JISAYA 18 - Tanou Moonsoi Timugon

Ukumin ri Aki Kapuuno' Itiopia

¹ Intor ra sampagunan, giu' ra sandaup ru sungoi-sungoi ru Itiopia morongog binangung ru maningot.

² Intor ra pagun no minatong duta-duta siminakoi ra parau-parau ondo' binaal intor ra tabu am mansail ra sungoi Nil. Uli' no, alii ra ulun-ulun sinusub ra maikang! Ibito' noyo tanou ra pagun mino ondo' sailin ru sungoi-sungoi, ra bansa'-bansa' mino ondo' maikang am mapanggol, ra ulun mino ra masawat am malumis kungkung, am ondo' kalaanin ra titikop ru tana' ti.

³ Rongogo' noyo, alii ra ngaangai' namagun ra tana' ti! Inaani' min noyo bandira' ondo' paundokon giu' ra munung ru gunung-gunung! Inaani' min noyo bujung no samputin!

⁴ Mindagu Tuhan raki', “Intor ra suruga' kalinuos Ku ayuk manginduku', koson ra bolobou masauk bulintok molondom ondo' malasu' ra bulintok mangkumos, am koson ra sinda mato ru orou bulintok mampayung orou.

⁵ Ra kalo poyo upuon kawa' ru anggur, bulintok busak no matutu' am kawa'-kawa' no matikaansak, pantula' mamuso ra ulun ru Itiopia koson ra pais manatas ra bulisang-bulisang ru puun ru anggur.

⁶ Baangkai ru saujor nilono sakabantai' akanon ru susuit am tambiag masigo. Bulintok malasu' baangkai-baangkai no akanon ru susuit, am bulintok masimu' akanon ru tambiag masangit.”

⁷ Bulintok no masuku' paat ra Tuhan Ondo' Maayo Kaga' Kuasa' mangapu ra taak intor ra pagun ondo' pansailan ru sungoi-sungoi, intor ra bansa' ondo' maikang am mapanggol, ulun masawat am makakungkung malumis, am ondo' kalaanin ra titikop ru tana' ti. Matong ilo ra Bulur Sion, intok ru Tuhan Ondo' Maayo Kaga' Kuasa' no sambaan.