JISAYA 31 - Tanou Moonsoi Timugon

I Aki Kapuuno' manindung ra Jirusalim

¹ Aibui boo ra ulun ondo' mongoi ra Misir koson makiindangan! Lumansan ilo ra kaikangan ru pulalai mangayou ru Misir ondo' kumura' ra kuda am kurita' kuda am saujor. Kaa' kalo lumansan ilo ra Tuhan, i Aki Kapuuno' ru Israil, i Aki Kapuuno' ondo' matulai kapoam makiindangan Riso.

² Tuhan no mapintar am makapandai ra atan baalon Nano. Maparatong Io ra karaat, am mapaugar ra pomololob Nano koson mangukum ra ulun malaat am ulun ra mangindangan risilo.

³ Ulun ru Misir sala' ka tuhan; ilo ulun ayuk. Kuda nilono ondo' makapainawo ra lamuoi, sala' ka ambiluo ra makakuasa'. Bulintok ra Tuhan mamatas, bansa' ra maikang pana maratu', am bansa' ra lamuoi ondo' indanganon nilono pana maratu'. Karuo-ruo no mapuso.

⁴ Tuhan mindagu raki', “Kabalu' pana nasuangan magagalung gumolok, kalo maanjung nilo singa' intor ra bibiag ondo' pinatoi nano. Ginio niayuk kolondo' mokopongompong Raki' Tuhan Ondo' Maayo Kaga' Kuasa', ka manindung ra Bulur Sion.

⁵ Ati kulaan ra sanginan susuit mansiab ra libung ru bunsut nano koson mangampin ra anak-anak nano, ginio niayuk Raki', Tuhan Ondo' Maayo Kaga' Kuasa', mangampin, manungka', am mamamayag ra Jirusalim.”

⁶ Tuhan mindagu, “Akau ulun ru Israil, makatula kau Raki' am manggal Raki'. Kaa' ragino saguli' kano Raki'!

⁷ Bulintok no masuku' paat ra akau ngaangai' mamatir ra sinungkalalaing sambaan intor ra pirok am mas, ondo' binaal ru kalindu' mino ondo' napanu' ra tula.

⁸ Asyur pusoon ra pangayawan, kaa' sala' ka ralalom ikang ru ulun. Ulun ru Asyur magiru' mangiruan ra pangayawan, am nasuangan tuu' bagu nilono saukon ra ulipon.

⁹ Raja' nilono magiru' ra malaa', am nasuangan tingganai ru saujor nilono malaa' kaga' saboi bandira' ru pangayawan tinatang nilo.” Tuhan minindagu – Tuhan ondo' sambaan am urumaton am monolob ra taak simbalui giu' ra Jirusalim.