JISAYA 33 - Tanou Moonsoi Timugon

Pakiasian makiindangan

¹ Aibui boo ra pantula' takano! Mampagaau ilo am malaat kabalu' pana kolondo' osoi-osoi pana igondo' pampagaau am lumaat risilo. Kaa' bulintok ra ilo mampagaau am malaat no maampus, am ilo galama' gaawin am laaton.

² Iou Tuhan, pakaasi' no ramon. Lumansan akai Rirun. Ampini' akai no moonong orou, am bayago' akai no bulintok ra akai makakapaganan.

³ Bulintok ra Okou mangindangan ramon mangayou, ngaangai' bansa' magiru'.

⁴ Rapu' nilono ginaau am inalap ru ulun bokon.

⁵ Tuhan matulai kaga'! Ngaangai' no kinuasa' No. Pinaundok No katimpakan am kabanisan ru guang giu' ra Jirusalim,

⁶ am manaak ra kaansayan ra ulun Nano. Magail Io manindung ra ulun Nano, am niayuk manaak risilo ra kapintaran am kapandayan. Rapu' nilo ra mokologo ioginio urumat am malaa' ra Tuhan.

⁷ Ulun ondo' maikang am baani makiindangan. Nasuangan ru duta ondo' mompogogot ra kaansayan mantangi' ra mapari'.

⁸ Ralan-ralan masauk ra makalalaa' saboi kolondo' osoi-osoi pana mugar raginio. Nabantuan kalo sinugut am nangiawan kalo binaya'. Kolondo' boo ulun lioon.

⁹ Pagun nokoloso am masiluk. Kataunan ra Libanon nasauk liminonot; limayak Saron ra malabung nasauk koson ra tana' kaagisan; giu' ra Basan am Gunung Karmil raun-raun nangatutu'.

Tuhan napakara' ra pantula' Nano

¹⁰ Tuhan mindagu ra bansa'-bansa' no, “Ragino mimbuor Aku. Patalangon Ku kinaayo ru kuasa' Kuno.

¹¹ Ngaangai' inatang mino papalo ayuk, am nansalinut binaal mino pana kolondo' onong. Sangit mino ondo' koson ra apui mamuso ramuyun.

¹² Masauk kau koson ra batu karang bulintok solobon masauk ra kapur, am koson ra bulungkut ru sulinit masauk ra kaau bulintok suruin.

¹³ Moonsoi poyo moonong ulun, intor ra mamaar kapoam maalur, makapandai ra binaal Kuno am mangiou ra kuasa' Kuno.”

¹⁴ Namagun ra Sion ondo' makatula monontol malaa'. Konilo, “Ukuman intor ri Aki Kapuuno' koson ra apui ondo' monolob ra sabuoi-buoi no. Mokoondo' kia osoi mabayag intor ra apui no?”

¹⁵ Maayag kau amon ru mindagu am binaal mino motopot. Pai' min pakayo' kuasa' mino koson mamparuung ra ulun musikin, am pai' pangapu ra rasua. Pai' baya' ra ulun ondo' mangatang ra pamatayan kapoam mambaal ra kalaatan ra bokon.

¹⁶ Koson raginio boo maalap kau kabayag, masindungan kau koson giu' kau ra kubu ondo' mapiot. Makaalap kau ra akanon am inumon.

Orou tauli ondo' moonsoi kaga'

¹⁷ Igondo' poyo akau makatalinono' ra sangulun raja' mamarinta ra maantak. Pagun nano mapulolou ra ngaangai' linsuk.

¹⁸ Galing i malaa' kau ra ulun mampalulur ra cukai ru bansa' suai am ulun mansinok; ragino ngaangai' no karaan ayuk.

¹⁹ Kalo boo makakito kau ra ulun suai ra malilimbau, ondo' mindagu ra ragu ondo' kalo maratian min.

²⁰ Pulolowo' noyo bandar ru Sion intok ra itakau mangiantak ra orou pangiantakan ru ugama. Pulolowo' noyo Jirusalim! Intok raginio masauk ra ayanan ondo' makapamayag koson ra kim ondo' kalo poyo igondo' pabandingo', ondo' lugu' nano kalo poyo igondo' bubulo' am rurukug nano kalo poyo igondo' kaukat.

²¹ Tuhan mapaintalang ra katulayan Nano ritakau. Mayan takau ra intok ondo' maginggaar ra sungoi-sungoi ondo' malangka' am sungoi-sungoi boborok, kaa' kalo masundoi ru kapal ru pantula'.

^22-23 Nansalinut kuliamos ru kapal nilono kolondo' pakuan. Layar kalo maalap kabilar. Ngaangai' kinalangkayaan ru saujor pantula' no gaawon takau, am suang nano masuang kaga' saboi ulun kalo makalulu' pana matayaran. Tuhan galama' masauk ra raja' takau. Mamarinta Io am mangampin ritakau.

²⁴ Kolondo' sangulun pana mayan ra pagun takati mindagu ra jajajou sabap ru maruol, am ngaangai' tula inampun noyo.