapaganan nilo, gagawar ru ralan pinaatang akanon.

¹⁰ Kalo paason kapoam maitilan ilo, am kalo malasuan ilo giu' ra tana' kaagisan. Sabap ra Aku, motogom risilo, mangaak risilo, am mangitang risilo ra taur-taur ru timug.

¹¹ Mambaal Aku ra ralan maya' ra kagunungan, ngaangai' ralan rataan Ku.

¹² Intor ra maalur ulun Kuno sararatong, intor ra ralayo, kalasaan am Sinim giu' ra rabugus.”

¹³ Parimbai no, okou limbowon, pagilakup noyo okou tana', akau gunung-gunung, pagilakup noyo maansukan! Sabap ra Tuhan matong mangansuk ra ulun Nano, makaasi' Io ra ulun Nano ondo' inimpayan.

¹⁴ Kaa' namagun ru Jirusalim mindagu, “Tuhan nanatang noyo ritakau, Tuhan takano nampalilian ritakau.”

¹⁵ Tuhan tumaam, kon No, “Makalilian kia sangulun ina' ra anak nano? Kabalu' pana malilianan no, Kalo lilianin Tokou!

¹⁶ Jirusalim, masalok Aku mangkara' rirun; inggalan muno tinulisan Ku ra palar ru kalindu' Kuno.

¹⁷ Ulun-ulun ondo' mambaal rirun saguli' rumatong mataki', am ondo' manutuk rirun no magiru'.

¹⁸ Ilai' noyo am tantangi' noyo libung muno, ulun muno timinimung am matong rirun. Sabap ra Aku, i Aki Kapuuno' ondo' maayag, mindagu Aku, maansukan kou kaga' sabap namagun muno, koson ra ruandu' inuot maantak guang ra io pinampakai.

¹⁹ Pagun muno ondo' mapua' am masiluk, ragino nasauk mapisok kaga' ra ilo ondo' makaguang mayan no. Am ulun-ulun ondo' makaguang mamatoi rirun, minugar noyo maalur intor rirun.

²⁰ Anak-anak ondo' inanak giu' ra pamatiran mindagu ilo rirun, ‘Pagun ragitio boborok guat kaga' raki', anii' aku ra intok maa' raginio makaayan aku ragiti.’

²¹ Pansunuron mu boo guang, ‘Osoi kia naganak ra anak-anak no raki'? Sala' kia ka natatakan aku ra anak, am kalo boo maganak? Inibit aku ralalom pamatiran am ininggi' am tinatang misasangulun. Sabap raginio ati intor ru anak-anak no, am osoi kia mampasukor risilo no?’ ”

²² Tuhan Raja' mindagu ra ulun Nano, “Aniin Ku ra pulanu ra bansa'-bansa' am pasagulion nilo anak-anak muno; anak-anak muno ra ungkuyon no kubibilon, am anak-anak muno ra ruandu' saanin.

²³ Raja'-raja' koson ayuk ra pinakaama' mu ayuk, am andu'-andu' raja' pinakaina' mu ayuk. Migulatur ilo mangurumat rirun am kalo lumimbau ilo rirun. Okou pana makapandai ra Aku ti Tuhan; ulun ondo' lumansan raki' kalo sindualin guang.”

²⁴ Mangkuot kau, “Gaawon kia nua' kuliamos ondo' inalap ru sangulun tutumula', kapoam ulun narakop gaawon intor ra kalindu' ru ulun malaat kaga'?”

²⁵ Tumaam Tuhan, “Ginio noyo kasaukan no. Ulun narakop ru nasuangan saujor ginaau saguli'. Ginaau ru ulun malaat kaga' gaawon poyo. Sabap ra Aku galama' manggal ra pantula' muno; bayagon Ku anak-anak muno.

²⁶ Saukon Ku pantula' muno magauk ra raraa', saboi ilo galama' mampapatoi. Ngaangai' ulun pana makapandai, ra Aku, Tuhan, Mamamayag rirun; Ondo' Maikang kaga', i Aki Kapuuno' ri Jakub, Mamumuli' muno.”