JISAYA 37 - Tanou Moonsoi Timugon

Makipinson raja' ri Nabi Jisaya

¹ Paat nokorongog ra nambalaan nilo, rinilak ru Raja' Gijkia bayang nano sabap ra mangiluk guang. Nambayang io ra konoon karung am minongoi ra Baloi ru Tuhan.

² Nanusub io ri Iliakim, tingganai ru pagawai istana, am i Sibna, mamamatik ru istana, am niayuk imam-imam ondo' matutuo koson mongoi uma' ri Nabi Jisaya anak ri Amos. Ilo pana nambayang ra konoon karung.

³ Nanusub Raja' Gijkia risilo mapasaboi ra tanou ragitio ri Jisaya: “Orou raiti' orou kaimbalaan. Inukum takau am tinauyu'. Itakau koson ra ruandu' ondo' matipaganak kaa' naagui kaga'.

⁴ Raja' ru Asyur nanusub ra tingganai masawat kaga' nano koson magasab ri Aki Kapuuno' ondo' naayag. Gama' ru Tuhan, i Aki Kapuuno' muno mangkirongog ra pagasaban no am mangukum risilo ondo' nakaindagu no. Ginio ra pakiasi' kano ri Aki Kapuuno' koson mangindangan ra ulun ondo' lakat poyo naayag.”

⁵ Paat ri Jisaya nakaapu ra tanou intor ri Raja' Gijkia,

⁶ gitio taam nati: “Tuhan minindagu rirun raja' ra kalo pana malaa' ra ulun ru Asyur ondo' mindagu ra Tuhan kalo makapamayag rirun raja'.

⁷ Tuhan mangkinibit ra raja' ru Asyur mangkirongog ra rondo' tanou kalo motopot saboi raja' minuli' ra pagun no galama'. Tuhan mopoloso ra raja' ru Asyur no potoyon ra giu' no.”

Ulun ru Asyur mompololob poyo

⁸ Pagawai ru Asyur nokorongog ra raja' nano nanatang ra Lakgis am lakat mangayou ra Libna, rondo' bandar paginggaar. Ginio ra minongoi io ra giu' koson makipinson.

⁹ Bulintok raginio raja' ru Asyur nokorongog ra tanou saujor ru Misir ondo' tiningganai ru Raja' Tirgaka, raja' ru Itiopia, minatong koson mangayou risilo. Bulintok nokorongog ra tanou raginio, raja' ru Asyur nangator rondo' surat ra Raja' Gijkia,

¹⁰ giu' ra Jiuda. Koon ragitio sulabit ru surat no, “I Aki Kapuuno' ra intopoton mino mambantu' ra kalo maratu' kau ralalom ru kalindu' kutu, kaa' pai' kau karuung ru bantu' raginio.

¹¹ Nokorongog kau ra atan ondo' binaal ru raja'-raja' ru Asyur no ra moonong pagun ra pusoon nilono. Pai' kau pangkara' ra makalabus kau.

¹² Kinamatuaan kuli namuso ra bandar Gojan, Aran, am Rijip, am niayuk namatoi ra ulun ru Idin ondo' minayan giu' ra Tilasar. Kolondo' rondo' pana dewa nilono nakapamayag risilo.

¹³ Ati boo raja'-raja' ru bandar Gamat, Arpad, Siparwaim, Gina am Iwa ragino?”

¹⁴ Raja' Gijkia nangalap ra surat raginio intor ra ulun-ulun sinusub no, am basaa' no. Kopongo raginio raja' no minongoi ra Baloi ru Tuhan, am basaa' no surat no ra saang ru Tuhan,

¹⁵ am pakiasi',

¹⁶ “Iou Tuhan Ondo' Maayo Kaga' Kuasa', i Aki Kapuuno' ru Israil, Okou ondo' manturung ra rasawat ru kirub, Okou noyo rondo'-rondo' ayuk i Aki Kapuuno' ondo' namarinta ra ngaangai' pamarintaan ra tana' ti. Okou namangun ra limbowon am tana'.

¹⁷ Ragino ilai' nga ondo' nasauk ramon ti. Rongogo' noyo nansalinut pagasaban ondo' pinaragu ru Raja' Sanirib no Rirun, iou Aki Kapuuno' ondo' maayag.

¹⁸ Nakapandai akai ngai', iou Tuhan, raja'-raja' ru Asyur namuso ra masuang bansa' am nanutuk ra pagun nilono,

¹⁹ am niayuk nonolob ra dewa-dewa nilono. Kaa' dewa-dewa no totopot kolondo' boo kuasa' sabap iono sinungkalalaing intor ra tataun am batu ondo' binaal ru ulun.

