JISAYA 3 - Tanou Moonsoi Timugon

Sasou giu' ra Jirusalim

¹ Sotopot no, Tuhan Ondo' Maayo Kaga' Kuasa' no mangalap intor ra Jirusalim am Jiuda nansalinut inula' ra akanon am inumon am niayuk ngaangai' ulun ra lansanin nilono,

² ngaangai' ulun tutumula' am saujor, akim am nabi, ulun mangilong am ulun maminson,

³ buayoi tutumula' am ulun makainggalan maayo, ulun pulitik, ulun mapandai kaga' ra sihir am mapandai kaga' mangilong.

⁴ Polosoon ru Tuhan mamagun tingganayon ru buayoi-buayoi ondo' kalo nasukor.

⁵ Moonong ulun mangimpai ra ulun bokon. Ulun mamulok kalo boo mangurumat ra ulun matutuo, am ulun kolondo' pangkat kalo boo mangurumat ra ulun makapangkat.

⁶ Paat orou raginio ulun manulu' ra sangulun papag nano am mindagu riso, “Okou ayuk makasukub. Ginio ra, sauk no ra tingganai mai bulintok ra kapaganan ragitio.”

⁷ Kaa' tumaam ulun no, “Kalo makapangindangan aku ramuyun. Aku galama' kolondo' akanon am bayang. Pai' aku sauko' ra tingganai min!”

⁸ Jirusalim naratu' noyo! Jiuda pana napuut! Nansalinut raguon am binaal nilono manggal ayuk ra Tuhan. Kalo boo moopot nilo magasab ri Aki Kapuuno'.

⁹ Kinalaat nilono mauligan intor ra bulos nilono. Kalo boo moopot nilo mambaal ra tula koson ra mamagun ru Sodom ra galing i. Alii boo risilo no! Maparatong ilo ra karaat ru inan nilo galama'.

¹⁰ Mindagu Tuhan, “Ulun gumagaya' Raki' makakaansukan am maayag. Ilo galama' makasia' ra ampos ru kinandoi nilono.

¹¹ Kaa' alii boo ra ulun malaat! Atan pinamakuan nilo ra ulun bokon, ginio niayuk pamakuan risilo.

¹² Ulun mampaira' ra ruit mangimpai ra ulun Kuno am mamparuung risilo. Alii ra ulun Kuno, tingganai mino mapalayau ramuyun, saboi akau kalo makapandai ra ralan sotopot no bayaan min.”

Mangakim Tuhan ra ulun Nano

¹³ Nakatampos noyo Tuhan mapasingkual ra baal raginio; nakatampos Io noyo mangakim ra ulun Nano.

¹⁴ Akimin ru Tuhan tingganai-tingganai ru ulun Nano. Gitio noyo nanguwan Nano risilo, “Ginaau min ampos ru umo ru anggur am baloi mino nososok ra kuliamos ondo' ginaau min intor ra ulun musikin.

¹⁵ Kolondo' kuasa' min mangimbolo' ra ulun Kuno am niayuk mamparuung ra ulun musikin. Aku, Tuhan Raja' Ondo' Maayo Kaga' Kuasa' minindagu noyo.”

Ragu pampakaraan ra ruandu' ru Jirusalim

¹⁶ Mindagu Tuhan, “Malilimbau kaga' ruandu' ru Jirusalim! Masisinto ilo kaga', masalok ilo mangulurat, am tumpang nilono babaalon ayuk saboi kumurinsil ayuk boo golong ru kalayam nilono.

¹⁷ Kaa' ukumin Ku ilo: kungkulin Ku ulu nilono saboi maungkulan.”

¹⁸ Masaboi niayuk bulintok ra Tuhan mangalap ra ngaangai' kuliamos ondo' kasagain ru ruandu' ru Jirusalim: titibok, golong ru kalayam, sisigot,

¹⁹ golong ru longon, rundung,

²⁰ sisikoton, jimat ondo' golongon am pooboton,

²¹ sinsing am niayuk anting-anting ru arung,

²² babayangon ra orou kaantakan, bayang ra maawar, sukub, beg ra tanggalon,

²³ bayang magasil, parasa' linon, sapak, am sakiking maawar.

²⁴ Ragino nagumau ilo ra umau maamis owou, kaa' maagu no moonsor. Abot nilo ra malumis aligin ra abot makalas. Ulu nilo ra makaabuk moonsoi masauk mambulut. Bayang nilo ra mongoonsoi aligin ra konoon mangalaat ondo' makauyuyu'!

²⁵ Ngaangai' ungkuyon ru bandar no, am poyo ulun baani matoi bulintok ra mangayou.

²⁶ Kulobon garabang ru bandar, ulun mangulir am manulaboi, am bandar raginio masauk koson ra ruandu' linabasan, ondo' nanturung ra tana'.