JISAYA 25 - Tanou Moonsoi Timugon

Rimbai Pangamparan

¹ Tuhan, Okou noyo i Aki Kapuuno' kuno; mangurumat aku Rirun am mongompor ra inggalan Muno. Nambaal Kou ra kandoi-kandoi makaimuag kaga'; inatang Mu noyo intor poyo ra galing i; am pinaugar mu ralalom gogot ru guang.

² Tinuyas Mu bandar-bandar; am nomopol ra kubu-kubu nano. Istana-istana binangun ru pantula' mai napuso ra sabuoi-buoi no.

³ Ngaangai' bansa' ra maikang mongompor Rirun, am kalaanin giu' ra bandar ru bansa'-bansa' ondo' mangalaat.

⁴ Ulun musikin am ulun malawo mongoi Rirun, am makisindung bulintok makakapaganan. Inampin Mu ilo intor ra bagiu', am manindung risilo intor ra orou malasu'. Ulun malaat kaga' mongoi pangayou koson ra bagiu' mapuor bulintok masimu',

⁵ am koson ra angin malasu' giu' ra tana' mapua'. Kaa' Okou, iou Tuhan, sinauk Mu pantula' maino ra bobou; pinolonggo' Mu golok ru ulun malaat, koson ra gaun mapalinos ra lasu' ru orou.

I Aki Kapuuno' mangatang ra pangakanan maayo

⁶ Giti ra Bulur Sion, Tuhan Ondo' Maayo' Kaga' Kuasa' mangatang ra pagakanan maayo koson mampaakan ra ngaangai' bansa' ra tana' ti. Pasulungon No akanon ra mangaamis am wain ra pinili'.

⁷ Bulur ragitio, pusoon No nansalinut kapaganan ru guang ondo' masalok malimanan ru ngaangai bansa'.

⁸ Pusoon ru Tuhan Raja' no kapatayan ra sabuoi-buoi no! Pusoon No lomou intor ra moonong bulos, am liomon No pagasaban ondo' limanin ru ulun Nano ra titikop ru tana' ti. Tuhan minindagu noyo.

⁹ Bulintok ra baal raginio masauk, ngaangai' ulun mindagu, “Io no i Aki kapuuno' takau! Io no inaanin takau koson mamayag ritakau. Io no Tuhan ra inaanin takau. Ragino magilakup takau koson maansukan sabap Io namayag ritakau.”

Ukumin ri Aki Kapuuno' Moab

¹⁰ Tuhan manindung ra Bulur Sion, kaa' namagun ru Moab kikinjangin koson ra rami kikinjangin giu' ra intok majamol.

¹¹ Patunuyon nilo kalindu' koson mansarui, kaa' i Aki kapuuno' mapakauyu' risilo, am kalindu' nilono maratu' ra kolondo' lulu'.

¹² Lunsayon ri Aki Kapuuno' kubu ampin ru bandar Moab; timbok no ra masawat gabaan saboi matutuk koson ra kaau.