JISAYA 29 - Tanou Moonsoi Timugon

Pupus ru Jirusalim

¹ Aibui boo ra Jirusalim ondo' sabiton ra Altar ri Aki Kapuuno'! Aibui boo ra bandar intok nangkiman ru Raja' Daut! Sambilor ayuk kapoam ruo ngambilor poyo pangiantakan-pangiantakan nano baalon,

² am porotongon ri Aki Kapuuno' karaat ra bandar ondo' sabiton ra Altar ri Aki Kapuuno'. Bolos pantangian am manulaboi maining, am titikop ru bandar no masauk koson ra altar ondo' natuba' ru raraa'.

³ I Aki Kapuuno' mamulunsar am mampalibung ra bandar no.

⁴ Jirusalim masauk koson ra riwato ondo' mompogogot mampaining ra bolos nano intor ra ralalom ru tana'; bolos ra kalo masingkual intor ra ralalom ru kaau.

⁵ Okou Jirusalim, ngaangai' ulun suai ondo' malaat kaga' no mapuso koson ra kaau masiob ru angin. Saujor nilono ondo' mangilalaa' no sasiob-siob koson ra apol. Sangkuliop ayuk am kolondo' nakapampaguang,

⁶ Tuhan Ondo' Maayo Kaga' Kuasa' mapalabus rirun am ra bagiu' am tana' mogonggon ondo' makalalaa'. Porotongon No bagiu' am apui ondo' masimbula'.

⁷ Ngaangai' boo saujor ru ulun suai ondo' mangayou ra bandar sabiton ra Altar ri Aki Kapuuno', am niayuk nansalinut kuliamos pakayon ra mangayou mapuso koson ra inupi bulintok molondom.

⁸ Ngaangai' bansa' ra nantitimung koson mangayou ra Jirusalim masauk koson ra ulun naitilan ondo' inupi nano mangakan io, am tumirong io ra tinai' naitilan, kapoam koson ra ulun pinaason ondo' inupi nano nanginum io, am tumirong io ra bambalangan nano napuaan.

Pampakaraan-pampakaraan ondo' kalo lioon

⁹ Simbaalo' paliso muno koson ra sasambungon am bolou! Migagauk kou kaa' kalo nanginum kou ra wain. Ugar noyo kasumpil-kasumpil, kaa' kalo nanginum kou ra wain!

¹⁰ Tuhan nambaal ramuyun matikoolong maa' raginio makalunus kau ra akau mombolong. Ngaangai' nabi sotopot no masauk ra mato ru ulun kaa' i Aki Kapuuno' nongorom ra mato nilono.

¹¹ Arati' ru moonong pinaintalang makasibuni intor ramuyun koson buuk pinurun ondo' sinaapan. Amon ibiton min buuk rinulun no ra sangulun mapandai mambasa' am manusub riso mambasa', mindagu io kalo makakau' sabap buuk no sinaapan.

¹² Amon ibiton min buuk rinulun no ra ulun ondo' kalo mapandai mambasa' am manusub riso mambasa', mindagu io kalo mapandai io mambasa'.

¹³ Mindagu Tuhan, “Bansa' ragitio nangiou sumamba Raki', kaa' ragu-ragu nilono kolondo' onong, am guang nilono maalur intor Raki'. Ugama nilono pangatangan ayuk am kaulayan ru ulun ondo' kinara'.

¹⁴ Ginio ra Aku mapatigog risilo ra lamba' ondo' kolondo' nampaguang. Ilo ondo' mapintar sotopot no sasambungon. Nansalinut kapandayan nilono masauk ra kolondo' onong.”

Kalansanan ra orou matong

¹⁵ Aibui boo ra ulun mompogogot mapasibuni ra pangatangan nilono intor ra Tuhan! Kalinuos nilo ayuk mimbuor am indoson kolondo' makakito kapoam makapandai ra atan baalon nilono.

¹⁶ Ngaangai' no pansalulangon nilo. Atan kia ondo' maatang toojo? Ulun manukang ra pagangan kia kapoam tana' bandulan? Makaindagu kia kuliamos ra binaal no ra ulun mambabaal no, ‘Sala' kia ka okou nambaal raki'’? Kapoam makaindagu kia kuliamos no riso, ‘Kalo napandayan mu atan binaal muno’?

¹⁷ Koson ra ragu ru ulun, kalo boo mabuoi kataunan masauk ra umo, am umo tumapuli' masauk ra kataunan.

¹⁸ Masuku' orou raginio, ulun barat mokorongog ra ulun mambasa' ra kitab, am ulun bolou ondo' naayag ralalom kalandaman, makakito.

¹⁹ Ulun musikin am asasabin igondo' poyo makaliman ra kaansukan ondo' pinataak ru Tuhan, i Aki Kapuuno' ru Israil, i Aki Kapuuno' ondo' matulai.

²⁰ Ginio noyo pupus ru ilo ondo' mangimbolo' ra ulun am niayuk magasab ri Aki Kapuuno'. Moonong ulun makatula pusoon.

²¹ Pusoon ri Aki Kapuuno' ulun ondo' masaga' manimbaal ra ragu, ulun ondo' mongompong ra ulun malaat no ukumin, am ulun ondo' mapatanou ra ragu-ragu magabau koson mongompong ra ulun mabanis guang makaapu ra katimpakan.

²² Ginio ra Tuhan, i Aki Kapuuno' ru Israil, ondo' namayag ri Abragam intor ra kapaganan mindagu, “Akau ulun Kuno, Kalo boo tauyuon kau; bulos mino kalo boo mabula' sabap ra mauyu'.

²³ Bulintok ra akau magilong ra anak-anak ondo' pataakon Kuno ramuyun ra maagu no, iowon min ra Aku ti i Aki Kapuuno' ru Israil, i Aki Kapuuno' ondo' matulai. Mangurumat kau Raki' am niayuk malaa' kau Raki'.

²⁴ Ulun sasambungon masaga' migigila' am makapandai, am ilo ondo' masalok mambutok-butok matasu' ilaan.”