JISAYA 24 - Tanou Moonsoi Timugon

Ukumin ru Tuhan tana' ti

¹ Tana' ti pusoon ru Tuhan saboi masauk lumata' am masiluk. Lapiaton No ralimbou ru tana' ti am pantutuliaron No namagun no.

² Moonong ulun makatuum ra pupus nano ra mogondo' – imam-imam am mamagun, ulipon am tuan, mambabali am mantatalan, mapaira' ra ruit am magira' ra ruit, langkaya' am musikin.

³ Tana' ti matutuk am mapuso. Tuhan minindagu noyo am baal raginio musiti' masauk.

⁴ Tana' ti mapua' am lumonot; titikop ru tana' ti masauk malawo; limbowon am tana' ti maaru' maimbolo'.

⁵ Tana' ti majamol sabap ra ulun minanggal ra ukum-ukum ri Aki Kapuuno' am liminungkang ra nabantuan ondo' binaal ri Aki Kapuuno' am ilo ra sabuoi-buoi no.

⁶ Ginio ri Aki Kapuuno' nagulas ra tana' ti. Ulun makaapu ra balos intor ra binaal nilo, am ulun maayag buoi-buoi no kalo boo kukula'.

⁷ Puun ru anggur lumonot, am buoi-buoi no wain pana maawai. Ulun ondo' maansukan ra galing i ragino malumpus guang.

⁸ Bolos ru jitor am rabana kalo boo maining.

⁹ Kolondo' boo ulun manginum ra wain liliwa' marimbai; kolondo' boo ulun sumia' ra kinaamis ru inumon mapangit.

¹⁰ Titikop ru bandar kumuliasou-asou. Ngaangai' ulun magangob ra kulobon koson mangalaa'.

¹¹ Ulun sogolok-golok ra ralan sabap nakayaan ra wain. Kaansukan pinuso noyo ra tana' ra sabuoi-buoi no.

¹² Bandar napuso noyo, am kulobon-kulobon garabang nano pinuut noyo.

¹³ Gitio noyo kasaukan ra moonong bansa' ra titikop ru tana' ti. Baal raginio nogondo' koson ra pupus ru bulintok mangkumos, paat ra kawa' jaitun makai' kaalap am kawa' ru anggur makai' kaupu'.

¹⁴ Ulun naayag marimbai maansukan. Ulun tampilon ra kalasaan mapatanou ra katulayan ru Tuhan,

¹⁵ am ulun tampilon ra sirangon mongompor Riso. Namagun ra libung ru nagas mongompor ra Tuhan, i Aki Kapuuno' ru Israil.

¹⁶ Intor ra pagun-pagun maalur kaga' maining rimbai pangamparan ri Aki Kapuuno' Ondo' Matimpok Kaga'. Kaa' aku galama' kolondo' kalansanan! Maimbolo' aku! Ulun-ulun mangalaat no rayusin nilo lumaat raki'; kalaatan nilono najanjayan kaga'.

¹⁷ Rongogo' noyo, alii ra ngaangai' ulun! kalaanan, luang, am jajaling ragino ti maginaa ramuyun.

¹⁸ Osoi-osoi kuminam pagiru' intor ra kalaanan no io maratu' ra luang no, am osoi-osoi makalabus intor ra luang makasulung ra jajaling no. Rasam maawas rumatu' intor ra limbowon am lonor ru tana' ti mogonggon.

¹⁹ Tana' ti lumata', mapilang am matutuk.

²⁰ Tana' ti makasiling koson ra ulun nagauk, am mauyog koson ra kalukub natiu' ru bagiu'. Tana' ti maluyu' sabap tula nano maagat, am matutuk boo am kalo boo tumirong saguli'.

²¹ Bulintok nano masuku' paat ra Tuhan mangukum risilo ondo' manguasa' ra limbowon am raja'-raja' ru tana' ti.

²² Timungon ri Aki Kapuuno' raja'-raja' koson ra ulun narakop ralalom rondo' luang. Aputon No ilo saboi orou pangakiman risilo masuku'.

²³ Bulan masauk molondom am mato ru orou kolondo' boo sinda, sabap ra Tuhan Ondo' Maayo Kaga' Kuasa' masauk ra raja'. Mamarinta Io ra Bulur Sion giu' ra Jirusalim, am mapabala' ra katulayan Nano ra ngaangai' tingganai ru ulun Nano.