JISAYA 36 - Tanou Moonsoi Timugon

Ulun ru Asyur mompololob ra Jirusalim

¹ Paat bilor koopor am apat namarintaan ri Gijkia raja' ru Jiuda, bandar-bandar ru Jiuda ondo' binaalan ra kubu binulunsar am kinala ru Raja' Sanirib, raja' ru Asyur.

² Kopongo ragili Raja' Sanirib nanusub ra tingganai ru pagawai nano mintor ra Lakgis am mongoi ra Jirusalim mababaya' ra sampulalai maayo saujor koson mampajajal ra Raja' Ijkia rumuku'. Pagawai no nangalap ra intok ra ralan no, intok ru ulun mambaal ra konoon mangandoi, mamaar ra parit ondo' papatilisan ra timug intor ra kulam tampilon ra ralayo.

³ Talu ngaulun intor ra Jiuda minatong minuma' riso, ilo ti i Iliakim anak ri Ilkia, maningganai ra istana; i Sibna, mamamatik ru istana; am i Joa anak ri Asap, mamamatik ru pagun.

⁴ Pagawai ru Asyur no minindagu risilo, “Posoboyo' noyo ragu ru raja' Asyur no ra Raja' Gijkia, ‘Kua pangkara' kau ra akau maikang?

⁵ Makapangkara' kau kia ra ragu-ragu ayuk makasuali ra kapintaran am kaikangan ru saujor? Osoi kia lansanin min koson mangindangan ramuyun mamulunsar ra Asyur?

⁶ Akau lumansan ayuk ra pangindanganan ru Misir, kaa' ginio koson ayuk ra ulun nangalap santaun tabu binaal ra susukur. Susukur no mapandak am mokotobok ra kalindu' mino galama'. Ginio niayuk ra raja' ru Misir ra osoi-osoi lumansan riso.’ ”

⁷ Pagawai ru Asyur no maparayus poyo ra ragu nano, “Kapoam mindagu kau ra akau lumansan ra Tuhan, i Aki Kapuuno' mino. Bulintok ru Raja' Gijkia namarinta ra ulun ru Jiuda am Jirusalim maa' raginio sumambayang ra rondo' altar ayuk, ondo' linunsai no altar am intok-intok sambaan ra Tuhan galama'.

⁸ Ralalom inggalan ru raja' Asyur makimantaru aku ramuyun. Manaak aku ramuyun ruo ngaribu ngainan kuda amon suang ru ulun mino koson raginio koson kumura' ra ngaangai kuda no!

⁹ Kalo makaanggal kau ramon io pana pagawai ru Asyur ra magana' kaga' no, kaa' malansan kau ra ulun ru Misir mangator ra kurita' kuda am pulalai manangkuda no ramuyun.

¹⁰ Indoson min kia ra aku mongoi pamulunsar ra pagun mino am mamuso ra kalo makiindangan ra Tuhan? Tuhan galama' manusub raki' mongoi pamulunsar am niayuk mongoi pamuso.”

¹¹ Kopongo raginio i Iliakim, Sibna, am i Joa minindagu ra pagawai no, “Tuan, pakimansunur no ramon ralalom ragu ru Aram. Maratian mai ragu raginio. Pai' noyo indagu ra ragu ru Ibrani. Ngaangai' ulun giu' ra rasawat ru timbok no makarati'.”

¹² Taam pagawai no, “Indoson min kia ra Raja' Asyur manusub raki' mapasaboi ra ngaangai' baal ragitio ramuyun am raja' mino ayuk? Kalo. Posoboyon ku niayuk ngaangai' baal ragitio ra ngaangai' ulun nanturung ra rasawat ru timbok no, sabap ilo pana musiti' mangakan ra tatai' am sasabu nilo galama' koson niayuk ramuyun.”

¹³ Kopongo raginio bigor pagawai no am giminolok ralalom ragu Ibrani, “Rongogo' noyo ragu ru raja' ru Asyur ti ramuyun!

¹⁴ Raja' nanaak ramuyun ra papakaraan maa' raginio akau kalo maabawan ru Raja' Gijkia. Raja' Gijkia kalo makapamayag ramuyun.

¹⁵ Pai' polosoo' raja' mino manusub ramuyun lumansan ra Tuhan. Pai' pangkara' ra Tuhan no mamayag ramuyun, am mongompong ra pulalai ru saujor Asyur mampagaau ra bandar mino.

¹⁶ Pai' min rongogo' Raja' Gijkia. Raja' Asyur manusub ramuyun maa' raginio mingkual kau intor ra bandar no am rumuku'. Akau ngaangai' iowon paakanon ra kawa' ru anggur intor ra puun ru anggur mino galama', am kawa' ru nunuk intor ra puun ru nunuk mino galama', am manginum ra timug intor ra tulubong mino galama',

¹⁷ saboi raja' ru Asyur mapabanding ramuyun giu' ra pagun ondo' nogondo' ra pagun mino. Giu' no mokoondo' masuang umo ru anggur ondo' makaampos ra wain, am masuang gandum baalon ra ruti'.

¹⁸ Pai' kau karuung ru Raja' ru Gijkia. Pai' pangkara' ra Tuhan no mamayag ramuyun. Dewa-dewa ru bansa' ra ati kia igondo' pamayag ra pagun no intor ra raja' ru Asyur?

¹⁹ Atibo dewa-dewa ru pagun Gamat am Arpad ragino? Atibo dewa-dewa ru pagun Siparwaim? Igondo' kia osoi-osoi namayag ra Samaria?

²⁰ Ati kia rondo' dewa igondo' pamayag ra pagun nano intor ra raja' maino? Kua kia pangkara' kau ra Tuhan makapamayag ra Jirusalim?”

²¹ Namagun ra Jirusalim nongkoror ayuk maya' ra nanusuban risilo ru Raja' ru Gijkia. Kolondo' ra sabantuk pana rinagu nilo.

²² Kopongo raginio i Iliakim, Sibna, am i Joa namparilak ra bayang sinulungan nilo tatandu' ra ilo mangiluk guang. Ragu-ragu ru pagawai ru Asyur no pinabala' nilo ra Raja' Gijkia.