JISAYA 44 - Tanou Moonsoi Timugon

Tuhan rondo'-rondo' noyo i Aki Kapuuno'

¹ Indagu Tuhan, “Rongogo' noyo, akau ulipon Kuno Israil, akau ulun pinili' Kuno, papag ri Jakub.

² Aku noyo Tuhan ondo' namangun ramuyun, ondo' nambaal ramuyun intor poyo ra akau tininai', am Aku mangindangan ramuyun. Pai' noyo kalaa'; akau ulipon Kuno, ulun pinili' Kuno ondo' tagamin Kuno.

³ “Pasasaron Ku timug ra tana' ondo' mapua', am patilison Ku sungoi-sungoi boborok ra intok mapua'. Pasasaron Ku Ambiluo Kuno ra anak-anak mino barakatin Ku papag mino.

⁴ Malabung kinatuu' nilono koson ra sakot giu' ra intok makatimug, koson ra puun ru gandarusa giu' ra tobo ru sungoi ondo' makaaug.

⁵ “Moonong ulun mindagu, ‘Aku ti longgom ru Tuhan.’ Mararatok ilo ra ulun ru Israil. Moonong ulun tulisin nilo longon nano; Longgom ru Tuhan, am niayuk ilo galama' manabit ra inan nilo koson ra ulun ri Aki Kapuuno'.”

⁶ Tuhan ondo' namarinta am mangampin ra Israil, Tuhan Ondo' Maayo Kaga' Kuasa' mindagu, “Aku noyo ondo' kasaa' am ondo' pamupusan, i Aki Kapuuno' rondo'-rondo' no; Suai Raki', kolondo' bokon.

⁷ Osoi kia makapambaal ra atan ondo' binaal Kuno? Osoi kia makapanala' ra atan poyo masauk intor ra talimpuun saboi mapupus orou?

⁸ Pai' noyo kalaa', akau ulun Kuno! Nakapandai kano intor ra galing suku' ragino nanala' Aku no ra nansalinut kasaukan no; akau noyo sasi'-sasi' Kuno. Suai Raki', kolondo' bokon, am kolondo' manindung ra bokon ondo' kalo poyo napandayan Kuno.”

Pansawayan ra sumamba ra sinungkalalaing

⁹ Ngaangai' ulun ondo' nambaal ra sinungkalalaing no kolondo' onong, am dewa-dewa sinamba nilono pana kolondo' onong. Ilo ondo' sumamba ra dewa-dewa no bolou am kolondo' atan-atan napandayan; ginio ra ilo tinauyu'.

¹⁰ Papalo nilo ayuk nambaal ra sinungkalalaing intor ra logam am sambaan io koson ra dewa!

¹¹ Moonong ulun sumamba ra sinungkalalaing no tauyuon. Ulun nambaal ra sinungkalalaing no ulun ayuk toojo. Susubo' ilo paumaa' Raki'; maaru' ilo no malaa' am tauyuon.

¹² Ulun manukang ra basi' mangalap sampila' logam am baalon no mamakai ra apui am tukul. Mikang io toojo mambaal. Liliwa' io mambaal ra logam no, malimanan no maitilan, paason am maagui.

¹³ Ulun manukang ra tataun manuku' ra tataun. Lukison no pagulu baalon nano mamakai ra kapur, puusin no mamakai ra kuliamos nano, am saukon no ra sinungkalalaing natilu ra ulun ondo' maindon, am pabantaan no ra ralalom ru baloi nano.

¹⁴ Magu' tataun sidar pinakai nano, kapoam tataun oak am tataun sipris intor ra kataunan. Maaru' lair nantanom io ra puun tataun laurel am maginaa ra rasam maa' raginio tumuu' puun no.

¹⁵ Ginio noyo sangulun makaalap ra tataun am santayaran no suruin, am santayaran tataun no baalon ra sinungkalalaing. Santayaran no baalon ra luton, moonsoi pandarangan kapoam panalaban ra ruti', am santayaran poyo baalon ra dewa ondo' sambaan nano.

¹⁶ Santayaran tataun no suruin. Io pana mansalag ra kual, akanon kual no am majala' io boo. Mandarang io am mindagu, “Mapara' piboo bonsoi am kinalasu' ru apui no!”

¹⁷ Suwo ru tataun no baalon ra sinungkalalaing, am igugulatur am sumamba io. Makiasi' io ra sinungkalalaing no am mindagu, “Okou noyo tuhan kuno; bayago' aku no!”

¹⁸ Ulun koson raginio sasambungon toojo. Kumorom ilo am siliin nilo guang saboi kolondo' atan-atan pangaratian nilo.

¹⁹ Ilo ondo' nambaal ra sinungkalalaing no kalo nakapangkara' ra mindagu, “Santayaran ra tataun no suruin ku; apui no pantutunu ku ra ruti' am pamanggangan ku ra kual, am akanon. Tataun ra suwo no saukon ku ra sinungkalalaing. Ilai' noyo, sambaan kuno saputul tataun ayuk!”

²⁰ Binaal raginio nogondo' ayuk ra mangakan ra kaau. Pangkaraan nano pinalayau saboi kalo boo makaindangan riso. Kalo mangiou io ra sinungkalalaing ra ginuut nano sala' ka tuhan.

Tuhan , Namangun am Mamamayag

²¹ Tuhan mindagu, “Karaa' noyo, alii ra Israil; karaa' noyo ra akau ulipon Kuno. Binangun Takamin koson masauk ra ulipon Kuno; Kalo lilianin Takamin.

²² Pinuso Ku ngaangai' tula mini koson ra gaun inibit ru angin. Saguli' kano Raki', sabap ra Aku noyo namayag ramuyun.”

²³ Pagilakup kono maansukan, okou limbowon! Pagilakup kano, alii ra intok-intok malandom ra tana' ti! Pagitapap kano maansukan, akau kagunungan, am kataunan am niayuk nansalinut tutuu' no! Tuhan napakito ra katulayan Nano paat ra Io namayag ra ulun Nano Israil.

²⁴ “Aku noyo Tuhan Mamamayag ramuyun; Aku noyo namangun ramuyun. Aku noyo Tuhan Namangun ra ngaangai' no. Aku galama' namingkal ra limbowon; Aku namangun ra tana' ti ra kolondo' nangindangan.

²⁵ Kinuli-kuli Ku ulun mangingilong, kinuli-kuli Ku nanalaan ru sangulun nujum. Kalo iowon ku guangon ru ulun mapintar, am mapabala' ra kapintaran nilono sasambungon.

²⁶ Kaa' bulintok ra ulipon Kuno manala', paat ra aku manusub ra ulipon Kuno mapabala' ra inatangan Kuno, baalon Ku panalaan am pangatangan no. Mindagu Aku ra Jirusalim no ayanin saguli' am bandar-bandar ru Jiuda baalon saguli', Bandar-bandar no tumirong intor ra napuutan.

²⁷ Ralalom ru panusuban Kuno, raat masauk malasakan.

²⁸ Mindagu Aku ri Koris, ‘Okou noyo mamarinta ra bala Raki'; am mamatas sumugut ra kasagaan Kuno: okou noyo manaak ra panusuban koson mambaal saguli' ra Jirusalim, am koson mapatanom ra lugu' ru Baloi Kuno.’ ”