JISAYA 42 - Tanou Moonsoi Timugon

Ulipon ru Tuhan

¹ Indagu Tuhan, “Gitio noyo ulipon Kutu, ondo' pinaikang Kuli; sangulun noyo pinili' Kuli, am mapabansuk ra guang Kutu. Kuasa' Kuno pinataak Ku noyo riso, magibit Io ra katimpakan ra moonong bansa'.

² Kalo igondo' io golok kapoam mampiau ra ralalom bolos matangil, am bolos nano kalo morongog ra pangkiralanan.

³ Bulu' ra liminonot kalo pandakon no, kapoam mampalasa' ra pilasut ra boboot. Ngaangai' ulun makaalap ra katimpakan ondo' ibiton nano.

⁴ Kalo maimamang kapoam lumuku saboi mapabigor io ra katimpakan ra tana'. Pagun-pagun ondo' maalur magiginaa ra pangilaan nano.”

⁵ Tuhan i Aki Kapuuno' namangun am napabingkal ra limbowon; binangun No tana' am niayuk nansalinut naayag ra rasawat nano; Manaak io ra painawo ra ulun. Ragino i Aki Kapuuno' mindagu ra ulipon Nano,

⁶ “Aku, Tuhan nampiau rirun am manaak rirun ra kandoi koson mapaugar ra katimpakan ra tana'. Pinabala' galing Rirun ra Aku mambaal ra nabantuan ra ngaangai' ulun; pinabala' galing rirun ra Aku mampasinda ra bansa'-bansa'.

⁷ Sinungkirat Mu mato ru ulun bolou, am nampalabus ra ulun intor ra pangaputan ondo' molondom.

⁸ Aku noyo Tuhan, ginio noyo inggalan Kuno. Katulayan Kuno kalo pataakon Ku ra osoi-osoi pana, kapoam pangamparan Kuno ra ati-ati sinungkalalaing.

⁹ Ragino atan ondo' panalaan kuli nasauk noyo; Balain takamin ragino babaal nakabagu ra kalo poyo masauk ngaangai' no.”

Rimbai Pangamparan

¹⁰ Rimbayi' noyo Tuhan ra rimbai bagu; Omporo' Io no, akau titikop ru tana'! Omporo' Io no, okou raat am ngaangai' suang nano, paririmbai kano, akau mamagun ru pagun-pagun ra maalur!

¹¹ Moonsoi poyo tana' kaagisan am bandar-bandar nano mongompor ri Aki Kapuuno'; musiti' namagun ru Kidar mongompor Riso! Musiti' namagun ru bandar Sila magilakup intor ra bujuk-bujuk ru gunung!

¹² Moonsoi ra ulun ondo' minayan ra pagun-pagun maalur mongompor am mapatulai ra Tuhan!

¹³ Mundus Tuhan mangayou koson sangulun tutumula' ondo' nakatampos toojo mongoi pangayou. Gumolok Io koson tatandu' mangayou; Mapakito Io ra kaikangan Nano ra pantula'.

Mambantu' i Aki Kapuuno' koson mangindangan ra ulun Nano

¹⁴ Mindagu i Aki Kapuuno', “Nabuoi Aku no nongkoror; mongkoror Aku am kalo minimbuor. Kaa' ragino nasaboi noyo bulintok koson mamatas; gumolok aku koson ra ruandu' maganak.

¹⁵ Gunung am bulur saukon Ku mapua', am mopolonot ra nansalinut tutuu' am sakot. Kulawon Ku sungoi giu' ra limayak masauk ra tana' kaagisan, am mapalasak ra kulam-kulam ru timug.

¹⁶ Kitangon Ku ulun Kuno ra nobolou maya' ra ralan ondo' kalo poyo igondo' nilo bayai'. Kulawon Ku kalandaman masauk ra sinda, am taubin ku tana' ra tangkilubok no risilo. Ginio noyo baal ondo' baalon Kuno, Musiti' no pongoon Ku ngaangai' no.

¹⁷ Ngaangai' ulun ondo' mangintopot ra sinungkalalaing, am sinungkalalaing-sinungkalalaing no pinakadewa nilo asabin am tauyuon.”

Israil lakat kalo masaga' ilaan

¹⁸ Mindagu Tuhan, “Rongogo' noyo ulun barat kau! Ilai' noyo toojo, ulun bolou kau!

¹⁹ Mokoondo' poyo kia ulun nobolou poyo ra bokon ka ulipon Kuno, kapoam barat poyo ka ulun sinusub Kuno?

²⁰ Akau Israil, masuang kaga' nakito mini, kaa' mapara' kalo kukula' maratian mini. Makatalingo kau, kaa' kalo mokorongog kau.”

²¹ Masalok Tuhan masaga' mamayag; masaga' Io ra ukuman Nano urumaton am tulayon.

²² Kaa' ragino ulun Nano ginaawan, pinasubol ilo ra pangaputan ralalom tana', am inaput ra pangaputan. Tinakawan ilo am ginaawan, kolondo' sangulun pana mangindangan risilo.

²³ Masaga' kia osoi-osoi mangkirongog? Tumalimpuun ragino masaga' kau kia mangkirongog toojo?

²⁴ Osoi kia napataak ra Israil no ra kalindu' ru pantula'? Tuhan galama', sabap ra makatula takau Riso! Kalo masaga' takau maayag maya' ra kasagaan Nano kapoam sumugut ra pangilaan Nano.

²⁵ Ginio ra pinoloso No itakau mampaliman ra sangit Nano, am maimbolo' ra kalaatan ru pangayawan. Koson ra apui, sangit Nano monolob ra titikop ru Israil, kaa' kalo maratian takau atan ondo' nasauk no; kalo migigila' takau intor ra nailian no.