JISAYA 43 - Tanou Moonsoi Timugon

Mambantu' i Aki Kapuuno' mapalabus ra ulun Nano

¹ Akau Israil, ginio noyo ragu ru Tuhan ondo' namangun ramuyun, “Pai' kano kalaa'! Bayagon Takamin. Piniau Takamin ra inggalan mino, akau longgom Kuno.

² Bulintok ra akau sumandaup ra raat malandom, mabaya' Aku ramuyun; kalo makalom kau ralalom kapaganan. Bulintok ra akau mansail ra apui, kalo mosolob kau; kalo majamaran kau ra pangkinaman-pangkinaman ra maagat.

³ Aku noyo Tuhan, i Aki Kapuuno' min, i Aki Kapuuno' ondo' matulai, ondo' namayag ramuyun. Pataakon Ku Misir koson mamuli' ramuyun; Pataakon Ku Itiopia am Siba koson mapalabus ramuyun.

⁴ Pataakon Ku ngaangai' bansa' koson suali ru painawo mino, sabap ra akau mologo ra guang Kuno, am sabap ra Aku monogom am niayuk mampagagaya' ramuyun.

⁵ Pai' kalaa', sabap ra Aku mabaya' ramuyun. Intor ra sirangon am kalasaan ibiton Ku anak am akupu mino muli'.

⁶ Susubon Ku pagun giu' ra ralayo mapalabus risilo, am pagun giu' ra rabugus mapalabus risilo. Polosoon noyo ulun Kuno muli' intor ra pagun-pagun maalur, intor ra titikop pompor ru tana'.

⁷ Ilo noyo ulun Kuno, binangun Ku ilo koson mampatulai Raki'.”

Israil koson sasi' ru Tuhan

⁸ Mindagu i Aki Kapuuno', “Susubo' noyo ulun Kuno rumatong muma'. Makamato ilo, kaa' bolou; makatalingo ilo, kaa' barat!

⁹ Susubo' noyo ngaangai' bansa' tumimung. Osoi kia risilo ngaangai' no makapanala' ra orou matong, am mapabala' ra atan kasaukan ragino? Polosoon noyo ngaangai' sasi' nilono mindagu koson mapakito ra ilo kolondo' sala, am ragu-ragu nilono motopot.

¹⁰ “Akau ulun ru Israil, akau noyo sasi' Kuno; pinili' Takamin masauk ra ulipon Kuno maa' raginio mauligan min Aku am niayuk mangintopot kau Raki', am mangarati' kau ra Aku noyo rondo'-rondo' ayuk i Aki Kapuuno'. Suai intor Raki', kolondo' tuhan-tuhan ra bokon; intor poyo ra galing i, kapoam orou ra matong.

¹¹ “Aku ayuk Tuhan, Aku ayuk makapamayag ramuyun.

¹² Manala' Aku ra baal ondo' masauk, am matong aku mangindangan ramuyun. Kolondo' dewa suai nakaili' mambaal koson raginio; akau noyo sasi' Kuno.

¹³ Aku noyo i Aki Kapuuno', am Aku ti ayuk i Aki Kapuuno' ra mantilayun. Kolondo' sangulun pana makalabus intor ra kuasa' Kuno; kolondo' osoi-osoi pana makapanginga' Raki' ra mamatas.”

Pinalabus Israil intor ra Babil

¹⁴ I Aki Kapuuno' ru Israil, i Aki Kapuuno' ondo' matulai, Tuhan ondo' mamayag ramuyun mindagu, “Atarin Takamin ra saujor koson mamayag ramuyun intor ra Babil; Lunsayon Ku kulobon-kulobon garabang, am pagigindiyan ru namagun Babil makulau masauk ra tangi'.

¹⁵ Aku noyo Tuhan, i Aki Kapuuno' mino, i Aki Kapuuno' ondo' matulai. Aku noyo namangun ramuyun, akau Israil, Aku noyo raja' min.”

¹⁶ Galing i Tuhan nambaal ra ralan maya' ra raat, ralan maya' ra timug ondo' makakinulun.

¹⁷ Pinuso No pulalai ru saujor ra masuang; pulalai ru kurita' kuda am pulalai manangkuda. Maratu' ilo, kalo boo makasukal; matoi ilo koson ra sumbu' nalasa'.

¹⁸ Kaa' Tuhan mindagu, “Pai' karaa' baal ra galing i, pai' karaa' kasaukan-kasaukan ra nakasail.

¹⁹ Guango' noyo baal makabagu ondo' baalon Ku mataki'. Ilai' noyo, pinatalimpuun Ku noyo. Mambaal Aku ra ralan giu' ra tana' kaagisan, am manaak ramuyun ra sungoi-sungoi boborok giu' ra agis limayak.

²⁰ Tambiag ra masigo pana mangurumat Raki', taani am susuit unta mongompor Raki' bulintok ra Aku mampatilis ra timug ru sungoi-sungoi boborok no giu' ra tana' kaagisan, koson mapainum ra ulun pinili' Kuno.

²¹ Ilo noyo ulun Kuno ondo' sinauk Ku ra longgom Kuno galama'.”

Tula ru Israil

²² Tuhan mindagu, “Kaa' akau Israil, nasuraan kano Raki', kalo boo sumamba kau Raki'.

²³ Kalo magibit kau ra domba koson taak simbalui koson mapabansuk ra guang Kuno; kalo mangurumat kau Raki' ra taak simbalui ondo' pataakon min. Sotopot no kalo simbagatin Takamin ra kitaakin ra taak kapoam mantipagon ramuyun makitaak ra kaminyan.

²⁴ Kalo binalian min Aku ra kaminyan maamis owou, kapoam jinala' min Aku ra lomok ru bibiag ondo' pataakon min. Kaa' sinimbagatan min boo Aku ra tula mino; kasalaan mino napakapagon Raki'.

²⁵ Kaa' Aku ti i Aki kapuuno' ondo' mangampun ra tula mino, am Aku mambaal koson raginio sabap ginio noyo paliso Kuno. Kalo karaan Ku tula mino.

²⁶ Ongoi takau ra makama; pasalulaa' noyo panguwan-panguwan mino! Pabalaa' noyo suang ru guang mino am pabalaa' noyo ra akau kolondo' sala!

²⁷ Kinamatuaan mini ondo' kasaa' nambaal ra tula; ulun-ulun mangunguasa' ramuyun pana makatula Raki',

²⁸ am imam-imam mino mapajamol ra intok ayanan Kuno. Ginio sabap ra namuso Aku ra Israil, Polosoon Ku ulun Kuno asabin.”