JISAYA 30 - Tanou Moonsoi Timugon

Nabantuan ra kolondo' onong ra Misir

¹ Tuhan minindagu, “Aibui boo ra nasuangan tingganai ru Jiuda, sabap minanggal ilo Raki'. Mambaal ilo ra inatangan-inatangan ondo' sala' ka inatangan Kuno, am inirot nilo nabantuan koson manggal ra kasagaan Kuno. Tumuntur-tuntur boo tula nilo.

² Makiindangan ilo ra Misir kabalu' pana kalo iniou Ku. Sumindung ilo ra ragana' ru pamarintaan ru Misir. Ginio ra, lumansan ilo ra pangampinan ru raja' ru Misir.

³ Kaa' raja' ru Misir kolondo' lulu' mangindangan risilo, am pangampinan ondo' lansanin nilo ra Misir kolondo' onong.

⁴ Kabalu' pana duta-duta ru Jiuda nakaratong noyo ra Joan am Anis, bandar-bandar ru Misir,

⁵ kaa' namagun ru Jiuda pansagulian guang sabap ra lumansan ra bansa' ondo' kalo kalansanan, bansa' ra mapakaruol ra guang paat ilo gumogot makiindangan.”

⁶ Ginio noyo tanou ri Aki Kapuuno' intor ra bibiag giu' ra tampilon ra rabugus, “Duta-duta minugar nansail ra pagun ondo' makalalaa', ondo' inayanan ru singa', kukuo mabisa', am tambuakal ra mapandai mansiab. Kaladai am unta napasakayan nilo ra tangguang ondo' mologo koson pataakin nilo ra bansa' ondo' kalo makapangindangan risilo.

⁷ Pangindanganan ondo' pataakin ru ulun ru Misir no kolondo' onong. Ginio ra sabiton Ku Misir no, ‘Tambuakal ra kalo makalalaa'.’ ”

Bansa' ra kalo gumagaya'

⁸ Sinusub aku ri Aki Kapuuno' koson mamatik ra kalaatan ru ulun ti ralalom rondo' buuk kitab, koson pangkaraan ra sabuoi-buoi no.

⁹ Masalok ilo manggal ri Aki Kapuuno', masalok magabau, am marara' manugut ra pangilaan-pangilaan ru Tuhan.

¹⁰ Susubon nilo nasuangan nabi kalo paindaguon. Mindagu ilo, “Pai' paraguo' ragu ra motopot no ramon, kaa' paraguo' noyo ragu ra masaga' mai rongogon. Polosoo' akai no mantutuyang.

¹¹ Ongoi ra igig! Pai' akai sawayo'. Kalo masaga' akai mangkirongog intor ri Aki Kapuuno' ru Israil, i Aki Kapuuno' ondo' matulai.”

¹² Kaa' gitio noyo ragu ri Aki Kapuuno' ru Israil, i Aki Kapuuno' ondo' matulai, “Kalo lioon min ragu Kuno am lumansan kau ayuk ra kalaatan am pamparuungan.

¹³ Makasala kau. Koson kau ayuk ra timbok masawat ondo' liminata' intor ra rasawat saboi ra ragana'. Pulali' min ayuk mapuut.

¹⁴ Matutuk kau koson ra pagangan tana', am natutuk kaga' saboi kolondo' tayar mapakai koson pangalapan ra baa, kapoam susuuk panunuuk ra timug intor ra rarapu'.”

¹⁵ Tuhan Raja', i Aki Kapuuno' ru Israil, i Aki Kapuuno' ondo' matulai, mindagu ra ulun Nano, “Saguli' kano Raki' am pangintopot kano Raki' ralalom kalinuos ru guang. Akau pana ikangon Ku am bayagon Ku.” Kaa' kalo masaga' kau.

¹⁶ Kaa' mangatang kau koson magiru' intor ra pantula' am kumura' ra kuda ondo' maribok. Sotopot no akau musiti' no magiru'! Indoson min kuda mino maribok, kaa' ulun mangingilou ramuyun no poyo maribok!

