JISAYA 35 - Tanou Moonsoi Timugon

Ralan mongoi ra pamayagan

¹ Tana' kaagisan no maansukan, am busak no mungkalar giu' ra tana' kataunan.

² Tana' kaagisan no marimbai am magitapap makaansuk, am masauk koson ra kaantakan ru kagunungan Libanon am niayuk koson ra kinalabung ru umo giu' ra Karmil am Saron. Moonong ulun makakito ra katulayan ru Tuhan, magilong ra katulayan am kuasa' Nano.

³ Kaikango' noyo kalindu' ra lamumu', am kaikango' noyo atur ondo' mauyog.

⁴ Ragui' ilo ondo' malawo guang, “Posoroto' guang muno am pai' kalaa'! I Aki Kapuuno' matong mamayag ramuyun, am mangukum ra pantula'-pantula' mino.”

⁵ Ulun bolou makakito, Ulun barat mokorongog.

⁶ Ulun kalo makaugar tumindak koson ra tambang, am bungangang magilakup makaansuk. Taur ru timug tumampusis giu' ra tana' kaagisan, am sungoi tumilis ra tana' kataunan.

⁷ Agis ra malasu' masauk ra kulam ru timug, tana' ra mapua' masauk ra uur ru timug. Intok ra galing i inayanan ru taani, tuwin ru pandan am galaga.

⁸ Giu' no mokoondo' ra ralan maayo tiniir, ondo' sabiton ra “Ralan Sumuku' ra Pamayagan”. Ulun ra makatula kalo maya' ra giu' no, ulun sasambungon kalo mapalayau ra ulun ondo' mansail ra ralan no.

⁹ Giu' no kolondo' boo singa', kapoam bibiag masangit ra bokon no. Ulun ondo' binayag ru Tuhan, muli' mansail ra ralan raginio.

¹⁰ Ulun ondo' pinalabus ru Tuhan no muli'; makasaboi ilo giu' ra Jirusalim ra guang maansukan, liliwa' marimbai am magigindii. Maansukan ilo ra sabuoi-buoi no, am makalabus intor ra guang mangiluk.