JISAYA 39 - Tanou Moonsoi Timugon

Ulun-ulun sinusub intor ra Babilonia

¹ Bulintok ragili, raja' ru Babilonia, ioginio Raja' Mirodak Baladan anak ri Baladan nokorongog ra Raja' Gijkia marualan am makaluat noyo. Ginio ra raja' ru Babilonia napaibit ra surat am rondo' tangguang no ra Raja' Gijkia.

² Raja' Gijkia nanguma' ra rinatangan ru ulun-ulun sinusub raginio am napatalang io ra kinalangkayaan nano risilo – pirok am mas nano, apa' pampagamis ra akanon am umau maamis owou, am niayuk nansalinut kuliamos ra saujor nano. Kolondo' rondo' pana giu' ra baloi nambulian nano kapoam titikop ru pamarintaan nano kalo pinatalang no risilo.

³ Kopongo raginio Nabi Jisaya minuma' ra Raja' Gijkia am pangkuot, “Ati intor ru ngaangai' ulun ti, am atan ragu nilo?” Taam Raja' Gijkia, “Intor ilo ra Babilonia, pagun ondo' maalur kaga'.”

⁴ “Atan kia inilayan nilo ra istana?” i Jisaya nangkuot poyo. Nansalinut nakito nilo. Kolondo' rondo' pana ra baloi nambulian no kalo pinatalang ku risilo,” Raja' Gijkia timinaam.

⁵ I Jisaya pana minindagu ra raja', “Sumugut ra ragu ru Tuhan Ondo' Maayo kaga' kuasa',

⁶ masaboi niayuk bulintok no nansalinut kinalangkayaan ra istana mutu raja', nansalinut inumung ru kinamatuaan muno saboi orou raiti', ibiton ra Babilonia. Kolondo' rondo' pana matatang.

⁷ Kukula' ngaulun intor ra papag muno ibiton am saukon ra sida-sida koson mangandoi giu' ra istana raja' ru Babilonia.”

⁸ Raja' Gijkia mangkara' ra buoi ru bayag nano, pamarintaan nano kalinuos ayuk am moonsoi ayuk. Ginio ra taam raja', “Ragu ru Tuhan ondo' posoboyon muno moonsoi.”