²⁰ Ginio ra, bayago' akai intor ra ulun ru Asyur, iou Tuhan i Aki Kapuuno' mai, maa' raginio ngaangai' bansa' ru tana' ti makapandai ra Okou noyo rondo'-rondo' ayuk Tuhan.”

Bilin ri Jisaya ra raja'

²¹ Kopongo raginio i Jisaya napaibit ra bilin no ra Raja' Gijkia, ngaangai' pakiasian rinongog noyo ru Tuhan i Aki Kapuuno' ru Israil.

²² Gitio noyo ragu ru Tuhan, “Bandar Jirusalim mangiis am niayuk magasab rirun, okou Sanirib.

²³ Osoi kia inulas am inasaban muno? Paliso muno lumimbau Raki', i Aki Kapuuno' ru Israil, i Aki Kapuuno' ondo' matulai.

²⁴ Nanusub kou ra kukula' ngaulun koson lumimbau ri saang Kuno, pangkaraan muno kurita' kuda muno makapanguasa' ra gunung-gunung mangasawat giu' ra Libanon. Ragu muno ayuk maayo ra tinagar mu kunu' puun ru tataun sidar ondo' masawat kaga', am puun ru sipris ondo' moonsoi kaga', am naliput mu kunu' kataunan ru Libanon ondo' makapal no.

²⁵ Ragu muno masawat, nangkali kou kunu' ra tulubong am manginum ra timug giu' ra pagun-pagun suai, am saujor muno namamanjak kunu' ra sungoi Nil saboi napua'.

²⁶ Kalo kia igondo' kau pokorongog ra Aku noyo nangatang ra ngaangai' no intor poyo ra galing i? Ragino binaal Ku noyo. Nanaak Aku rirun ra kuasa' koson mamuso ra bandar-bandar makatimbok saboi nongopopol.

²⁷ Namagun ra giu' no kolondo' lulu'; naliangan ilo am malaa'. Koson ilo ra sakot ru padang, kapoam sakot timinuu' ra pinuusan ru baloi, ondo' lumonot bulintok masiob ru angin sirangon ondo' malasu'.

²⁸ Kaa' napandayan Ku ngai' nansalinut baal muno: nansalinut binaal muno ra ati ayuk inongoi muno. Makapandai Aku ra sumangit kou kaga' Raki'.

²⁹ Nakaining Aku no ra sangit am limbau muno. Ragino susukin Ku arung muno ra kakait, am kakangin Ku kabang muno. Ralaaton Tokou muli' maya' ra ralan binayaan muno ra galingon i.”

³⁰ Kopongo raginio i Jisaya napaibit ra bilin no ra Raja' Gijkia, “Baal ragitio masauk ra tatandu' rirun raja': Bilor ragitio am bilor ra sumunu' mangakan kou ra gandum ondo' giminatak ayuk tuu'. Kaa' bilor ra sumunu' no, pantanom no ra gandum am anggur, am undasai' noyo ampos no.

³¹ Namagun ru Jiuda ondo' nabayag lumangkaya' koson ra tatanom ondo' nanangasi am mangkawa'.

³² Giu' ra Jirusalim kapoam giu' ra Bulur Sion mokoondo' ulun nabayag sabap ra Tuhan Ondo' Maayo Kaga' Kuasa' noyo nangaru' ra baal ragitio masauk.

³³ Gitio noyo bala' ru Tuhan koson ra raja' ru Asyur, ‘Kalo sumubol Io ra Jirusalim, kapoam mapabakis ra panah no tumingkuang riso. Saujor-saujor ra makaampin kalo minggaar ra bandar ragitio. Kalo mambaal ilo ra bujuk ru tana' koson mapalibung riso.

³⁴ Raja' ru Asyur muli' maya' ra ralan ondo' binayaan nilo ra galingon i, am kalo sumubol ra bandar ragitio. Aku, Tuhan, minindagu noyo.

³⁵ Bandar ru Jirusalim sungkaan am ampinin Kuno sabap ra urumat Kuno galama', am niayuk nabantuan Kuno ri Daut, ulipon Kuno.’ ”

³⁶ Kopongo raginio sangulun malaikat Tuhan minongoi ra nangkiman ru ulun ru Asyur am namatoi 185,000 ngaulun saujor. Katawang ra suabon no minatoi ilo ngaangai'!

³⁷ Kopongo raginio Raja' Sanirib, raja' ru Asyur liminuku' am minuli' ra Niniwi.

³⁸ Sangarawan ragili, bulintok ra raja' ru Asyur sumambayang ra ralalom ru kuil dewa Nisrok, pinatoi io ri Adramilik am i Sarijir, anak-anak nano namakai ra ilang. Kopongo ragili, nagiru' ilo giu' ra tana' Ararat. I Isaradon, anak nano ra bokon siminuali riso siminauk ra raja'.