JISAYA 38 - Tanou Moonsoi Timugon

Raja' Gijkia Binabas

¹ Bulintok ragili niayuk Raja' Gijkia nalugu am itik poyo minatoi. Nabi Jisaya am i Amos timinuum ra raja' am minindagu riso, “Sumugut ra ragu ru Tuhan, musiti' mopongo mu ngaangai' kandoi muno, sabap ra okou kalo boo mababas. Matoi kou.”

² Pinalikar ru raja' Gijkia bulos nano ra timbok am pakiasi',

³ “Karaa' noyo, iou Tuhan, aku ti mangandoi ayuk Rirun, gumagaya' am sumugut, am masalok aku mompogogot koson mambaal ra kasagaan Muno.” Raja' pana nantangi' am mangiluk guang.

⁴ Tuhan pana nanusub ri Jisaya

⁵ siminaguli' ra Raja' Gijkia am mapasaboi ra bilin ragitio, “Aku Tuhan, i Aki Kapuuno' ondo' sambaan ri Daut kinamatuaan muno, nokorongog ra pakiasian muno am magilong ra lomou muno. Ruangin Ku poyo umur muno mopor am limo ngambilor.

⁶ Bayagon Tokou am bandar ru Jirusalim intor ra raja' ru Asyur. Rayusin Ku mangampin ra bandar ragitio.”

²¹ Nanusub i Jisaya ra ulun manutuk ra kawa' ru ara am patapison ra talipos ru raja' maa' raginio mapali' raja'.

²² Pangkuot Raja' Gijkia, “Atan kia tatandu' no ra aku mokoongoi poyo ra Baloi ru Tuhan?”

⁷ Taam i Jisaya, “Tuhan manaak ra rirun raja' ra rondo' tatandu' koson inono' manugut ra bantu' Nano.

⁸ Tuhan manaak ra babara' koson pangaruan ra bulintok ru mato ru orou ondo' binaal ru Raja' Agas, lumugut mopor garis.” Babara' no pana liminugut mopor garis.

⁹ Kopongo Raja' Gijkia nababas, nanulis io ra rimbai pangamparan ragitio:

¹⁰ Mangkara' aku, paat pompor ru painawo kuno, mongoi aku ra pagun ru ulun minatoi, am orou ra matutuo kalo makaliman aku.

¹¹ Mangkara' aku, giu' ra intok ru ulun maayag kalo boo makakito aku ra Tuhan, kapoam osoi pana ulun ondo' lakat poyo maayag.

¹² Painawo kuno naukat, paminawaan pupus paabuson ku, koson ra kim ru mantatamung pinurun, koson ra konoon linompor intor kuliamos ru pambaalan ra konoon. Indos ku pupusin ri Aki Kapuuno' bayag kuno.

¹³ Masuaban aku gumolok marualan, koson ayuk ra singa' mamandak ra bungul kutu. Indoson kuli pupusin ri Aki Kapuuno' bayag kuno.

¹⁴ Bolos kuno lumuku am malawo, malumpus aku koson ra susuit asang. Mato kuno maagui sabap ra mantingaa' ra limbowon. Iou Tuhan, bayago' aku no intor ra nansalinut kapaganan ragitio.

¹⁵ Atan kia maalap kuno karagu? Tuhan noyo nambaal no. Guang kutu mapari' am aku kalo makalunus.

¹⁶ Iou Tuhan, makakau' aku maayag ra koson Rirun, am Okou ayuk. Babaso' aku no am polosoo' aku no maayag.

¹⁷ Kaimbalaan kuno pana masauk ra kalinuos ayuk. Okou namayag raki' intor ra nansalinut makalalaa'; inampun Mu ngai' tula kuno.

¹⁸ Kolondo' sangulun pana ra namagatoi mongompor Rirun; ulun minatoi kalo lumansan ra gagaya' Muno.

¹⁹ Ulun naayag ayuk mongompor Rirun, koson ragino ra aku mongompor Rirun. Ama' nantunung ra gagaya' Muno ra anak nilono.

²⁰ Binabas Mu noyo aku, iou Tuhan. Mangkuli akai ra jitor am marimbai ra rimbai pangamparan, buoi ru painawo mai giu' ra Baloi ru Tuhan.