JISAYA 27 - Tanou Moonsoi Timugon

¹ Orou raginio Tuhan mamakai ra ilang Nano ondo' maayo, malarom, am ondo' makapatoi koson mangukum ra Liwiatan, kukuo ra maras am talilingkong no, am koson mamatoi ra tambuakal ru raat.

² Orou raginio Tuhan mindagu koson ra umo ru anggur Nano ondo' maantak,

³ “Magalung Aku ra umo no am masalok Ku uasin. Orou rondom Aku mantamung maa' raginio kolondo' sangulun pana mampalipok.

⁴ Kalo boo sumangit Aku ra umo no. Amon ru makasulinit am makasakot, koyoon Ku surui' saboi mapuso.

⁵ Kaa' amon pantula' ru ulun Kuno makiampin Raki', polosoon ilo mobonsoi Raki'. Iou, polosoon ilo mobonsoi Raki'.”

⁶ Orou ra tauli no, ulun ru Israil ioginio papag ri Jakub manambakat koson ra sampuun tataun, am manalantar ilo am niayuk mambusak. Tana' ti mapapak ra kawa'-kawa' nilono.

Tuhan mangukum ra ulun Nano

⁷ Israil kalo poyo igondo' inukum ru Tuhan koson ra kinaagat mangukum ra pantula' nilono. Kalo potoyon No ulun Nano koson ra Io mamatoi ra pantula' Nano.

⁸ Mangukum Tuhan ra ulun Nano ioginio patirin ilo ra tana' suai. Manganjung Io risilo ra angin malaat intor ra sirangon.

⁹ Tula ru Israil maalap kaampun amon ru batu ru altar ru dewa-dewa tutukon saboi koson ra kapur, am kolondo' boo altar panalaban ra kaminyan, am kolondo' boo tatandu'-tatandu' ru Dewi Asyira.

¹⁰ Bandar ra makakubu no masiluk boo am tinatang boo saboi kolondo' namagun koson ra tana' kaagisan. Sampanon ru sapi' mongkotop am tumangus ra giu' no liliwa' mangai' ra raun intor ra raan-raan ru puun.

¹¹ Bulintok raan ru puun no mapua' am mapandak, raan-raan no umungon ru ruandu'-ruandu' koson saukon ra luton. Sabap ra bansa' raginio kolondo' atan-atan pangaratian, i Aki Kapuuno' Namangun risilo kalo malubatan kapoam monogom risilo.

Namuli' Tuhan ra ulun Nano

¹² Bulintok raginio, intor ra Sungoi Iprat saboi ra balitan ru pagun ru Misir, mampalulur Tuhan ra ulun Nano, koson ra ulun mapasuai ra gandum am apol.

¹³ Bulintok raginio, bujung samputin koson mampiau mampauli' ra ngaangai' ulun ru Israil ondo' pinatiran giu' ra Asyur am Misir. Matong ilo ra Jirusalim am sumamba ra Tuhan giu' ra rasawat ru bulur Nano ondo' matulai.