¹⁷ Saribu ngaulun magiru' bulintok makakito ra sangulun pantula', am limo ngaulun pantula' sama' poyo mangkinibit ramuyun ngaangai' no magiru'. Saujor mino mapuso, am ondo' ayuk matatang no santaun lugu' ru bandira' giu' ra rasawat ru bulur.

¹⁸ Kaa' Tuhan magiginaa ra bulintok no koson mapakito ra guang makaasi' Nano ramuyun. Makaasi' Io ramuyun sabap Io Aki Kapuuno' ra masalok mambaal ra matimpok. Pakaansuk noyo ilo ondo' lumansan ra Tuhan.

Mambarakat i Aki Kapuuno' ra ulun Nano

¹⁹ Akau ondo' minayan ra Jirusalim kalo boo mantangi'. Tuhan no makaasi'. Paat ra akau mampiau makiindangan Riso, tumaam Io.

²⁰ Maagat nangkinaman ru Tuhan ramuyun, Kaa' Io galama' mabaya' ramuyun am mangila' ramuyun. Kalo pana boo maguyum kau Riso.

²¹ Amon lumisang kau ra pamiris kapoam kait, morongog min bolos Nano giu' ra talikuron mino mindagu, “Gitio noyo ralan ti, baya' kano ra ralan ragitio!”

²² Alapon min sinungkalalaing sambaan ondo' inangkupan ra pirok am mas, am patirin koson ra ginsamol. Mindagu kau riso, “Ugar no intor raki'!”

²³ Bulintok ra akau mapatias ra sampug, Tuhan maparatu' ra rasam maa' raginio sampug no tumuu'. Manaak io ramuyun ra ampos masuang, am bibiag mino naatang noyo padang ru sakot ondo' malangka'.

²⁴ Sapi' am kaladai ondo' mamparadu' ra tana' mino makaalap ra akanon moonsoi kaga'.

²⁵ Kubu-kubu ru pantula' mino mapuut, am potoyon ilo. Paat ra orou raginio sungoi-sungoi boborok tumilis intor ra moonong gunung am bulur.

²⁶ Bulan no suminda mapaang koson ra mato ru orou, am mato ru orou suminda mapaang intulu' poyo kapaang intor ra paang kaindalaman, koson ra sinda ru mato ru orou tulu' ngoorou buoi pinasinda patimpuluso'. Ngaangai' no masauk paat ra Tuhan mamangkos am mamali' ra pipilat-pipilat ru ulun Nano ondo' pinilatan Nano.

I Aki Kapuuno' mangukum ra Asyur

²⁷ Kuasa' am katulayan ru Tuhan makito intor ra maalur. Apui am lisun tatandu' ra kasangitan Nano. Bulintok ra Io mindagu, ragu no sumuru koson ra apui.

²⁸ Susubon No angin ra saang Nano koson ra liur mokopolos ra liog ondo' makapangabas ra atan-atan ayuk. Angin no mamuso ra bansa'-bansa' am mopolonggo' ra inatangan-inatangan nilo ra malaat.

²⁹ Kaa' akau ngai' ulun ri Aki Kapuuno', makaansuk am marimbai koson ra rondom pangiantakan ru ugama! Maansukan kau koson risilo ondo' mugar ondo' sinumbaya' ru tulali sumuku' ra Baloi ru Tuhan, manungka' ru Israil.

³⁰ Porongogon ru Tuhan bolos Nano ondo' matulai no, am moonong ulun makaliman ra kasangitan Nano ondo' makasimbula'. Kasangitan Nano maparatong ra apui ondo' makapangumpo, bagiu', rasam batu am rasam maawas.

³¹ Ulun ru Asyur malaa' bulintok mokorongog ra bolos ru Tuhan, am malimanan ukuman Nano ra maagat.

³² Tatanga' ra Tuhan ruruli' mapalamba' risilo, ulun Nano lumigo' maya' ra rantak ru tamburing am jitor. I Aki Kapuuno' galama' mangayou manggal ra ulun ru Asyur.

³³ Intor poyo ra galing i tinampos noyo apui ra maayo koson monolob ra raja' ru Asyur. Intok no malandom am mapila' am niayuk makasuang ra luton ondo' pariuntur. Tuhan monolob ra luton no mamakai ra angin ru paminawo Nano.