JISAYA 22 - Tanou Moonsoi Timugon

Tanou intor ra Jirusalim

¹ Gitio noyo tanou ru Tuhan intor ra Limayak Pinaintalang. Akau namagun ru Jirusalim, kua tampak kau ra pinuusan koson mambaal ra pangiantakan?

² Kalo moonsoi ngaangai' ulun ru bandar mangiantak am magilakup maansukan. Ulun mino ondo' minatoi ralalom ru pangayawan ti sala' ka minatoi sabap ra namulunsar.

³ Ngaangai' tingganai mino nagiru' am narakop ra kalo poyo nakarampot ilo napalabus ra panah.

⁴ Polosoo' aku sangulun koson maupus ra ngaangai' ulun kuno ondo' minatoi. Pai' aku kinami' ansuko'.

⁵ Gitio noyo bulintok maajag-ajag, kaalaan, am sasou giu' ra Limayak Pinaintalang. Tuhan Raja' Ondo' Maayo Kaga' Kuasa' naparatong ra karaat raginio. Timbok-timbok ru bandar takano nangaaba', am tangi' ru ulun makiindangan mamintanou giu' ra bulur-bulur.

⁶ Ulun ru Siria minatong kiminura' ra kuda am kurita' kuda, ulun ru Ilam nananggal ra panah am tanggayan no, am ulun ru Kir tumampos magibit ra ampin.

⁷ Limayak-limayak Jiuda ondo' malabung no nososok ra kurita' kuda, am santimungan makakuda nakatampos ra saang ru kulobon-kulobon garabang ru Jirusalim.

⁸ Ngaangai' pinangampin ru Jiuda napuut. Paat raginio paingkualon min kinandoi intor ra kalukub papaulian ra kinandoi.

^9-10 Makito min timbok ru bandar Jirusalim liminata' ondo' musiti' punaan. Ngaangai' baloi giu' ra Jirusalim pinarisa' min am bokon no binunsag min maa' raginio maalap min batu koson pamumuna' ra timbok ru bandar. Koson papaulian ra timug,

¹¹ nambaal kau ra kulam panimungan ra timug giu' ra bandar koson papatulukan ra timug intor ra kulam nakalair. Kaa' kalo ginuang min i Aki Kapuuno' ondo' intor noyo ra galing nangatang noyo ra ngaangai' no am nangkinibit ra ngaangai' no nasauk.

¹² Bulintok raginio Tuhan Raja' Ondo' Maayo Kaga' Kuasa' manusub ramuyun mantangi' am manulaboi, mambulut am mambayang ra konoon karung.

¹³ Kaa' sala' boo maansukan kau am maantak. Nanimbalui kau ra domba am sapi', mangakan ra kual, am manginum ra wain, liliwa' mindagu, “Ibok pangakan am panginum takau sabap susuab no matoi takano.”

¹⁴ Tuhan Raja' Ondo' Maayo Kaga' Kuasa' mindagu raki', “Kalaatan nilono totopot kalo boo ampunon saboi ilo matoi. Aku, Tuhan Raja' Ondo' Maayo Kaga' Kuasa' minindagu noyo.”

Pampakaraan ri Sibna

¹⁵ Tuhan Raja' Ondo' Maayo Kaga' Kuasa' nanusub raki' mongoi ri Sibna, tingganai ru istana, am mindagu riso,

¹⁶ “Indos mu osoi kia okou ti? Atan kuasa' muno saboi okou galama' nambaal ra luang ru lobong muno galama' giu' ra bulur batu?

¹⁷ Maaru' lair okou sangulun tingganai, kaa' Tuhan mamungkayut am mamatir rirun.

¹⁸ Luluiron No okou am pobobolon koson ra bula giu' ra pagun ondo' maayo. Matoi kou ra giu', mababaya' ra kurita' kuda ondo' anggakon muno. Nampakauyu' kou ra pabukat ru tuan muno.

¹⁹ Tuhan mopolonggo' rirun intor ra kandoi muno am patuunon kou intor ra pangkat muno ra masawat.”

²⁰ Indagu Tuhan ri Sibna, “Paat raginio, piawon Ku ulipon kuno, i Iliakim anak ri Ilkia.

²¹ Babayangon ru tingganai am abot muno papakain Ku riso. Masauk io koson ra ama' ru namagun ru Jirusalim am Jiuda.

²² Kuasa' maayo taakin Ku riso ragana' ru raja' papag ri Daut. Kunsi' ru karajaan guuton no. Atan-atan ukabin nano, kolondo' osoi-osoi pana makataub; am atan-atan taubin nano, kolondo' osoi-osoi pana makaukab.

²³ Kapioton ku intok nano koson ra sasangutan pinopopok mapiot ra timbok. Ngaangai' pabukat nano urumaton sabap io.

²⁴ Kaa' ngaangai' pabukat am saanin nano masauk ra kapaganan riso. Lumansan ilo riso koson ra pagangan tana' lumansan ra sasangutan.

²⁵ Paat raginio papasangutan ondo' pinopopok mapiot no maratu'. Ginio noyo boo pupus ru atan-atan pana pinasangut riso.” Tuhan minindagu noyo.